Sri Lanka Tour Package : कमी खर्चात श्रीलंकेची सफर! IRCTC ने लाँच केला ‘रामायण टूर पॅकेज’; 6 दिवसांमध्ये काय असणार खास?

Sri Lanka Tour Package : भारतीय रेल्वेची उपकंपनी IRCTC ने पर्यटकांसाठी आणि भाविकांसाठी एक खास ६ दिवसांचे 'श्रीलंका रामायण विशेष टूर पॅकेज' लाँच केले आहे. या टूर अंतर्गत श्रीलंकेतील अशोक वाटिका, रावण एला, आणि सीता अम्मान मंदिरासारख्या अनेक ऐतिहासिक व धार्मिक स्थळांना भेट देता येणार आहे.

• कमी खर्चात श्रीलंकेची सफर!
• IRCTC ने लाँच केला ‘रामायण टूर पॅकेज’
• 6 दिवसांमध्ये काय असणार खास?

Sri Lanka Tour Package : प्रवास हा सुरुवातीपासूनच घडत आला आहे. ऐतिहासिक वारसा जपण्यासाठी तो महत्त्वाचा ठरतो. पौराणिक कथा तर आपण ऐकल्यात पण त्याचा प्रत्यक्ष अनुभव तिथली वास्तू देत असेल तर? तो अनुभव घ्यायला कोणाला नाही आवडणार. इंडियन रेल्वे केटरिंग अँड टुरिझम कॉर्पोरेशन म्हणजेच IRCTC ने अशीच नवीन संधी तुमच्यासाठी आणली आहे. नुकतंच त्यांनी आंतरराष्ट्रीय धार्मिक टूर पॅकेज सुरू ( Sri Lanka Tour Package ) केले आहे. याअंतर्गत, भारतीय प्रवाशांसाठी ६-दिवसीय श्रीलंका रामायण टूर सादर केली जात आहे. या टूरमध्ये कॅंडी, नुवारा एलिया आणि कोलंबो यांसारख्या लोकप्रिय ठिकाणांचा, तसेच रामायणाशी संबंधित अनेक प्रसिद्ध स्थळांचा समावेश असेल. IRCTC ने या टूर पॅकेजच्या खर्चासोबतच प्रवाशांसाठी उपलब्ध असलेल्या सुविधांची देखील माहिती दिली आहे.

Ethanol Government Subsidy : मोठा निर्णय! आता इथेनॉलवर केंद्राकडून मिळणार सबसिडी! कोणाला, कसा फायदा होणार? जाणून घ्या सविस्तर

कधी होणार प्रवास सुरु?

IRCTC नुसार, ५ रात्री आणि ६ दिवसांचा श्रीलंका रामायण दौरा २४ सप्टेंबर २०२६ रोजी बंगळूरु येथून सुरू होणार आहे. या पॅकेजची सुरुवातीची किंमत तीन लोकांसाठी प्रति व्यक्ती ₹५९,९५० इतकी आहे. एका व्यक्तीसाठी किंमत ₹८१,१०० पर्यंत जाते. या सहलीसाठी १५ जागाच उपलब्ध आहेत. या भाड्यामध्ये विमानप्रवास, हॉटेलमधील राहणं, सकाळचा नाश्ता, दुपारचे जेवण आणि रात्रीचे जेवण या सगळ्या गोष्टींचा समावेश आहे. हे लक्षात घ्यावे की श्रीलंका टूर पॅकेजची किंमत रूम्सच्या व्यवस्थेवरही अवलंबून असणार आहे.

एका व्यक्तीसाठी – प्रति व्यक्ती ₹८१,१००
दोन लोकांसाठी – प्रति व्यक्ती ₹६०,५००
तीन लोकांसाठी – प्रति व्यक्ती ₹५९,९५०
तीन व्यक्तींसाठी – प्रति व्यक्ती रु. ५९,९५०
लहान मुलांसाठी (५-११ वर्षे) अतिरिक्त बेडसह रु. ४६,०००
लहान मुलांसाठी (२-११ वर्षे) बेडशिवाय रु. ४१,७००

या IRCTC टूर पॅकेजनुसार, दोन वर्षांखालील मुलांसाठी शिशु शुल्क अतिरिक्त असेल आणि ते बुकिंगच्या वेळी IRCTC कार्यालयात भरावे लागणार आहे. टूर पॅकेजच्या किमतीमध्ये २% दराने TCS चा देखील समावेश आहे. “त्वरा करा… जागा मर्यादित आहेत!” असा संदेशही पॅकेजच्या कागदपत्रांमध्ये स्पष्टपणे नमूद केले आहे.

