न्यूज एजन्सी ‘रॉयटर्स’ने इराणच्या एका वरिष्ठ अधिकाऱ्याच्या हवाल्याने दिलेल्या वृत्तानुसार, दोन मध्यस्थ देशांमार्फत अमेरिकेने तेहरानला युद्धविरामाचा प्रस्ताव पाठवला होता. मात्र, मोजतबा खामेनीई यांनी हा प्रस्ताव पूर्णपणे फेटाळून लावला. सर्वोच्च नेते म्हणून पदभार स्वीकारल्यानंतर त्यांनी घेतलेली पहिलीच बैठक अत्यंत गंभीर होती. या बैठकीत त्यांनी इस्रायल आणि अमेरिकेला ‘शत्रू’ संबोधून त्यांच्याकडून नुकसान भरपाई वसूल करण्याची शपथ घेतली.
आपल्या पहिल्या अधिकृत निवेदनात मोजतबा खामेनी यांनी केवळ इस्रायलला इशारा दिला नाही, तर आक्रमक धोरणाचे संकेतही दिले. ते म्हणाले, “युद्धात मारल्या गेलेल्या आमच्या निष्पाप नागरिकांच्या आणि दिवंगत अयातुल्ला अली खामेनीई यांच्या मृत्यूचा बदला घेणे ही आमची प्राथमिकता आहे. इराण आपल्या शत्रूंकडून नुकसान भरपाई घेऊनच राहील. जर त्यांनी नकार दिला, तर आम्ही त्यांची जगभरातील मालमत्ता जप्त करू किंवा त्यांना त्याच थराला जाऊन नष्ट करू.” शहीद झालेल्यांच्या रक्ताचा बदला घेण्यासाठी इराण पूर्ण शक्तीनिशी मैदानात उतरेल, असेही त्यांनी ठणकावून सांगितले.
खामेनीई यांचे हे आक्रमक विधान अशा वेळी आले आहे, जेव्हा त्यांच्या आरोग्याबाबत आंतरराष्ट्रीय स्तरावर अनेक तर्कवितर्क लावले जात आहेत. कुवेती वृत्तपत्र ‘अल-जरीदा’ने दावा केला आहे की, २८ फेब्रुवारी रोजी झालेल्या हवाई हल्ल्यात मोजतबा खामेनीई गंभीर जखमी झाले आहेत. रशियाचे राष्ट्राध्यक्ष व्लादिमीर पुतिन यांनी स्वतः फोन करून वैद्यकीय मदतीची ऑफर दिली होती, ज्यानंतर एका रशियन लष्करी विमानाने त्यांना उपचारासाठी मॉस्कोला नेण्यात आले आहे.
दुसरीकडे, इस्रायलने मोजतबा खामेनीई यांच्या प्रकृतीबाबत सातत्याने संशय व्यक्त केला आहे. मोजतबा हे कोमामध्ये असल्याचा दावा काही इस्रायली माध्यमांनी केला होता. इस्रायलच्या परराष्ट्र मंत्र्यांनी मंगळवारी दिलेल्या निवेदनात म्हटले की, “अनेक दिवसांपासून कोणालाही मोजतबा खामेनीई यांचा चेहरा दिसलेला नाही. आपल्या सर्वोच्च नेत्याची स्थिती स्पष्ट न करणे, ही इराणसाठी शरमेची बाब आहे.” या सर्व दाव्यांच्या पार्श्वभूमीवर मोजतबा खामेनीई यांचे आलेले आक्रमक पत्रक हे केवळ कागदी इशारा आहे की इराण खरोखर मोठ्या युद्धाच्या तयारीत आहे, याकडे आता जगाचे लक्ष लागले आहे.
