US Temple Attack : अमेरिकेतील हिंदू मंदिराला लक्ष्य करण्याचा कट उधळला; घटनेनंतर परराष्ट्र मंत्रालय अन् एफबीआय अ‍ॅक्शन मोडमध्ये

US Temple Attack : अमेरिकेतील एका हिंदू मंदिरावर हल्ला करण्याच्या कथित कटाच्या पार्श्वभूमीवर, खासदार राजा कृष्णमूर्ती यांनी सोशल मीडियावर पसरणाऱ्या भारतविरोधी द्वेषाविरोधात कठोर कारवाईची मागणी केली आहे.

• हिंदू मंदिरावर गोळीबाराचा कट उधळला
• खासदार राजा कृष्णमूर्ती आक्रमक
• भारताची चिंता आणि एफबीआय चौकशीची मागणी

अमेरिकेतील इलिनॉय राज्यामध्ये वसलेल्या शिकागोजवळील अ‍ॅरोरा येथील प्रसिद्ध श्री व्यंकटेश्वर मंदिरावर (US Temple Attack) एका १९ वर्षीय माथेफिरू तरुणाने सामूहिक गोळीबाराचा अत्यंत भयानक कट रचल्याचा धक्कादायक प्रकार उघडकीस आला आहे. संशयित आरोपी मंदिराच्या परिसरात शस्त्र घेऊन पोहोचला होता, परंतु सुदैवाने ऐनवेळी त्याची बंदूक अडकल्याने (Jam झाल्याने) मोठी दुर्घटना टळली. या घटनेनंतर अमेरिकन पोलिसांनी आरोपीला तत्काळ अटक केली असून, १४ ऑक्टोबर रोजी त्याला न्यायालयात हजर करण्यात आले. त्याच्यावर दहशतवादी धमक्या देणे आणि बेकायदेशीरपणे घातक शस्त्र बाळगणे यांसारख्या गंभीर कलमांखाली गुन्हे दाखल करण्यात आले आहेत.

भारतीय-अमेरिकन खासदार राजा कृष्णमूर्ती यांनी टेक कंपन्या अन् ऑनलाइन द्वेषाविरोधात पुकारले रान!

या घटनेमुळे संपूर्ण भारतीय-अमेरिकन समुदाय आणि प्रवासी भारतीयांमध्ये भीतीचे व चिंतेचे वातावरण पसरले आहे. अमेरिकन संसदेचे (काँग्रेस) भारतीय-अमेरिकन सदस्य राजा कृष्णमूर्ती यांनी या घटनेची गंभीर दखल घेत सोशल मीडियावर पसरणाऱ्या भारतविरोधी आणि हिंदूविरोधी द्वेषाविरोधात कडक कायदेशीर पावले उचलण्याची जोरदार मागणी केली आहे. इंटरनेटवर पसरवली जाणारी द्वेषपूर्ण सामग्री तरुणांना कट्टरपंथी बनवत असून, हा संपूर्ण समाजासाठी मोठा धोका निर्माण झाला असल्याचे त्यांनी स्पष्ट केले.

सोशल मीडियावरील कट्टरतावाद आणि २४० टक्क्यांहून अधिक वाढलेला द्वेष

खासदार राजा कृष्णमूर्ती यांनी या प्रकरणाचा सखोल आढावा घेताना सांगितले की, आरोपी तरुण त्याच्या सभोवतालचे वातावरण आणि विशेषतः सोशल मीडियावरील चिथावणीखोर मजकुरामुळे अत्यंत कट्टरपंथी बनला होता. तपास अहवालानुसार, आरोपीने आपल्या एका सहकाऱ्यासोबत भारतीयांवर हल्ला करण्याबाबत आणि त्यांना मारण्याबाबत आधीच चर्चा केली होती.

जागतिक घडामोडी संबंधित बातम्या वाचण्यासाठी येथे क्लिक करा : France Protest : फ्रान्समध्ये वाढत्या महागाईविरोधात आंदोलनाने घेतले उग्र रूप; 8 लाख नागरिक रस्त्यावर; 1,200 हून अधिक जणांना अटक