6 दिवसांच्या टूर पॅकेजमध्ये काय आहे खास?

१ दिवस: या IRCTC टूर पॅकेजच्या पहिल्या दिवशी, प्रवासी बंगळूरुहून कोलंबोला विमानाने प्रवास करतील. त्यानंतर ते मनावरी आणि मुनिस्वरम मंदिरांना भेट देत दांबुल्लाकडे जातील.

२ दिवस: सिगिरिया आणि त्रिंकोमालीचा दौरा केला जाईल, ज्यामध्ये दांबुल्ला लेणी मंदिर, थिरू कोनेस्वरम मंदिर आणि श्री लक्ष्मी नारायण पेरुमल मंदिराला भेटींचा समावेश असेल.

3 दिवस: टूर ग्रुप दांबुल्लाहून कॅंडीला प्रवास करेल, ज्यामध्ये एका रत्न कारखान्याचा आणि दंत मंदिराचा दौरा समाविष्ट असेल. यानंतर संध्याकाळी एक सांस्कृतिक कार्यक्रम होईल.

४ दिवस: प्रवाशांना कॅंडीहून नुवारा एलियाला नेले जाईल, ज्यामध्ये श्री भक्त हनुमान मंदिर, रामबोडा, सीता अम्मान मंदिर आणि अशोक वाटिका यांना भेटींचा समावेश असेल.

५ दिवस: नुवारा एलियाहून कोलंबोला प्रवास. यामध्ये पिन्नावाला हत्ती अनाथाश्रमातील मुक्काम, त्यानंतर केलनिया बुद्ध मंदिर आणि पंचमुगा अंजनेयर मंदिराला भेटींसह कोलंबो शहराचा दौरा असणार आहे.

६ दिवस: दौऱ्याच्या शेवटच्या दिवशी, प्रवाशांना कोलंबोमध्ये खरेदीसाठी वेळ दिला जाईल. त्यानंतर सर्व प्रवाशांना बंगळूरुला परत जाण्यासाठी विमानतळावर सोडण्यात येईल.

कोणत्या विमानांमधून प्रवास?

IRCTC श्रीलंका रामायण टूर पॅकेजमध्ये श्रीलंकन ​​एअरलाइन्सच्या इकॉनॉमी क्लास विमानांचा समावेश आहे. जाणारे विमान, UL-1174, २४ सप्टेंबर रोजी सकाळी १०:०० वाजता बंगळूरुहून निघेल आणि सकाळी ११:३० वाजता कोलंबोला पोहोचेल. परत येणारे विमान, UL-173, ३० सप्टेंबर रोजी रात्री १२:३५ वाजता कोलंबोहून निघेल आणि पहाटे २:०० वाजता बंगळूरुला पोहोचेल. या पॅकेजमध्ये पाच रात्रींचा हॉटेलमधील मुक्काम, इकॉनॉमी-क्लास विमानप्रवास, सकाळचा नाश्ता, दुपारचे जेवण आणि रात्रीचे जेवण, वातानुकूलित वाहनातून प्रवास व स्थळदर्शन, प्रवेश तिकिटे, एक टूर गाईड, परदेशी प्रवास विमा, जीएसटी आणि २% टीसीएस यांचा समावेश आहे.

या गोष्टींची काळजी घ्या

प्रवाशांना विमानातील जेवण, अतिरिक्त स्थळांचं दर्शन, कॅमेरा चार्जेस, बोटिंग, टीप, टेलिफोन शुल्क, पोर्टर सेवा, लॉन्ड्री सेवा, मिनरल वॉटर आणि इतर वैयक्तिक खर्चांसाठी स्वतंत्रपणे पैसे द्यावे लागतील. प्रवाशांनी त्यांचे मूळ पासपोर्ट सोबत बाळगणे गरजेचं आहे, जे त्यांच्या भारतात परत येण्याच्या तारखेपासून किमान सहा महिन्यांसाठी वैध असणे आवश्यक आहे. प्रवाशांना त्यांच्या विमानाचे उड्डाण होण्याच्या तीन तास आधी विमानतळावर पोहोचण्याचा सल्लाही देण्यात येत आहे. त्यामुळे तुम्हालाही हा प्रवास अनुभवायचा असेल तर लवकर बुकिंग करा.

AI Job Layoffs : सांगताय काय? ज्या AI ची जगभर चर्चा, त्याच क्षेत्रात हाहाःकार? 66% कर्मचाऱ्यांवर… धक्कादायक वास्तव उघड