शुक्रवार, 25 सप्टेंबर 2026
Masoud Pezeshkian : 'मी स्वतः ७ तास चर्चा केली'; मोजतबा खामेनी जिवंत असल्याचा अमेरिकेत इराणी अध्यक्षांनी सादर केला पुरावा ( फोटो सौजन्य : सोशल मीडिया )
इराण आणि इस्रायल-अमेरिका यांच्यातील वाढत्या लष्करी तणावाच्या पार्श्वभूमीवर इराणचे सर्वोच्च नेते मोजतबा खामेनी (Mojtaba Khamenei) यांच्या प्रकृतीबाबत आणि अस्तित्वाबाबत गेल्या काही महिन्यांपासून जगभरात विविध तर्कवितर्क लावले जात आहेत. विशेषतः अमेरिकन आणि इस्रायली प्रसारमाध्यमांनी मोजतबा खामेनी हे अत्यंत गंभीर आजारी असून त्यांच्या शरीराचे महत्त्वाचे अवयव निकामी झाले असल्याचा दावा केला होता. इतकेच नव्हे तर अमेरिकेचे अध्यक्ष डोनाल्ड ट्रम्प यांनी स्वतः मोजतबा यांच्या प्रकृतीविषयी शंका उपस्थित केली होती. मात्र, संयुक्त राष्ट्रांच्या महासभेच्या (UNGA) निमित्ताने न्यू यॉर्क येथे पोहोचलेले इराणचे राष्ट्राध्यक्ष मसूद (Masoud Pezeshkian) पेझेश्कियान यांनी या सर्व अफवांना पूर्णपणे पूर्णविराम दिला आहे.
न्यू यॉर्कमध्ये आंतरराष्ट्रीय व अमेरिकन पत्रकारांशी संवाद साधताना इराणचे राष्ट्राध्यक्ष पेझेश्कियान यांनी मोजतबा खामेनी यांच्या प्रकृतीविषयी अधिकृत माहिती दिली. पेझेश्कियान म्हणाले, “नेमक्या एका महिन्यापूर्वी मी इराणचे सर्वोच्च नेते मोजतबा खामेनी यांची प्रत्यक्ष भेट घेतली होती. त्यांची प्रकृती उत्तम असून त्यांच्या शरीराचे सर्व महत्त्वाचे अवयव पूर्णपणे शाबूत आहेत.” पश्चिम आशियातील युद्धजन्य परिस्थिती आणि अमेरिकेच्या दबावाच्या काळात इराणच्या सर्वोच्च नेतृत्वाबाबत पसरवल्या जाणाऱ्या बातम्यांवर थेट इराणच्या राष्ट्राध्यक्षांनी दिलेले हे स्पष्टीकरण अत्यंत महत्त्वाचे मानले जात आहे.
पत्रकारांशी अधिक तपशीलवार बोलताना राष्ट्राध्यक्ष पेझेश्कियान यांनी त्यांच्या बैठकीचे दृश्य वर्णन केले. ते म्हणाले, “मी मोजतबा यांच्यासोबत जवळपास सात ते आठ तास सलग चर्चा केली आहे. आम्ही दोघेही एकाच ठिकाणी उशांवर बसून अत्यंत शांततेत देशाच्या धोरणात्मक विषयांवर बोलत होतो. चर्चेदरम्यान आम्ही अधूनमधून एकत्र चाललोसुद्धा. जो व्यक्ती सलग आठ तास बसून इतक्या सखोल विषयांवर चर्चा करू शकतो, तो व्यक्ती आजारी कसा असू शकतो?” असा सवाल करत त्यांनी पाश्चात्य माध्यमांच्या दाव्यांची पोलखोल केली.
