औषध विक्रेत्याची साडे चार कोटींची फसवणूक; एका महिलेसह दोघांवर गुन्हा दाखल

पुण्यातील एका होलसेल दराने औषध विक्री करणाऱ्या व्यावसायिकाला तब्बल साडे चार कोटींना गंडा घातल्याचा प्रकार समोर आहे. याप्रकरणी विश्रामबाग पोलिसांत नीलेश सोहनलाल सोनिगरा (वय ४६, रा. मुकुंदनगर) यांनी तक्रार दिली आहे.

पुणे : पुण्यातील एका होलसेल दराने औषध विक्री करणाऱ्या व्यावसायिकाला तब्बल साडे चार कोटींना गंडा घातल्याचा प्रकार समोर आहे. दुबईला औषध निर्यात करण्याची बतावणी करुन त्यांच्याकडून औषधे घेऊन त्याची रक्कम न देता ही फसवणूक करण्यात आली आहे. एका महिलेसह दोघांवर गुन्हा दाखल केला असून, त्यांनी अशा प्रकारे आणखी काही विक्रेत्यांची फसवणूक केल्याचा संशय आहे.

याप्रकरणी विश्रामबाग पोलिसांत नीलेश सोहनलाल सोनिगरा (वय ४६, रा. मुकुंदनगर) यांनी तक्रार दिली आहे. यानूसार सोनाली गिरीगोसावी (वय ४२, रा. कोहिनुर ग्लोरी सोसायटी, महंमदवाडी ) आणि जयेश वसंत जैन (वय ४१, रा. भक्तीपूजा अपार्टमेंट, महर्षीनगर) यांच्यावर गुन्हा दाखल करण्यात आला आहे.

पोलिसांच्या माहितीनुसार, निलेश यांचा न्यू अमर फार्मास्युसिटकल्स औषधे विक्रीचा व्यवसाय आहे. ते पुण्यासह जिल्हा व इतर भागातील रुग्णालयांना ओैषध विक्री करतात. सोबतच छोट्या मेडिकल स्टोअर्समध्येही ओैषध पुरवठा करतात. २०२० मध्ये निलेश यांची सोनाली गिरीगोसावी हिच्याशी ओळख झाली. तिचे ओम साईनाथ मेडिकल ओैषध विक्री दुकान आहे. निलेश हे तिला उधारीवर औषधे देत होते. तिने हिने निलेश यांची नोव्हेबर २०२४ मध्ये जयेश जैन याच्याशी ओळख करुन दिली. त्याचे गुरुवार पेठेत सृष्टी हेल्थकेअर हे औषध विक्रीचे दुकान आहे. जयेश जैनने माझी दुबईतील कंपनीच्या संचालकाबरोबर ओळख आहे. त्यांना मोठ्या प्रमाणावर औषधांच्या साठ्यांची आवश्यकता आहे, असे सांगितले. जयेश जैन हा घाऊक विक्रेता आहे. तो व्यवहारात फसविणार नाही, असे सोनाली हिने सांगितले होते.

तिच्यावर विश्वास ठेवून १३ मार्च ते ८ मे दरम्यान या कालावधीत ४ कोटी ४० लाख ३५ हजार ९०५ रुपयांची औषधे त्यांनी एका महिन्याच्या उधारीवर सोनालीच्या ओम साईनाथ मेडिकल्सच्या नावाने दिली. त्यासाठी तिने ६० धनादेश दिले होते. त्यानंतर ती पैसे देण्यास टाळाटाळ करु लागली. बँकेत धनादेश जमा करतो, असे सांगितले. तेव्हा खात्यात पैसे नसल्याचे तिने सांगितले. नंतर तिने संपर्क बंद केला. त्यामुळे त्यांनी चौकशी केली. तेव्हा तिने आणखी एका औषध विक्रेत्याकडून उधारीवर ८३ लाख ३८ हजार रुपयांची औषध घेऊन फसवणूक केल्याची माहिती मिळाली. हे औषध तिने जैन याच्या ओैषध विक्री दुकानात दिल्याचे उघडकीस आले. गुन्हे शाखेचे पोलीस निरीक्षक अरुण घोडके तपास करत आहेत.