गणेशोत्सवातील गर्दीत भक्तांचे दागिने चोरणारी टोळी जेरबंद; तब्बल २३ लाखांचा मुद्देमाल जप्त

वैभवशाली गणेशोत्सवातील गर्दीचा फायदा घेऊन भक्तांच्या गळ्यातील दागिने, मोबाइल चोरणाऱ्या टोळीला पकडण्यात यश आले आहे. टोळीकडून १३ लाख रुपयांचे दागिने, मोटार असा २३ लाखांचा मुद्देमाल जप्त करण्यात आला आहे.

• गणेशोत्सवात भक्तांचे दागिने चोरणाऱ्या टोळीला पकडले
• विश्रामबाग पोलिसांचा ४,५०० किमी पाठलाग
• तब्बल २३ लाखांचा मुद्देमाल जप्त

पुणे : वैभवशाली गणेशोत्सवातील गर्दीचा फायदा घेऊन भक्तांच्या गळ्यातील दागिने, मोबाइल चोरणाऱ्या टोळीला पकडण्यात यश आले आहे. विश्रामबाग पोलिसांनी तब्बल साडे चार हजार किलोमीटरचा प्रवास करून या टोळीला हरयाणातील पलवल भागातून पकडले आहे. गुजरात आणि हरियाणा पोलिसांच्या मदतीने ही कारवाई करण्यात आली आहे. टोळीकडून १३ लाख रुपयांचे दागिने, मोटार असा २३ लाखांचा मुद्देमाल जप्त करण्यात आला आहे.

 

या प्रकरणी अजय समशेरन विनोदकुमार रुपसिंग कोळी (वय २०, रा. समसाबाद पलवल, हरयाणा), अमन समशेर अनिलकुमार नारायणसिंग कोळी (वय २४, रा. आदर्श काॅलनी, पलवल, हरयाणा), दीपक समशेर राजूभाई सापसिंग (वय २१, रा. हिरानगर काॅलनी, पलवल, हरयाणा) यांना अटक करण्यात आली आहे.

पोलिस उपायुक्त कृषीकेश रावले यांच्या मार्गदर्शनाखाली वरिष्ठ निरीक्षक नवनाथ जगताप, पोलिस निरीक्षक (गुन्हे) उमेश कारके, उपनिरीक्षक सत्यवान गेंड, सचिन कदम, शैलेश सुर्वे, सचिन अहविळे, कैलास डुकरे, जाकीर मणीयार, अनिस शेख, शिवदत्त गायकवाड, फिरोज इनामदार, अर्जुन थोरात, नितीन बाबर यांनी ही कामगिरी केली आहे.

‘गणेशोत्सव तसेच विसर्जन मिरवणुकीत आलेल्या भक्तांचे दागिने चोरीला गेल्याच्या घटना घडल्या होत्या. याप्रकरणी गुन्हे नोंद करण्यात आलेले होते. याप्रकरणाचा तपास विश्रामबाग पोलिसांकडून सुरू होता. तपासातील माहितीनुसार चोरटे हे हरियाणात पसार झाल्याची माहिती समोर आली होती. पोलिसांनी साडेचार किलोमीटर प्रवास करुन हरियाणायील पलवल गावातून तिघांना अटक केली. त्यांच्याकडून ९ गुन्हे उघडकीस आले असून, २३ लाख रुपयांचा मुद्देमाल जप्त करण्यात आला आहे, अशी माहिती परिमंडळ एकचे पोलीस उपायुक्त कृषीकेश रावले यांनी दिली.

हे सुद्धा वाचा : प्रशिक्षणार्थी PSI पतीकडून विवाहितेचा छळ, पिस्तूल दाखवून धमकावल्याचा आरोप; नेमकं प्रकरण काय?

अरवली पोलिसांची मदत

या प्रकरणातील एक आरोपी गुजरातमधील अरवली पोलिस ठाण्यात दाखल असलेल्या गुन्ह्यात अटक असल्याची माहिती मिळाली होती. अरवली पोलिसांच्या सहकार्याने त्याला या गुन्ह्यात ताब्यात घेऊन चौकशी करण्यात आली. तेव्हा आरोपीनी गणेशोत्सवात चोरी केल्याची माहिती मिळाली. त्यानंतर हरियाणातील पलवल भागातून आरोपींना अटक करण्यात आली. आरोपी मोटारीतून पुण्यात आले होते. त्यांच्याकडून मोटार, तसेच दागिने असा २३ लाख रुपयांचा मुद्देमाल जप्त करण्यात आला आहे.