गुप्त डिझाईन, कडक सुरक्षा! रस्त्यांवर ‘काळ्या-पांढऱ्या’ स्टीकर्समध्ये फिरणाऱ्या या गाड्या तुम्ही पहिल्यात का? जाणून घ्या सत्य

नवीन गाड्यांचे डिझाईन आणि आकार लपवण्यासाठी कंपन्या 'कॅमफ्लाज' काळ्या-पांढऱ्या स्टिकर्सचे ऑप्टिकल इल्युजन तंत्रज्ञान वापरून कॅमेऱ्यांना चकवा देतात. तसेच, या गाड्या बाजारात आणण्यापूर्वी त्यांची अत्यंत गुप्त ट्रॅक्सवर आणि बर्फाळ किंवा वाळवंटी अशा टोकाच्या हवामानात कडक चाचणी घेतली जाते.

कोणतीही नवीन गाडी जेव्हा शोरूममध्ये दिमाखात उभी राहते, तेव्हा आपल्याला फक्त तिचे चकचकीत रूप दिसते. पण त्याआधी कित्येक वर्षे ती गाडी जगाच्या नजरेपासून दूर, अत्यंत गुप्तपणे एका कठीण प्रवासातून गेलेली असते. सोशल मीडिया आणि कॅमेऱ्यांच्या आजच्या युगात नवीन गाडीचे डिझाईन लीक होऊ नये म्हणून ऑटोमोबाईल कंपन्या कोट्यवधी रुपये खर्च करून ‘सिक्रेट टेस्टिंग’ करतात.

रस्त्यांवरून जाणाऱ्या काही गाड्यांवर तुम्ही काळ्या-पांढऱ्या रंगाचे विचित्र, वेडेवाकडे स्टिकर्स लावलेले नक्कीच पाहिले असेल. चला जाणून घेऊया या ‘गुप्त’ कारखान्यांचे आणि गाड्या लपवण्याच्या या अनोख्या तंत्राचे रहस्य.

Maruti मोठ्या धमाक्यासाठी सज्ज! स्मार्ट फीचर्स आणि हायब्रिड इंजिनसह …

१. गाड्यांवर काळ्या-पांढऱ्या रंगाचे विचित्र स्टिकर्स का असतात?

या विचित्र पॅटर्नला ऑटोमोबाईल भाषेत ‘कॅमफ्लाज’ (Camouflage) म्हटले जाते. कंपन्यांना त्यांच्या नवीन गाडीचे फीचर्स आणि डिझाईन प्रतिस्पर्धी कंपन्यांपासून आणि ऑटो-उत्साही लोकांपासून लपवायचे असते. पण यासाठी फक्त काळा-पांढरा रंगच का वापरतात?

• कॅमेऱ्याला चकवा देणे: हे स्टिकर्स सहसा ‘झेब्रा’ पॅटर्न किंवा वेगवेगळ्या भौमितिक आकारांचे असतात. जेव्हा एखादा फोटोग्राफर या चालत्या गाडीचा फोटो काढण्याचा प्रयत्न करतो, तेव्हा कॅमेऱ्याचे ऑटो-फोकस तंत्रज्ञान गोंधळात पडते. यामुळे गाडीच्या खऱ्या कडा, कर्व्स आणि बॉडी लाईन्स फोटोमध्ये स्पष्ट दिसत नाहीत.
• आकार लपवणे (Optical Illusion): हे पॅटर्न एक प्रकारचे मानवी डोळ्यांसाठी ‘ऑप्टिकल इल्युजन’ तयार करतात. गाडी लांब आहे की छोटी, तिचा आकार नेमका कसा आहे, हे दुरून ओळखणे अशक्य होते.
• खोटे पार्ट्स जोडणे: अनेकदा कंपन्या केवळ स्टिकर्स लावून थांबत नाहीत, तर गाडीचा खरा आकार लपवण्यासाठी बॉडीवर फोम किंवा प्लास्टिकचे खोटे पॅड्स लावतात, जेणेकरून गाडीचा खरा लूक पूर्णपणे बदलून जातो.

Mahindra Scorpio N Facelift ची टेस्टिंग सुरु! मात्र ‘हा’ खास फिचर …

२. ‘टोकाचे हवामान‘ आणि गुप्त चाचणी

गाडीचे डिझाईन लपवणे हा एक भाग झाला, पण ती गाडी प्रत्येक वातावरणात टिकेल की नाही, हे पाहण्यासाठी कंपन्या जगातील सर्वात दुर्गम आणि गुप्त ठिकाणी ‘एक्स्ट्रीम वेदर टेस्टिंग’ करतात.

• अत्यंत बर्फाळ प्रदेश (-४० अंश सेल्सिअस): स्वीडनचे ‘आर्विजदौर’ किंवा अलास्कासारख्या ठिकाणी कंपन्यांचे स्वतःचे गुप्त बर्फाळ ट्रॅक आहेत. इथे गोठलेल्या तलावांवर गाड्या चालवून त्यांचे ‘अँटी-लॉक ब्रेकिंग सिस्टम’ (ABS), ट्रॅक्शन कंट्रोल आणि बॅटरीची क्षमता तपासली जाते. इतक्या कडक थंडीत गाडीचे इंजिन किंवा पार्ट्स गोठतात का, हे पाहिले जाते.
• धगधगते वाळवंत (५० अंश सेल्सिअसपेक्षा जास्त): अमेरिकेतील ‘डेथ व्हॅली’ किंवा दुबईच्या वाळवंटात गाड्यांची उन्हाळ्यातील चाचणी होते. प्रचंड उष्णतेमध्ये गाडीचे इंजिन ओव्हरहीट होते का, एसी केबिनला थंड ठेवू शकतो का, आणि प्लास्टिकचे पार्ट्स वितळतात का, याची परीक्षा इथे घेतली जाते.

३. ‘सिक्रेट‘ टेस्टिंग फॅसिलिटीज

जगातील मोठ्या कंपन्यांकडे उदा. मर्सिडीज, बीएमडब्ल्यू, टाटा, महिंद्रा स्वतःचे वैयक्तिक आणि हाय-सिक्युरिटी टेस्टिंग ट्रॅक्स आहेत. या ठिकाणांभोवती उंच भिंती, काटेरी तारा आणि चोवीस तास कडक सुरक्षा असते. इथे काम करणाऱ्या कर्मचाऱ्यांना आणि टेस्ट ड्राइव्हर्सना कॅमेरा असणारे फोन वापरण्यास सक्त मनाई असते. अनेकदा रात्रीच्या अंधारात किंवा पहाटेच्या वेळी या गाड्या ट्रॅकवर उतरवल्या जातात.

  रस्त्यावर दिसणारी प्रत्येक नवीन गाडी ही कोट्यवधी रुपयांची गुपिते, इंजिनिअर्सची अनेक वर्षांची मेहनत आणि निसर्गाच्या टोकाच्या परिस्थितीशी दिलेला लढा पार करून आपल्यापर्यंत पोहोचलेली असते.