Russia Ukraine War: युक्रेनच्या शहरांवर 500 रशियन ड्रोनचा वर्षाव; 90 मिनिटांत शहरांचे मोठे नुकसान, 9 ठार

Russia Ukraine War : रशियाने 500 हून अधिक ड्रोन वापरून युक्रेनवर मोठा हल्ला केला, ज्यात नऊ नागरिक ठार झाले आणि निवासी क्षेत्रे, किराणा दुकाने व पायाभूत सुविधांचे मोठे नुकसान झाले.

• ५०० हून अधिक ड्रोनचा वापर
• नागरी भागांवर भीषण हल्ले
• आर्थिक पायाभूत सुविधा उद्ध्वस्त

रशिया आणि युक्रेन यांच्यातील युद्ध (Russia Ukraine War) चार वर्षांनंतरही थंडावण्याचे नाव घेत नाही आहे. उलटपक्षी, रशियाने आपल्या आक्रमकतेची तीव्रता आणखी वाढवली आहे. रशियन सैन्याने युक्रेनच्या अनेक प्रमुख प्रदेशांवर एकाच वेळी अभूतपूर्व असा हवाई हल्ला चढवला. युक्रेनियन अधिकाऱ्यांनी दिलेल्या माहितीनुसार, अवघ्या ९० मिनिटांच्या कालावधीत युक्रेनच्या वेगवेगळ्या शहरांना लक्ष्य करत तब्बल ५०० हून अधिक ड्रोन डागण्यात आले. या भीषण हल्ल्यात कमीत कमी ९ नागरिकांचा जागीच मृत्यू झाला असून १२ हून अधिक जण गंभीर जखमी झाले आहेत. या हल्ल्यांमुळे अनेक निवासी इमारती, व्यावसायिक दुकाने आणि देशाच्या पायाभूत सुविधांचे अतोनात नुकसान झाले आहे.

युक्रेनचे राष्ट्राध्यक्ष वोलोडिमिर झेलेन्स्की यांनी या भीषण आक्रमणावर सोशल मीडियाद्वारे आपली संतप्त प्रतिक्रिया व्यक्त केली आहे. त्यांनी स्पष्ट केले की, रशियाने एकाच दिवसात युक्रेनवर ५०० हून अधिक ‘शाहेद’ आणि इतर लढाऊ ड्रोन डागले आहेत. युद्धभूमीवर थेट यश मिळत नसल्याने आता रशियन सैन्य नागरी वस्त्या आणि युक्रेनच्या अर्थव्यवस्थेला लक्ष्य करत आहे. युक्रेनियन नागरिक ज्या तळांच्या आणि सुविधांच्या आधारे युद्धाच्या काळात तग धरून आहेत, ते सर्व आर्थिक केंद्र नष्ट करणे हाच रशियाचा एकमेव कुटिल डाव असल्याचा गंभीर आरोप झेलेन्स्की यांनी केला आहे.

जागतिक घडामोडी संबंधित बातम्या वाचण्यासाठी येथे क्लिक करा : BRICS Summit 2026 : भारत मंडपम येथे जागतिक नेत्यांचे भव्य फोटोसेशन; पंतप्रधान नरेंद्र मोदींनी केले परदेशी पाहुण्यांचे स्वागत

सामान्यांच्या वाहनांवर आणि दुकानांवर थेट हल्ले

आघाडीचे प्रमुख शहर असलेल्या क्रामटॉर्स्कच्या नगर परिषदेने दिलेल्या माहितीनुसार, रशियन सैन्याने लष्करी तळांऐवजी थेट सामान्य नागरिकांना आपले शिकार बनवले आहे. क्रामटॉर्स्क शहरात अवघ्या ९० मिनिटांच्या अंतराने तीन वेगवेगळ्या ठिकाणी नागरी वाहनांवर ड्रोन हल्ले करण्यात आले. यात रस्त्यावरून जाणाऱ्या तसेच दुकानाबाहेर उभ्या असलेल्या वाहनांना लक्ष्य केले गेले. या हल्ल्यात ३ जणांचा मृत्यू झाला तर ४ जण गंभीर जखमी झाले. स्थानिक प्रशासनाने संताप व्यक्त करत सांगितले की, रशिया आता युद्धभूमी सोडुन दैनंदिन कामासाठी बाहेर पडणाऱ्या निष्पाप नागरिकांच्या गाड्यांवर थेट हल्ले करत आहे.

