Education News, School News, Pune News, Balbharati,
राज्य मंडळाच्या सर्व शाळांमध्ये या पाठ्यपुस्तकांचा वापर करण्याच्या सूचना शिक्षण संचालक (माध्यमिक व उच्च माध्यमिक) डॉ. महेश पालकर तसेच शिक्षण संचालक (प्राथमिक), महाराष्ट्र राज्य, पुणे यांच्या वतीने याबाबत प्रसिद्धी पत्रकाद्वारे दिल्या आहेत.
शैक्षणिक वर्ष २०२६-२७ पासून राष्ट्रीय शिक्षण धोरण २०२० नुसार तयार करण्यात आलेल्या नवीन अभ्यासक्रमाची अंमलबजावणी करण्यात येत आहे. त्याअंतर्गत इयत्ता दुसरी, तिसरी, चौथी आणि सहावीची पाठ्यपुस्तके नव्याने प्रकाशित करण्यात आली आहेत. त्यापैकी तिसरी आणि चौथीच्या विद्यार्थ्यांसाठी शारीरिक शिक्षण व निरामयता, कार्यशिक्षण आणि कलाशिक्षण, तर सहावीच्या विद्यार्थ्यांसाठी शारीरिक शिक्षण व निरामयता, व्यावसायिक शिक्षण आणि कलाशिक्षण या विषयांची पुस्तके उपलब्ध करून देण्यात आली आहेत.
मराठी, हिंदी, इंग्रजी आणि उर्दू माध्यमांच्या विद्यार्थ्यांसाठी संबंधित पाठ्यपुस्तके महाराष्ट्र राज्य पाठ्यपुस्तक निर्मिती व अभ्यासक्रम संशोधन मंडळाच्या (बालभारती) विभागीय भांडारांमध्ये उपलब्ध करून देण्यात आली आहेत. विद्यार्थ्यांनी या अनिवार्य विषयांच्या पाठ्यपुस्तकांचा नियमित वापर करावा, असे शिक्षण विभागाने स्पष्ट केले आहे. गुजराती, कन्नड, सिंधी, तेलुगू, तमिळ आणि बंगाली माध्यमांसाठी संबंधित पाठ्यपुस्तके ‘ई-बालभारती’च्या संकेतस्थळावर पीडीएफ स्वरूपात उपलब्ध करून देण्याचे प्रस्तावित आहे.
शारीरिक शिक्षण व निरामयता, कार्यशिक्षण, कलाशिक्षण आणि व्यावसायिक शिक्षण या विषयांसाठी आठवडानिहाय तासिका आणि वेळापत्रक यापूर्वीच निश्चित करण्यात आले आहे. त्यामुळे या विषयांचे केवळ पुस्तक उपलब्ध करून देणे नव्हे, तर नियोजित वेळापत्रकानुसार अध्यापन करणे अपेक्षित आहे.
राज्यातील राज्य मंडळाशी संबंधित शासकीय, स्थानिक स्वराज्य संस्थांच्या, खासगी अनुदानित, विनाअनुदानित आणि स्वयं अर्थसहाय्यित शाळांमधील इयत्ता तिसरी, चौथी आणि सहावीच्या विद्यार्थ्यांसाठी या सूचनांची अंमलबजावणी करण्यात येणार आहे. सर्व संबंधित क्षेत्रीय अधिकाऱ्यांनी आपल्या कार्यक्षेत्रातील शाळांमध्ये आवश्यक कार्यवाही करून या पाठ्यपुस्तकांचा वापर सुनिश्चित करण्याचे निर्देश देण्यात आले आहेत.
.png "Videos"){kind=small}
