वैजापुरात जुन्या भांडणातून दोन गटांत राडा, कोयते अन् लोखंडी रॉडने एकमेकांवर हल्ले; नेमकं काय घडलं

जुन्या वादाचा राग मनात धरून दोन गटांनी एकमेकांवर हत्यारांसह हल्ला चढविल्याची धक्कादायक घटना शनिवारी शहरातील येवला रस्त्यावरील हॉटेल शान ए मराठा व जीवनश्री कॉलनी परिसरात घडली आहे.

• वैजापुरात जुन्या वादातून दोन गटांत हत्यारांसह हाणामारी
• कोयते, कत्त्या व लोखंडी रॉडच्या हल्ल्यात अनेक जण जखमी
• परस्परविरोधी फिर्यादींवरून २० ते २५ जणांविरुद्ध गुन्हे दाखल

वैजापूर : जुन्या वादाचा राग मनात धरून दोन गटांनी एकमेकांवर हत्यारांसह हल्ला चढविल्याची धक्कादायक घटना शनिवारी शहरातील येवला रस्त्यावरील हॉटेल शान ए मराठा व जीवनश्री कॉलनी परिसरात घडली आहे. कोयता, लोखंडी कत्ती, लोखंडी रॉड, फावड्याचा फायबर दांडा व लाकडी दांडक्यांचा वापर करीत झालेल्या या हाणामारीत ९ जण जखमी झाले आहेत. काही जखमींची प्रकृती चिंताजनक असल्याने त्यांना पुढील उपचारासाठी विविध रुग्णालयांत हलविण्यात आले आहे. गणेश विसर्जन मिरवणुकीदरम्यान झालेल्या जुन्या वादातून हा संघर्ष पेटल्याचे समोर आले आहे. याप्रकरणी परस्परविरोधी दिलेल्या फिर्यादीवरून २० ते २५ जणांविरुद्ध वैजापूर पोलिस ठाण्यात गुन्हा दाखल करण्यात आला आहे.

 

याबाबत पोलिसांनी दिलेल्या माहितीनुसार, कृष्णा चंद्रकांत जाधव (रा. येवला रस्ता वय२१) याने दिलेल्या फिर्यादीनुसार, गणेश विसर्जनावेळी झालेल्या जुन्या भांडणाचा राग मनात धरून शान पवार, रोहित पठारे, प्रितेश साळुंके, विशाल पवार, तुषार पठारे व आदेश शेवाळे यांच्यासह हॉटेलमधील इतर कामगारांनी लोखंडी कत्ती, कोयता आणि फावड्याच्या फायबर दांड्याने हल्ला करून डोक्यासह हातावर वार केले. यावेळी इतरांनाही मारहाण करून जीवे मारण्याच्या धमक्या दिल्याचा आरोप करण्यात आला आहे.

यांच्यावर पोलिसांत गुन्हा दाखल

या हल्ल्यात कृष्णा जाधव, निर्भय पवार, विशाल रामदास कडे व सुजित राजपूत जखमी झाले आहेत. दरम्यान, हॉटेल व्यावसायिक भूषण पवार (वय ४०, रा. बजरंग चौक, वैजापूर) यांनीही याच घटनेप्रकरणी स्वतंत्र फिर्याद दिली आहे. त्यांच्या तक्रारीनुसार, शनिवारी सायंकाळी पाच ते साडेपाचच्या सुमारास हॉटेल शान-ए-मराठा परिसरात जुन्या वादातून जमावाने हल्ला केला. विशाल पवार यांना जीवे मारण्याच्या उद्देशाने लोखंडी रॉड आणि लाकडी दांडक्यांनी मारहाण करून गंभीर जखमी करण्यात आले. हॉटेलमधील कामगारांनाही मारहाण करण्यात आली असून काहींची डोकी फोडल्याचा आरोप आहे. गणपती मंडळातील रोहित पठारे व तुषार पठारे यांनाही गंभीर मारहाण केल्याचे म्हटले आहे. याप्रकरणी नितीन होंड, गौरव हॉड, गजू राजपूत, क्रिश राजपूत, संकेत आहेर, प्रतीक लुटे, सुजित ठाकूर ऊर्फ राजपूत, विशाल कडे, रोहित आहेर, हर्षद राजपूत, अमर राजपूत, तुषार आहेर व मयूर रहाणे आदी लोकांवर गुन्हा दाखल केला आहे.

कायद्याचा धाक उरलाय का ?

गणेश विसर्जन मिरवणुकीदरम्यान झालेल्या वादानंतर पोलिसांत गुन्हा दाखल झालेला असतानाही त्याच वादातून पुन्हा दोन गट आमनेसामने येतात व हत्यारांसह हल्ले करतात, ही बाब गंभीर आहे. शहर परिसरात भरदिवसा कोयते, कत्त्या व लोखंडी रॉड घेऊन जमाव एकमेकांवर तुटून पडत असेल, तर कायद्याचा धाक नेमका कुठे आहे? असा सवाल उपस्थित होत आहे.

हे सुद्धा वाचा : कोयता आणि चाकुने वार करत तरुणाचा संपवला जीवनप्रवास; ईश्वरपूरमधील हत्येने परिसरात खळबळ!

जखमींवर रुग्णालयात उपचार सुरू 

या घटनेत विशाल पवार, शान पवार, संतोष शिहरे, आदेश शेवाळे व भूषण पवार जखमी झाले आहेत. याप्रकरणी परस्परविरोधी दिलेल्या फिर्यादीवरून २० ते २५ जणांविरुद्ध वैजापूर पोलिस ठाण्यात गुन्हा दाखल करण्यात आला आहे. घटनेनंतर हल्ल्यात जखमी झालेल्यांना तातडीने वैजापूर उपजिल्हा रुग्णालयात दाखल करण्यात आले. मात्र, गंभीर जखमींची स्थिती लक्षात घेता त्यांना छत्रपती संभाजीनगर येथील घाटी रुग्णालयासह येवला, कोपरगाव व शहरातील खासगी रुग्णालयांत उपचारासाठी हलविण्यात आले. काहींची प्रकृती चिंताजनक असल्याने नातेवाईकांमध्ये चिंतेचे वातावरण आहे. दरम्यान, एका जखमीला शहराबाहेर नेऊन मारहाण केल्यानंतर स्टेशन रोडच्या बाजूला फेकून दिल्याचा प्रकारही समोर आला आहे. या व्यक्तीचा शोध घेण्यासाठी पोलिसांनी काही तास धावपळ केली.

हे सुद्धा वाचा : पुण्याच्या भवानी पेठेत रक्तरंजित थरार! जुन्या वादातून रिक्षाचालकाच्या डोक्यात दगड घातला