TET पुन्हा लांबणीवर! जूनचा पेपर फुटला अन् आता डिसेंबर उजाडणार; विद्यार्थ्यांचा संताप!
जूनमध्ये होणाऱ्या टीईटीचा पेपर फुटल्यानंतर अधिवेशनात शालेय शिक्षण मंत्री दादा भुसे यांनी पुढील परीक्षा ऑनलाइन पद्धतीने घेण्याची घोषणा केली होती. त्यानंतर ऑनलाइन परीक्षा घेण्याबाबत शासन स्तरावर हालचाली सुरू आहेत. मात्र, दोन महिने उलटूनही परीक्षेच्या आयोजनाबाबत अंतिम निर्णय झालेला नसल्याने उमेदवारांमध्ये चिंतेचे वातावरण आहे.
सर्वोच्च न्यायालयाच्या निर्णयानुसार वर्षातून दोन वेळा टीईटी घेण्याचे नियोजन करण्यात आले होते. मात्र, पेपरफुटीच्या घटनेमुळे यंदाची पहिलीच टीईटी अद्याप होऊ शकलेली नाही. ऑनलाइन परीक्षा हा सुरक्षेच्या दृष्टीने योग्य पर्याय मानला जात असला, तरी लाखो उमेदवारांसाठी आवश्यक त्या पायाभूत सुविधा उपलब्ध करण्याचे मोठे आव्हान आहे. पुरेशा संख्येने संगणक उपलब्ध नसल्याने ऑनलाइन टीईटीचे आयोजन परीक्षा परिषदेसाठी आव्हानात्मक ठरणार आहे.
परीक्षा कधी होणार याकडे लक्ष
शिक्षक नियुक्तीसाठी टीईटी अनिवार्य करण्यात आल्याने परीक्षेसाठी अर्ज करणाऱ्या उमेदवारांची संख्या वाढली आहे. जूनमध्ये होणाऱ्या टीईटीसाठी सुमारे सहा लाख उमेदवारांनी अर्ज केले होते. टीईटी उत्तीर्ण होणे आवश्यक असल्याने परीक्षा कधी होणार, याकडे उमेदवारांचे लक्ष लागले आहे.
पुढील वर्षी तीन परीक्षा शक्य
“टीईटी ऑनलाइन की ऑफलाइन, याबाबत शासनाकडून अद्याप सूचना प्राप्त झालेल्या नाहीत. परीक्षेच्या आयोजनाबाबत विचारविनिमय सुरू आहे. यावर्षी टीईटी झाली नाही, तरी पुढील वर्षी तीन वेळा परीक्षा घेता येऊ शकते. तसेच शिक्षकांना सीटीईटीचा पर्याय उपलब्ध असल्याने त्यांच्या नोकरीवर गदा येण्याचा प्रश्न नाही,” अशी माहिती परीक्षा परिषदेतील सूत्रांनी दिली.
पेपरफुटी प्रकरणी नंतर टीईटी परीक्षा ऑनलाईन घेण्याचा निर्णय शिक्षण विभागाने घेतला असला तरी त्यावर अद्यापही तोडगा निघाला नसून, परीक्षा ऑनलाईन घेणे तांत्रिक अडचणीचे ठरणार आहे. त्यात ९ माध्यमातून होणारी परीक्षा ऑनलाईन घेतल्यावर शक्य आहे का? शिक्षक व भावी शिक्षक प्रचंड नैराश्य ग्रस्त असल्याने तात्काळ परीक्षा नियोजनाचा निर्णय घेण्यात यावा.
-कांबळे संदीप अध्यक्ष युवा शैक्षणिक व सामाजिक न्याय संघटना महाराष्ट्र
.png "Videos"){kind=small}
