Location for Rs 500 and mobile records for Rs 2000, big data leak in Pakistan, know the whole case
SIM data sale Pakistan : पाकिस्तानमधून एक धक्कादायक आणि चिंताजनक माहिती समोर आली आहे. आजच्या डिजिटल युगात डेटा म्हणजे “नवे तेल” मानले जाते. पण हेच तेल जर काळ्या बाजारात विकले गेले, तर त्याचे परिणाम किती गंभीर असू शकतात याचा प्रत्यय पाकिस्तानातील नागरिकांना आणि सरकारला आला आहे. लाहोर, कराची, इस्लामाबादसह संपूर्ण पाकिस्तानात मोबाईल फोन वापरकर्त्यांची खासगी माहिती हॅक करून इंटरनेटवर विक्रीसाठी उपलब्ध केली जात आहे. ही विक्री काही लाखो रुपयांमध्ये नाही, तर अगदी किरकोळ दराने होत आहे. इतकेच नाही, तर देशातील अनेक वरिष्ठ मंत्री आणि सरकारी अधिकाऱ्यांचा डेटा देखील या लीकच्या जाळ्यात अडकला आहे.
पाकिस्तानी वृत्तपत्र डॉनच्या अहवालानुसार, मोबाईल सिममधून नागरिकांची माहिती चोरीला जात असून ती काळ्या बाजारात सहज मिळते. वापरकर्त्याच्या मोबाईलचे लोकेशन फक्त ५०० रुपयांत विकले जात आहे. तर मोबाईलमधील संपूर्ण माहिती कॉल डिटेल्स, मेसेजेस, सोशल मीडिया वापर, कॉन्टॅक्ट्स यासाठी केवळ २००० रुपये आकारले जात आहेत. इतकेच नव्हे तर परदेश प्रवासाशी संबंधित माहिती हवी असल्यास त्यासाठी ५००० रुपये मोजावे लागतात. या माहितीच्या दरामध्ये तिचे महत्त्व लक्षात घेऊन फरक ठेवण्यात आला आहे. म्हणजे ज्याची माहिती जितकी संवेदनशील, तितका दर जास्त.
जागतिक घडामोडी संबंधित बातम्या वाचण्यासाठी येथे क्लिक करा : mRNA vaccine cancer : रशियाची मोठी घोषणा कॅन्सरवर प्रभावी ठरणारी लस लवकरच बाजारात आणणार; वापरासाठी सज्ज
पाकिस्तानमध्ये सुमारे १८ कोटींहून अधिक मोबाईल वापरकर्ते आहेत. तज्ज्ञांच्या मते, यापैकी बहुतांश नागरिकांचा डेटा हॅकर्सच्या हाती गेला आहे. यामुळे केवळ वैयक्तिक माहितीच नव्हे, तर आर्थिक व्यवहार, बँकिंग माहिती आणि सोशल मीडिया सुरक्षेलाही मोठा धोका निर्माण झाला आहे. हा लीक फक्त पाकिस्तानपुरता मर्यादित नाही, तर तो जागतिक डेटा उल्लंघनाचा एक भाग असल्याचे सांगितले जात आहे. म्हणजेच, या माहितीचा वापर करून सायबर गुन्हेगार केवळ ब्लॅकमेलच नव्हे तर आंतरराष्ट्रीय हेरगिरी, दहशतवादी कारवाया किंवा आर्थिक फसवणुकीसाठीही करू शकतात.
या घोटाळ्याने पाकिस्तान सरकारचीही झोप उडवली आहे. अनेक वरिष्ठ मंत्र्यांचा, गृह मंत्रालयातील अधिकाऱ्यांचा व संवेदनशील विभागांमध्ये काम करणाऱ्या व्यक्तींचा डेटा या लीकमध्ये समोर आल्याचे वृत्त आहे. ही बाब अत्यंत धोकादायक मानली जात आहे, कारण यामुळे पाकिस्तानच्या राष्ट्रीय सुरक्षेलाच मोठा धोका निर्माण होऊ शकतो.
पाकिस्तानचे गृहमंत्री मोहसिन नक्वी यांनी या गंभीर प्रकरणाची तातडीने दखल घेतली आहे. त्यांनी राष्ट्रीय सायबर गुन्हे अन्वेषण संस्था (National Cyber Crime Investigation Agency) यांच्याकडे या प्रकरणाची चौकशी सोपवली आहे. गृह मंत्रालयाने एक अधिकृत प्रेस रिलीज जारी करून सांगितले की, चौकशीसाठी दोन आठवड्यांचा कालावधी दिला गेला आहे. या चौकशीनंतर नेमके कोणत्या स्तरावरून डेटा गळती झाली, कोणत्या अधिकाऱ्यांच्या हलगर्जीपणामुळे हे घडले आणि हॅकर्सपर्यंत डेटा कसा पोहोचला, याचा उलगडा होईल. दोषींवर कठोर कारवाई केली जाईल, असे सरकारने स्पष्ट केले आहे.
या घटनेतून एक मोठा धडा मिळतो आपण कितीही सावध असलो तरीही आपली वैयक्तिक माहिती डिजिटल माध्यमांत सुरक्षित आहेच, असे समजणे चुकीचे आहे. सायबर तज्ज्ञ नागरिकांना पासवर्ड बदलण्याचा आणि तो अधिक मजबूत ठेवण्याचा सल्ला देत आहेत. तसेच संशयास्पद लिंक्स, ॲप्स व अनोळखी नंबरवरून येणाऱ्या कॉल्सपासून सावध राहण्याची सूचना करण्यात आली आहे.
या मोठ्या डेटा लीकनंतर पाकिस्तानातील नागरिकांमध्ये संताप व भीतीचे वातावरण आहे. “जर मंत्र्यांचा आणि सरकारी अधिकाऱ्यांचा डेटा सुरक्षित नाही, तर आमचा डेटा कसा सुरक्षित राहील?” असा प्रश्न लोक विचारत आहेत. पाकिस्तानमध्ये याआधीही अनेकदा डेटा चोरीची प्रकरणे समोर आली आहेत, मात्र एवढ्या मोठ्या प्रमाणात, इतक्या स्वस्त दरात माहितीची विक्री होणे ही प्रथमच घडलेली बाब आहे.
जागतिक घडामोडी संबंधित बातम्या वाचण्यासाठी येथे क्लिक करा : Gujarati At Target : अमेरिकेत टार्गेट स्टोअरमध्ये भारतीय महिला पकडली; चौकशीत उघड झाले धक्कादायक सत्य
पाकिस्तानातील हा डेटा लीक केवळ एका देशाचा प्रश्न नाही, तर संपूर्ण जगासाठी इशारा आहे. डेटा हीच खरी संपत्ती असल्याच्या या काळात त्याचे संरक्षण करणे ही प्रत्येक सरकार आणि नागरिकाची जबाबदारी आहे. अन्यथा “५०० रुपयांत लोकेशन” आणि “२००० रुपयांत संपूर्ण मोबाईल डेटा” असे प्रकार पुन्हा पुन्हा घडत राहतील आणि त्याचे परिणाम घातक ठरतील.
.png "Videos"){kind=small}
