फोटो सौजन्य सोशल मीडिया
उझमा खान आणि नोरीन नियाझी यांना लाहोरमधील कोट लखपत कारागृहात ठेवण्यात आले होते. सप्टेंबर महिन्यात त्यांना ताब्यात घेण्यात आले होते. जवळपास ५३ दिवस तुरुंगात राहिल्यानंतर गुरुवारी, १२ नोव्हेंबर रोजी त्यांची सुटका झाली.
त्यांच्या वकिलांनी सोशल मीडियावर माहिती देताना दोन्ही बहिणी सुखरूप घरी पोहोचल्याचे सांगितले. पंजाब सरकारने त्यांच्या संयुक्त नजरकैदेचा आदेश मागे घेतल्यानंतर सुटकेचा मार्ग मोकळा झाला. या निर्णयामुळे इम्रान खान यांच्या कुटुंबाला काहीसा दिलासा मिळाला आहे.
इम्रान खान यांच्या सुटकेची मागणी करत PTI पक्षाने इस्लामाबादमध्ये आंदोलनाची तयारी केली होती. २७ सप्टेंबर रोजी प्रस्तावित असलेल्या मोर्चाच्या पार्श्वभूमीवर सरकारने त्यांच्या बहिणींना ताब्यात घेतले होते. कायदा आणि सुव्यवस्थेला धोका निर्माण होऊ शकतो, असे कारण प्रशासनाकडून देण्यात आले होते.
पंजाब मेंटेनन्स ऑफ पब्लिक ऑर्डर कायद्यांतर्गत प्रतिबंधात्मक कारवाई करण्यात आली होती. मात्र, इम्रान खान यांच्या कुटुंबीयांनी आणि PTI ने या कारवाईवर आक्षेप घेतला होता. त्यांच्या मते, आंदोलनाच्या पार्श्वभूमीवर कुटुंबीयांना लक्ष्य करण्यात आले.
Breaking News : चीनमध्ये वजन कमी करण्याच्या गोळीला मंजुरी; ‘एली लिली’ ठरली पहिली कंपनी
दोन बहिणींची सुटका झाली असली तरी इम्रान खान यांची मोठी बहीण अलीमा खान अद्याप तुरुंगात आहे. PTI नेत्यांनी तिच्या सुटकेचीही मागणी केली आहे. दरम्यान, इम्रान खान यांच्या प्रकृतीबाबतही चिंता व्यक्त केली जात आहे. ११ नोव्हेंबर रोजी त्यांना डोळ्यांच्या उपचारांसाठी इस्लामाबादमधील रुग्णालयात नेण्यात आले होते.
त्यांना रक्तदाब आणि उजव्या डोळ्याच्या त्रासाचाही सामना करावा लागत असल्याचे त्यांच्या वकिलांनी सांगितले. २०२३ पासून तुरुंगात असलेल्या इम्रान खान यांच्यावर विविध गुन्ह्यांशी संबंधित खटले सुरू आहेत. त्यांच्यावरील आरोप राजकीय हेतूने प्रेरित असल्याचा दावा ते आणि त्यांचा पक्ष करत आहेत. त्यामुळे दोन बहिणींच्या सुटकेनंतरही पाकिस्तानमधील राजकीय संघर्ष संपलेला नाही.
.png "Videos"){kind=small}
