दिलासादायक ! डोनाल्ड ट्रम्प यांनी इराणसोबतचा युद्धविराम आणखी वाढवला; म्हणाले, 'पाकिस्तानच्या विनंतीवरून...'
वॉशिंग्टन : सध्या इराणवर अमेरिका आणि इस्त्रायल या दोन्ही देशांकडून हल्ले केले जात आहेत. इराणकडूनही या हल्ल्यांना जोरदार प्रत्युत्तर देण्यात येत आहे. हे युद्ध थांबवण्यासाठी पाकिस्तानात अमेरिका आणि इराण यांच्यात ऐतिहासिक चर्चा सुरू आहे. दरम्यान, राष्ट्राध्यक्ष डोनाल्ड ट्रम्प यांनी इराणसोबत सुरू असलेल्या चर्चेदरम्यान मोठं विधान केले आहे. ‘कोणताही निकाल अमेरिकेसाठी महत्त्वाचा नाही. कारण आम्ही जिंकलो आहोत’.
इराण-अमेरिका युद्धाने जगाला मोठा फटका बसत आहे. त्यामुळे हे युद्ध थांबवण्यासाठी आंतरराष्ट्रीय स्तरावर प्रयत्न केले जात आहेत. त्यातच व्हाईट हाऊसबाहेर पत्रकारांशी बोलताना ट्रम्प म्हणाले, “या चर्चेत काय होते ते पाहू. कदाचित आम्ही करारावर पोहोचू. पण आम्ही या युद्धात जिंकलो आहोत. चर्चेतून आम्हाला काहीही नवीन वाटत नाही. मात्र, या युद्धात आम्ही जिंकलो आहोत. इराणसोबत अनेक तासांपासून चर्चा सुरू आहे. ते अनेक तासांपासून भेटत आहेत. आता मुख्य करारावर पोहोचत आहोत. याने काही फरक पडत नाही. अमेरिकेच्या दृष्टिकोनातून, आम्ही जिंकलो. जहाजे पुढे सरकत आहेत आणि आमच्या देशाच्या दिशेने येत आहेत. आम्ही मोठ्या टँकरमध्ये तेल आणि वायू भरत आहोत.”
दरम्यान, ट्रम्प यांनी हे देखील मान्य केले की इराणसोबत अत्यंत सखोल वाटाघाटी सुरू आहेत. मात्र, त्यांनी असेही सांगितले की, अमेरिकन सैन्य होर्मुझच्या सामुद्रधुनीमध्ये भूसुरुंगांची तपासणी करत आहे. हा मार्ग जवळजवळ बंद असल्याने तेल आणि वायू वाहून नेणाऱ्या जहाजांना समस्या निर्माण होत आहेत.
नाटोकडून कोणतीही मदत नाही
इराणची मालमत्ता अमेरिका सोडणार का, या प्रश्नाला उत्तर देताना राष्ट्राध्यक्ष ट्रम्प म्हणाले, काय होते ते पाहू. आम्ही इराणसोबत सखोल वाटाघाटी करत आहोत. कोणत्याही परिस्थितीत आमचाच विजय होईल. आम्ही त्यांना लष्करीदृष्ट्या पराभूत केले आहे. आम्ही होर्मुझची सामुद्रधुनी मोकळी करत आहोत. करार होवो वा न होवो, मला काही फरक पडत नाही, कारण आम्ही जिंकलो आहोत. आम्हाला उत्तर अटलांटिक करार संघटनेकडून (नाटो) कोणतीही मदत मिळालेली नाही.
चीनलाही इशारा
ट्रम्प पुढे म्हणाले, ‘इराणकडे नौदल, रडार किंवा हवाई दल नाही. त्यांचे सर्व नेते मारले गेले आहेत. त्यांनी अनेक वर्षे राज्य केले आणि आता ते गेले आहेत. या सगळ्याचे काय होते ते पाहू. पण माझ्या दृष्टिकोनातून, याने काही फरक पडत नाही. चीन इराणला शस्त्रे पाठवत असल्याच्या वृत्तांबाबत राष्ट्राध्यक्ष ट्रम्प म्हणाले, जर चीनने असे केले, तर त्यांना मोठ्या समस्यांना सामोरे जावे लागेल.
दोन आठवड्यांची युद्धबंदी जाहीर
पाकिस्तानची राजधानी इस्लामाबाद येथे अमेरिका आणि इराण यांच्यात सध्या ऐतिहासिक समोरासमोर चर्चा सुरू आहे. दोन आठवड्यांपूर्वी तात्पुरती युद्धबंदी जाहीर झाल्यानंतर काही दिवसांतच ही चर्चा होत आहे. आता सातव्या आठवड्यात असलेल्या या युद्धात हजारो लोकांचा बळी गेला असून, त्याचा जागतिक बाजारपेठांवरही परिणाम झाला आहे.
.png "Videos"){kind=small}
