चंद्रकांत पाटलांविषयी अवमानकारक वक्तव्य भोवलं; भाजप नगरसेवकाच्या तक्रारीनंतर दोघांवर गुन्हा दाखल

उच्च आणि तंत्रशिक्षण मंत्री चंद्रकांत पाटील यांच्याविषयी अवमानकारक वक्तव्य करणारी चित्रफीत सोशल मीडियावर व्हायरल करण्यात आल्याचा प्रकार उघडकीस आला आहे. याप्रकरणी डेक्कन पोलिसांकडून दोघांविरुद्ध गुन्हा दाखल केला आहे.

पुणे : उच्च आणि तंत्रशिक्षण मंत्री चंद्रकांत पाटील यांच्याविषयी अवमानकारक वक्तव्य करणारी चित्रफीत सोशल मीडियावर व्हायरल करण्यात आल्याचा प्रकार उघडकीस आला आहे. याप्रकरणी डेक्कन पोलिसांकडून दोघांविरुद्ध गुन्हा दाखल केला आहे. याबाबत भारतीय जनता पक्षाचे नगरसेवक सुनील पांडे (वय ५६, रा. भांडारकर रस्ता, डेक्कन जिमखाना) यांनी डेक्कन पोलिस ठाण्यात तक्रार दिली आहे.  याप्रकरणी संतोष पंडीत याच्यासह दोघांवर गुन्हा दाखल करण्यात आला आहे.

पोलिसांच्या माहितीनुसार, आरोपींनी ‘राजकारण एक्सप्रेस’ या सोशल मीडिया खात्यावर चंद्रकांत पाटील यांच्याविषयी अवमानकारक वक्तव्य करणारा व्हिडिओ टाकला होता. ‘जनतेच्या प्रश्नांची उत्तरे नेते देत नाहीत पाटील हे त्यापैकी एक आहेत’, असा मजकूर असलेली चित्रफीत व्हायरल करण्यात आली होती. व्हिडिओमध्ये अश्लील आणि शिवराळ भाषा वापरून अवमानकारक वक्तव्य करण्यात आल्याचे पांडे यांनी तक्रारीत म्हटले आहे. भारतीय न्याय संहिता कलम ३५६, २९६, ३ (५) अन्वये गुन्हा दाखल करण्यात आला आहे. सहायक निरीक्षक जाधव अधिक तपास करत आहेत.

हे सुद्धा वाचा : कौटुंबिक वादातून पत्नीचा गळा आवळून खून, मुलावरही चाकूने वार; खेड शहरातील घटनेनं खळबळ

कोण आहे संतोष पंडित?

संतोष पंडित हे पुणेकर असून सोशल मीडियावर ते व्हिडीओ पोस्ट करुन भुमिका मांडत असतात. रस्ते आणि महापालिकेच्या कारभारावर टीका करणाऱ्यांमध्ये ते अग्रेसर असतात. ते स्वतःचा उल्लेख ‘नागरिक पत्रकार’ असा करतात. रस्त्यांवरील खड्डे आणि अन्य समस्यांवर ते आपल्या पद्धतीने टीका करतात. काही वेळा ते अतिरेक करत असल्याने त्यातून ते अडचणीतही आले आहेत. टिळक रोडवरील ग्राहक पेठेसमोर संगीता तिवारी यांच्या ‘गुलाबो गँग’च्या वतीने भोंदू अशोक खरात याच्याविरुद्ध आंदोलन करण्यात आले होते. यावेळी वृत्तांकनासाठी काही पत्रकारही उपस्थित होते. तेथून जात असलेल्या संतोष पंडित यांनी ‘तुमच्यामुळे वाहतूक कोंडी होत आहे,’ असे सांगितले. त्यानंतर त्यांनी वाहतूक कोंडीचा व्हिडिओ बनवला. तेथे उपस्थित असलेल्या महिला पत्रकार आणि आंदोलनकर्त्या महिलांवर त्यांनी अत्यंत अर्वाच्च भाषेत टीका करण्यास सुरुवात केली. ‘पत्रकारांमुळे वाहतूक कोंडी होत आहे,’ असे सांगत त्यांनी महिला पत्रकारांच्या कपड्यांवरून शेरेबाजी केली आणि त्यांचे चित्रीकरण सुरू केले. महिला पत्रकारांनी त्यांना रोखण्याचा प्रयत्न केला. त्यावेळी त्यांनी अश्लील शिवीगाळ केल्याचा आरोप आहे. या प्रकरणी एका महिला पत्रकाराने पर्वती पोलीस ठाण्यात विनयभंगाचा गुन्हा दाखल केला होता.