जागतिक घडामोडी संबंधित बातम्या वाचण्यासाठी येथे क्लिक करा : Gerbera Drone: इटली, जर्मनी आणि फ्रान्सवरही रशिया उगवणार सूड; अमेरिकन CIA संचालकांच्या मॉस्को भेटीनंतर युरोपमध्ये हाय-अलर्ट
पेझेश्कियान यांनी स्पष्ट केले की, मोजतबा यांचे हात कापले गेले आहेत किंवा ते अंथरुणाला खिळले आहेत, या केवळ खोट्या अफवा आणि प्रचाराचा भाग आहेत. “मी त्यांना स्वतः पाहिले आहे, स्पर्श केला आहे आणि त्यांच्याशी प्रदीर्घ संवाद साधला आहे,” असे ठाम प्रतिपादन त्यांनी अमेरिकन पत्रकारांसमोर केले.
पत्रकारांनी पेझेश्कियान यांना इराण अमेरिकेचे अध्यक्ष डोनाल्ड ट्रम्प यांची हत्या घडवून आणण्याचा प्रयत्न करत आहे का, असा थेट प्रश्न विचारला. त्यावर उत्तर देताना राष्ट्राध्यक्षांनी हा दावा पूर्णपणे फेटाळून लावला. “इराण कधीही अशा प्रकारच्या राजकीय हत्यांचा विचार करत नाही. आमची ती संस्कृती नाही. मात्र, अमेरिकेने नक्कीच इराणच्या सर्वोच्च नेतृत्वाला लक्ष्य करण्याचा विचार केला आणि आम्हाला युद्धात ढकलले,” असा थेट आरोप त्यांनी अमेरिकेवर केला.
त्यांनी पुढे सांगितले की, अमेरिकेने चालवलेल्या लष्करी कारवाया आणि आर्थिक निर्बंधांमुळे इराणचे मोठे नुकसान झाले आहे. भविष्यातही अमेरिका अधिक नुकसान करू शकते, याची जाणीव इराणला आहे. परंतु, कितीही कठीण परिस्थिती आली तरी इराणी जनता आणि इराणचे नेतृत्व वॉशिंग्टनच्या जुलमी धोरणांपुढे कधीही झुकणार नाही, असा इशारा पेझेश्कियान यांनी दिला.
जागतिक घडामोडी संबंधित बातम्या वाचण्यासाठी येथे क्लिक करा : UNGA : संयुक्त राष्ट्र महासभेत हाफिज सईद प्रश्नावरून भारत-पाकिस्तानमध्ये बाचाबाची; पळून गेले गेले शहबाज शरीफ, VIDEO VIRAL
उल्लेखनीय आहे की, इराणचे माजी सर्वोच्च नेते अयातुल्ला अली खामेनी यांच्या मृत्यूनंतर मार्च महिन्यात मतदानाचा अधिकार असलेल्या ५० धार्मिक नेत्यांच्या समितीने मोजतबा खामेनी यांची इराणचे नवे सर्वोच्च नेते म्हणून निवड केली होती. मात्र, सुरक्षिततेच्या कारणास्तव सर्वोच्च नेते पदाची सूत्रे हातात घेतल्यापासून मोजतबा हे सार्वजनिक व्यासपीठावर आलेले नाहीत व पूर्णपणे भूमिगत आहेत.
अमेरिकन गुप्तचर यंत्रणा (CIA) किंवा इस्रायली गुप्तचर यंत्रणा मोसाद यांना अद्याप मोजतबा यांच्या ठावठिकाण्याबद्दल कोणताही निश्चित सुगावा लागलेला नाही. असे असले तरी इराणच्या सर्व महत्त्वाच्या लष्करी, राजकीय आणि आर्थिक निर्णयांवर मोजतबा यांचीच अंतिम मोहर उमटत आहे. सोशल मीडिया आणि अधिकृत प्रसारमाध्यमांद्वारे त्यांच्या नावाने नियमित निवेदने जारी केली जातात. राष्ट्राध्यक्ष पेझेश्कियान यांच्या या वक्तव्यामुळे मोजतबा खामेनी यांच्या आरोग्याबाबत उठलेले संशयाचे वादळ आता शमण्याची शक्यता निर्माण झाली आहे.
