मंगळवार, 11 ऑगस्ट 2026
(फोटो सौजन्य - सोशल मीडिया)
पान मसाल्याच्या पॅकेजिंगमध्ये आता प्लास्टिक-आधारित साहित्याला परवानगी नाही. पॉलीप्रोपिलीन, पॉलिस्टर, पॉलीथिलीन आणि पीव्हीसी यांसारख्या कृत्रिम पॉलिमरवर आधारित पॅकेजिंगवर यापुढे बंदी असणार आहे. कोपॉलिमर आणि लॅमिनेट-आधारित पॅकेजिंगवरही बंदी असणार आहे. पण ॲल्युमिनियम फॉइल आणि मेटॅलाइज्ड थरांच्या पॅकेजिंगवरही बंदी घालण्यात आली आहे. याचा परिणाम बाजारात वापरल्या जाणाऱ्या पारंपरिक प्लास्टिक पाऊचवरही होऊ शकतो. त्यामुळे रस्त्याच्या कडेला असलेल्या टपरी वरुन पान खाणं बंद होतंय का असा प्रश्न प्रत्येकालाच पडला आहे.
नवीन नियमांनुसार, पान मसाला आता कागद, पेपरबोर्ड, सेल्युलोज आणि इतर नैसर्गिक स्रोतांपासून बनवलेल्या साहित्यामध्ये पॅक केला जाईल. FSSAI ने म्हटले आहे की या पॅकेजिंग साहित्यामध्ये प्लास्टिक किंवा कृत्रिम पॉलिमरचे कोणतेही थर नसावेत. याव्यतिरिक्त, FSSAI ने टिन आणि काचेच्या कंटेनरलाही मंजुरी दिली आहे, ज्यामुळे कंपन्यांना या कंटेनरमध्ये मसाला पॅक करण्याची परवानगी मिळाली आहे. FSSAI ने म्हटले आहे की पर्यावरणाचे संरक्षण करण्यासाठी आणि प्लास्टिक कचरा कमी करण्यासाठी हा निर्णय घेण्यात आला आहे.
FSSAI ने ७ ऑगस्ट, २०२६ रोजी सुधारित नियमांची अधिसूचना जारी केली. यापूर्वी, या बदलांचा मसुदा २८ एप्रिल, २०२६ रोजी प्रसिद्ध करण्यात आला होता. पण सूचना आणि आक्षेपांचा विचार केल्यानंतरच अंतिम नियम लागू करण्यात आले. FSSAI च्या मते, अन्नपदार्थांचे पॅकेजिंग पर्यावरणीय नियमांनुसार सुसंगत बनवण्यासाठी आणि प्लास्टिक कचरा कमी करण्यासाठी हे पाऊल महत्त्वपूर्ण मानले जाते.
यामुळे पान मसाला कंपन्यांना त्यांच्या सध्याच्या पॅकेजिंग प्रणालीमध्ये बदल करण्याची आवश्यकता भासू शकते. नवीन नियमांनुसार पॅकेजिंग डिझाइन आणि पुरवठा साखळीची व्यवस्था करावी लागू शकते. कागद, टिन किंवा काचेवर आधारित पॅकेजिंगचा अवलंब केल्यास उत्पादन आणि वाहतूक खर्चावर लक्षणीय परिणाम होऊ शकतो. पण FSSAI च्या मते, कंपन्यांना नवीन पॅकेजिंग प्रकारांची चाचणी करणे आणि नियमांचे पालन करणे आवश्यक असेल.