कृष्णमूर्ती यांनी विविध संशोधन अहवालांचा हवाला देत धक्कादायक माहिती उघड केली. गेल्या काही काळात सोशल मीडियावर दक्षिण आशियाई समुदायाविरुद्ध (भारतीय, हिंदू, शीख इत्यादी) द्वेषपूर्ण पोस्ट्स आणि मजकुरामध्ये तब्बल २४० टक्क्यांहून अधिक वाढ झाली आहे. त्यांनी बड्या टेक आणि सोशल मीडिया कंपन्यांवर थेट आरोप केला की, या कंपन्या द्वेषयुक्त मजकुरावरून मिळणाऱ्या ट्रॅफिकमधून मोठा नफा कमावतात, परंतु अशा धोकादायक कंटेंटवर नियंत्रण मिळवण्यात त्या पूर्णपणे अपयशी ठरल्या आहेत. त्यामुळे या कंपन्यांना उत्तरदायी ठरवण्यासाठी कायदेशीर संरक्षणाच्या तरतुदींमध्ये तात्काळ सुधारणा करण्याची गरज त्यांनी अधोरेखित केली.

भारताची तीव्र चिंता आणि एफबीआय (FBI) चौकशीची मागणी

या घटनेचे पडसाद भारतातही उमटले असून, भारताच्या परराष्ट्र मंत्रालयाचे प्रवक्ते रणधीर जयस्वाल यांनी या प्रकरणावर तीव्र चिंता व्यक्त केली आहे. अमेरिकेतील भारतीय नागरिक, हिंदू धर्मीय आणि इतर अल्पसंख्याक समुदायांच्या धार्मिक स्थळांची व प्राणाची सुरक्षा सुनिश्चित करण्याचे आवाहन भारत सरकारने अमेरिकन प्रशासनाला केले आहे.

US Lawmaker Raja Krishnamoorthi @CongressmanRaja speaks about attempt to attack a Hindu temple in Illinois. Says, “shooter hated Indians..the explosive growth towards India-Americans is astounding”. Points he was told “take your curry & go home” Vdo csty: Cook County Govt https://t.co/EszsgpRCv1 — Sidhant Sibal (@sidhant) October 18, 2026

credit – social media and Twitter

जागतिक घडामोडी संबंधित बातम्या वाचण्यासाठी येथे क्लिक करा : Italy Protests: No Meloni Day! फ्रान्स, स्पेननंतर इटलीतही उडाला आंदोलनाचा भडका; PM मेलोनी यांची आक्रमक भूमिका

दरम्यान, अमेरिकन काँग्रेसमधील ‘इंडिया कॉकस’ने या प्रकरणी अत्यंत आक्रमक भूमिका घेतली आहे. इंडिया कॉकसच्या खासदारांनी फेडरल ब्युरो ऑफ इन्व्हेस्टिगेशन (FBI) आणि अमेरिकेच्या न्याय विभागाला या प्रकरणाची आंतरराष्ट्रीय किंवा स्थानिक स्तरावरील ‘द्वेषपूर्ण गुन्हा’ (Hate Crime) म्हणून सखोल चौकशी करण्याची विनंती केली आहे. या कटामागे आरोपीला ऑनलाइन किंवा ऑफलाइन माध्यमातून कोणी प्रोत्साहन किंवा मदत दिली होती का, याचा शोध घेणे आवश्यक असल्याचे त्यांनी म्हटले आहे. यासोबतच, हिंदू मंदिरे, शीख गुरुद्वारे आणि इतर दक्षिण आशियाई धार्मिक स्थळांभोवती सुरक्षा व्यवस्था तातडीने वाढवण्याची मागणी करण्यात आली आहे.

एकजुटीचे आणि सर्वसमावेशकतेचे आवाहन

आपल्या वक्तव्याचा विस्तार करताना खासदार राजा कृष्णमूर्ती यांनी केवळ एकाच समुदायापुरते मर्यादित न राहता सर्व प्रकारच्या द्वेषाविरोधात एकत्र येण्याचे आवाहन केले. अमेरिकेतील राजकीय आणि सामाजिक नेत्यांनी भारतीय, हिंदू, मुस्लिम, ज्यू, शीख, कृष्णवर्णीय, हिस्पॅनिक, महिला आणि LGBTQ समुदायाविरुद्ध होणाऱ्या सर्व प्रकारच्या द्वेषपूर्ण घटनांचा एका आवाजात, कठोरपणे निषेध केला पाहिजे, असे ते म्हणाले. जागतिक स्तरावर अशा प्रकारच्या घटना रोखण्यासाठी सोशल मीडियाचे नियमन आणि अल्पसंख्याक धार्मिक स्थळांची सुरक्षा हा आता अत्यंत संवेदनशील आणि महत्त्वाचा मुद्दा बनला आहे.