Usmanov and Fridman are exactly the kind of Russian business figures who need to find the courage to take concrete steps against the war. This is exactly the kind of Russian economy that should not be given additional opportunities while the Ukrainian economy is suffering from… pic.twitter.com/uagcNm8Abe — Volodymyr Zelenskyy / Володимир Зеленський (@ZelenskyyUa) September 12, 2026

credit – social media and Twitter

दुसरीकडे, झिटोमिर प्रदेशातील झ्वियाहेल शहरात एका भरगच्च किराणा दुकानावर रशियन ड्रोनने थेट हल्ला केला. या भीषण स्फोटात दुकानातील २ जणांचा जागीच मृत्यू झाला. याशिवाय परिसरातील दोन पेट्रोल पंप आणि एका परदेशी गुंतवणुकीच्या व्यावसायिक इमारतीवरही ड्रोन आदळल्याने मोठे नुकसान झाले आहे.

झापोरिझिया, ओडेसा आणि क्रिव्हि रिहमध्ये आगीचे तांडव

झापोरिझिया प्रदेशाचे गव्हर्नर इव्हान फेडोरोव्ह यांनी दिलेल्या माहितीनुसार, त्यांच्या भागात झालेल्या ड्रोन हल्ल्यात २ नागरिक ठार झाले असून ११ जण गंभीर जखमी झाले आहेत. राष्ट्राध्यक्ष झेलेन्स्की यांचे मूळ गाव असलेल्या ‘क्रिव्हि रिह’ या शहरालाही रशियाने रात्रीच्या वेळी निशाणा बनवले. क्रिव्हि रिहवर क्षेपणास्त्रे आणि ड्रोनच्या साह्याने एकाच वेळी मारा करण्यात आला, ज्यात २ जणांचा मृत्यू झाला.

काळ्या समुद्राच्या किनाऱ्यावर वसलेल्या ओडेसा या महत्त्वपूर्ण बंदर शहरावरही शनिवारी रात्रीपासून सलग हल्ले सुरूच होते. ओडेसाचे गव्हर्नर ओलेह किपर यांनी सांगितले की, या हल्ल्यांमध्ये निवासी उंच इमारतींचे वरचे मजले पूर्णपणे उद्ध्वस्त झाले असून तब्बल ४० नागरिक जखमी झाले आहेत. जखमींना तातडीने स्थानिक रुग्णालयात दाखल करण्यात आले आहे.

जागतिक घडामोडी संबंधित बातम्या वाचण्यासाठी येथे क्लिक करा : Houthi AI : हुथी जोमात, AI कोमात! एआय वापरून पहिले बनवली मिसाइल आणि आता चक्क येमेनी लष्कर कमांडरच्या आवाजात…

डोनेत्स्क आणि मोल्दोव्हा सीमेवर ताणतणाव

युक्रेनियन हल्ल्यांचा दावा करत रशियन नियंत्रणाखाली असलेल्या पूर्व डोनेत्स्क भागात युक्रेनच्या ड्रोन हल्ल्यात ३ जण मारले गेल्याचा दावा रशियन माध्यमांनी केला आहे. या युद्धाची झळ आता शेजारील देशांनाही बसू लागली आहे. युक्रेनच्या सीमेजवळ रशियन ड्रोनचा धोका निर्माण झाल्यानंतर मोल्दोव्हा या देशाने सुरक्षेचा उपाय म्हणून आपली संपूर्ण हवाई हद्द आणि ७ प्रमुख सीमा तपासणी नाके (Border Checkpoints) सुमारे एका तासासाठी पूर्णपणे बंद केले होते. एकंदरीत, रशियाच्या या भीषण ५०० ड्रोनच्या हल्ल्यामुळे युक्रेनमधील परिस्थिती अत्यंत चिंताजनक बनली असून आंतरराष्ट्रीय स्तरावर या हल्ल्याचा तीव्र निषेध केला जात आहे.