मोठी बातमी ! अमेरिका आणि इराण यांच्यातील युद्ध संपणार? इराणचे राष्ट्राध्यक्ष पेझेशकियान म्हणाले…

इराण आता मजबूत आणि सन्मानजनक स्थितीत आहे. संपूर्ण जग इराणच्या विजयाला मान्यता देत आहे. अमेरिकेने इराणी शाळा, रुग्णालये आणि पायाभूत सुविधांवर हल्ला करून सर्व नियमांचे उल्लंघन केले आहे.

तेहरान : इराण आणि अमेरिका या दोन्ही देशांतील संबंध ताणले गेले आहेत. अमेरिकेकडून इराणवर वारंवार हल्ले केले जात आहेत. त्यातच अमेरिकेसोबत अनेक महिन्यांपासून सुरू असलेल्या युद्धाच्या पार्श्वभूमीवर इराणचे राष्ट्राध्यक्ष मसूद पेझेशकियान यांनी संघर्ष संपवण्याचे आवाहन केले आहे. शुक्रवारी झालेल्या बैठकीत त्यांनी सांगितले की, इराण सध्या मजबूत आणि सन्मानजनक स्थितीत आहे, त्यामुळे आताच युद्ध संपवणे अधिक चांगले आहे. मात्र, राजनैतिक चर्चा अजूनही थांबलेल्या आहेत.

इराण आणि अमेरिका या दोन्ही देशांतील संबंध अद्याप ताणले गेल्याचे दिसून येत आहे. त्यातच पेझेशकियान यांनी सांगितले की, ‘इराण आता मजबूत आणि सन्मानजनक स्थितीत आहे. संपूर्ण जग इराणच्या विजयाला मान्यता देत आहे. अमेरिकेने इराणी शाळा, रुग्णालये आणि पायाभूत सुविधांवर हल्ला करून सर्व नियमांचे उल्लंघन केले आहे. अमेरिकेला जगभरातून टीकेला सामोरे जावे लागत आहे. पेझेशकियान यांचे अध्यक्षीय अधिकार अंतिमतः इराणचे सर्वोच्च नेते, मोजतबा खामेनी यांच्या नियंत्रणाखाली येतात. त्यांनी जूनमध्ये अमेरिकेसोबत झालेल्या सामंजस्य कराराचे समर्थनही केले.

इराणच्या संसदेतील कट्टरपंथी नेत्यांनी त्यांच्या सरकारवर अमेरिकेला सवलती दिल्याचा आरोप केला होता. पेझेश्कियान यांनी सांगितले की, करारामध्ये अशी एकही तरतूद नाही जिला शरणागती मानले जाऊ शकेल. त्यांच्या मते, त्यात केलेली सर्व वचनबद्धता दुसऱ्या पक्षाशी संबंधित आहे.

इराणी लष्कराचा प्रत्युत्तराचा इशारा

सामंजस्य कराराची मुदत संपल्यानंतर काही दिवसांनी, इराणच्या लष्करी नेतृत्वाने सांगितले की, देश कोणत्याही नवीन धोक्याला प्रत्युत्तर देण्यासाठी सज्ज आहे. इराणी माध्यमांनुसार, सशस्त्र दलांचे चीफ ऑफ स्टाफ, मेजर जनरल अली अब्दोल्लाही यांनी सांगितले की, इराणची भूदल, नौदल, हवाई दल, हवाई संरक्षण आणि सायबर क्षमता पूर्णपणे सज्ज आहेत. शत्रूकडून नवीन धोका निर्माण झाल्यास, इराणी लष्कर जोरदार आणि विनाशकारी प्रत्युत्तर देईल.

होर्मुझच्या सामुद्रधुनीवरही तणाव कायम

ओमान आणि इराणच्या परराष्ट्र मंत्र्यांनी शुक्रवारी फोनवर संवाद साधला. ओमानच्या सरकारी वृत्तसंस्थेनुसार, संवाद आणि वाटाघाटी पुन्हा सुरू करण्यासाठी आवश्यक परिस्थिती निर्माण करण्याच्या मार्गांवर चर्चा झाली. होर्मुझच्या सामुद्रधुनीतील नौकानयनाशी संबंधित घडामोडींवरही चर्चा झाली. तेहरानने या महत्त्वाच्या जलमार्गावर अंशतः नाकेबंदी कायम ठेवली आहे, तर अमेरिका नौदलाद्वारे प्रति-नाकेबंदी करत आहे.

अमेरिकेचे राष्ट्राध्यक्ष डोनाल्ड ट्रम्प यांनी केला मोठा दावा; म्हणाले, ‘होर्मुझवर आमचं संपूर्ण नियंत्रण…’