शनिवार, 3 ऑक्टोबर 2026
फोटो सौजन्य- सोशल मीडिया
IIT & BITS Pilani Rejected: इंजिनिअरिंगची आवड असणाऱ्या प्रत्येक विद्यार्थ्याचे देशातील प्रतिष्ठित आयआयटी (IIT) किंवा बिट्स पिलानी (BITS Pilani) सारख्या संस्थांमध्ये शिकण्याचे स्वप्न असते. परंतु, काही वेळा अपयश आल्यामुळे हे स्वप्न अधुरे राहते आणि मन खचून जाते. अशीच काहीशी कथा गौरव खेत्रपाल यांची आहे, ज्यांनी सुरुवातीच्या अपयशावर मात करत केवळ स्वतःचे नशीबच बदलले नाही, तर आज त्याच संस्थेकडून मानाचा पुरस्कार मिळवला आहे.
गौरव खेत्रपाल यांनी अलीकडेच सोशल मीडियावर आपली प्रेरणादायी कहाणी शेअर केली आहे. त्यांनी १९९५ ते १९९७ या कालावधीत तीन वेळा जेईई (JEE) परीक्षा दिली, परंतु त्यांना आयआयटीमध्ये (IIT) प्रवेश मिळू शकला नाही. त्यानंतर त्यांनी बिट्स पिलानीमध्ये प्रवेश मिळवण्याचा प्रयत्न केला, मात्र कटऑफपेक्षा ०.५ टक्क्यांहून कमी गुणांमुळे त्यांचे तिथेही प्रवेश करण्याचे स्वप्न हुकले. बिट्स पिलानीमध्ये प्रवेश न मिळाल्याचे त्यांना इतके वाईट वाटले की, त्यानंतर कोणीही त्या संस्थेचा विषय काढला तरी ते आपले कान बंद करून घेत असत.
आयआयटी आणि बिट्स पिलानीचे दरवाजे बंद झाल्यानंतर खेत्रपाल यांनी एका टियर-३ कॉलेजमधून आपल्या पुढील शिक्षणाला सुरुवात केली. परंतु, त्यांनी यालाच आपले अंतिम लक्ष्य मानले नाही. आपल्या ध्येयाशी तडजोड न करता त्यांनी प्रयत्न सुरूच ठेवले. पुढे त्यांनी एका लेटरल एन्ट्रन्स परीक्षेत टॉप केले, ज्यामुळे त्यांना टियर-२ कॉलेजमध्ये जाण्याची संधी मिळाली.
कालांतराने त्यांच्या आयुष्यात एक रंजक वळण आले. ज्या बिट्स पिलानी संस्थेत १८ वर्षांच्या वयात त्यांना प्रवेश मिळाला नव्हता, त्याच संस्थेत त्यांनी २००२-०३ मध्ये मास्टर डिग्रीसाठी प्रवेश घेतला. एकेकाळी ज्या संस्थेचे नाव त्यांना त्यांच्या अपयशाची आठवण करून द्यायचे, तीच संस्था त्यांच्या उच्च शिक्षणाचा एक महत्त्वाचा भाग बनली.
12th Career Options: बारावी नंतर काय? कमी वेळेत आणि सहज मिळणाऱ्या नोकऱ्यांबद्दल एकदा वाचाच..
या प्रवासाचा पुढचा टप्पा अधिक खास ठरला. काही वर्षांनंतर जयपूर येथे आयोजित एका माजी विद्यार्थी कार्यक्रमात त्यांना ‘स्टार्टअप एक्सीलेंस अवॉर्ड’ने सन्मानित करण्यात आले. Vanshiv Technologies मधील त्यांच्या आणि त्यांच्या टीमच्या उत्कृष्ट कार्यासाठी त्यांना हा बहुमान मिळाला. गौरव खेत्रपाल यांच्या या प्रेरणादायी प्रवासातून हे सिद्ध होते की, आयुष्यात कोणतीही परीक्षा किंवा कॉलेजचे अपयश माणसाचे संपूर्ण भविष्य ठरवू शकत नाही. जिद्द आणि मेहनतीच्या बळावर माणूस कोणत्याही क्षेत्रात यश मिळवू शकतो.
