गुरुवार, 29 ऑक्टोबर 2026
(फोटो सौजन्य-AI एआय)
ह्युंदाई सध्या देशातील 105 शहरांमध्ये 185 DC फास्ट चार्जिंग स्टेशन चालवते. या नेटवर्कमध्ये 60 kW ते 240 kW क्षमतेचे चार्जर उपलब्ध आहेत. कंपनीचा हा विस्तार आगामी काळात ईव्ही वापरकर्त्यांना लांब पल्ल्याच्या प्रवासात अधिक सोयीस्कर चार्जिंग पर्याय उपलब्ध करून देण्याच्या दृष्टीने महत्त्वाचा आहे.
कंपनीचे स्वतःचे चार्जिंग नेटवर्क 2030 पर्यंत 600 स्टेशनपर्यंत वाढवण्याचे लक्ष्य आहे. यामध्ये प्रमुख शहरे, महामार्ग आणि ह्युंदाईच्या डीलरशिपचा समावेश केला जाणार आहे. याशिवाय मायह्युंदाई अॅपद्वारे विविध चार्जिंग ऑपरेटरच्या भागीदारीत 38,000 पेक्षा जास्त चार्जिंग पॉइंट्सची माहिती मिळते. ग्राहक या अॅपवरून चार्जर शोधणे, लोकेशनपर्यंत नेव्हिगेशन, स्लॉट बुकिंग आणि डिजिटल पेमेंट करू शकतात.
विशेष म्हणजे ह्युंदाईने 9 सप्टेंबर ते 11 सप्टेंबर 2026 या कालावधीत आपल्या ईव्ही ग्राहकांसाठी मोफत चार्जिंगची घोषणा केली आहे. वर्ल्ड ईव्ही डेच्या निमित्ताने दिलेली ही सुविधा ह्युंदाईच्या स्वतःच्या सार्वजनिक चार्जिंग स्टेशनवर लागू असेल. मात्र चार्जिंग सेशन मायह्युंदाई अॅपमधून बुक करणे आवश्यक आहे. ही सुविधा केवळ ह्युंदाईच्या ईव्हीपुरती मर्यादित आहे.
दरम्यान, भारतात नवीन मास-मार्केट इलेक्ट्रिक एसयूव्ही आणण्याची तयारीही ह्युंदाई करत आहे. ही एसयूव्ही समर्पित ईव्ही प्लॅटफॉर्मवर आधारित असेल. कंपनीने ईव्ही ग्राहकांसाठी 10,000 पेक्षा जास्त विक्री कर्मचाऱ्यांना प्रशिक्षण दिले असून, आर्थिक वर्ष 2026-27 अखेर ही संख्या 17,000 पेक्षा जास्त करण्याचे लक्ष्य आहे. तसेच 650 ईव्ही-रेडी वर्कशॉप्स उभारण्याची कंपनीची योजना आहे.
