IGI ची आर्थिक झेप कायम; पहिल्याच तिमाहीत दमदार कामगिरी; महसुलात 23% तर नफ्यात 31% वाढ
या कार्यक्रमाची सुरुवात आयजीआयचे व्यवस्थापकीय संचालक आणि जागतिक मुख्य कार्यकारी अधिकारी (Global CEO) तेहमास्प प्रिंटर यांच्या स्वागतपर भाषणाने झाली. त्यानंतर ग्लोबल मुख्य वित्तीय अधिकारी (Global CFO) ईश्वर अय्यर यांनी कंपनीच्या आर्थिक कामगिरीचे सादरीकरण केले. या संवाद सत्रात माध्यम प्रतिनिधींना IGI Certification Studio मधून हिरे, दागिने आणि रंगीत रत्नांच्या ग्रेडिंग प्रक्रियेचा प्रत्यक्ष अनुभव घेण्याची संधी मिळाली. तसेच “Mines to Market” या इमर्सिव्ह व्हर्च्युअल रिअॅलिटी (VR) अनुभवातून रत्नांच्या खाणीतून ग्राहकांपर्यंतच्या संपूर्ण प्रवासाची माहिती देण्यात आली.
आर्थिक वर्ष 2026-27 च्या पहिल्या तिमाहीत (Q1 FY27) आयजीआयने उल्लेखनीय आर्थिक वाढ नोंदवली. कंपनीचा महसूल (Revenue) वर्ष-दर-वर्ष 23 टक्क्यांनी वाढून 3,708 दशलक्ष रुपये झाला. तर करानंतरचा नफा (PAT) 31 टक्क्यांनी वाढून 1,657 दशलक्ष रुपये इतका झाला. ही वाढ प्रामुख्याने लूज स्टोन्स, ज्वेलरी आणि रंगीत रत्न (Coloured Gemstones) या विभागांतील मजबूत व्यवसायामुळे झाल्याचे कंपनीने स्पष्ट केले.
यावेळी बोलताना तेहमास्प प्रिंटर म्हणाले की, “आर्थिक वर्ष 2026-27 ची सुरुवात आयजीआयसाठी अत्यंत सकारात्मक ठरली आहे. पहिल्या तिमाहीत महसूल आणि नफ्यात अनुक्रमे 23 टक्के आणि 31 टक्के वाढ झाली आहे. ही वाढ आगामी तिमाहींमध्येही कायम राहील, असा आम्हाला विश्वास आहे.”
कंपनीने तंत्रज्ञानाधारित प्रमाणन प्रक्रिया, जागतिक दर्जाच्या प्रयोगशाळा, पारदर्शक ग्रेडिंग प्रणाली आणि ग्राहकांचा वाढता विश्वास यामुळे व्यवसायात सातत्याने वाढ होत असल्याचे नमूद केले. भविष्यात भारतासह जागतिक बाजारपेठेत आपली उपस्थिती अधिक मजबूत करण्यावर कंपनीचा भर राहणार असल्याचेही यावेळी सांगण्यात आले.
.png "Videos"){kind=small}
