नाशिक हादरलं ! नवीन प्रियकराच्या मदतीने पार्टनरचा काढला काटा; मृतदेह कसारा घाटात नेला अन्…

लिव्ह-इन रिलेशनशिपमध्ये राहणाऱ्या प्रेयसीनेच आपल्या नवीन प्रियकराच्या मदतीने जोडीदाराचा गळा आवळून निघृण खून केल्याची धक्कादायक घटना इंदिरानगर पोलीस ठाण्याच्या हद्दीत उघडकीस आली आहे.

नाशिक : लिव्ह-इन रिलेशनशिपमध्ये राहणाऱ्या प्रेयसीनेच आपल्या नवीन प्रियकराच्या मदतीने जोडीदाराचा गळा आवळून निघृण खून केल्याची धक्कादायक घटना इंदिरानगर पोलीस ठाण्याच्या हद्दीत उघडकीस आली आहे. हत्येनंतर पुरावा नष्ट करण्यासाठी मृतदेह थेट कसारा घाटातील खोल दरीत फेकून देण्यात आला. मात्र, पोलिसांच्या तपासाच्या चक्रांपुढे हे थरारक हत्याकांड उघडकीस आले असून गुन्हे शाखा युनिट एक व इंदिरानगर पोलिसांनी मुख्य संशयित महिलेसह तिच्या साथीदाराला बेड्या ठोकल्या आहेत.

वसंत गोरखनाथ सातपुते (वय ३९, रा. पाथर्डी फाटा, नाशिक) हे संशयित हसीना हबीब शेख (वय ३७) हिच्यासोबत गेल्या १५ वर्षांपासून लिव्ह-इनमध्ये राहत होते. वसंत बेरोजगार असल्याने हसीनाच त्यांचा संपूर्ण खर्च चालवत होती. ५ ऑगस्टच्या सायंकाळी वसंत घरात झोपलेले असताना हसीनाला भेटण्यासाठी तिचा नवीन प्रियकर साहिल शहा (रा. वडाळागाव) तेथे आला. वसंत यांना अचानक जाग आल्याने त्यांनी साहिलला पाहून जाब विचारला. यातून वाद पेटला आणि संतापलेल्या साहिलने वसंत यांचा गळा आवळून जागीच गेम केला. यानंतर हसीना आणि साहिलने मृतदेह कारमध्ये टाकून कसारा घाटात फेकून दिला.

मित्राच्या सतर्कतेने फुटला भांडाफोड

वसंत अचानक गायब झाल्याने त्यांचा मित्र कचरू कडवे यांना संशय आला. त्यातच हसीनाची बदलेली वर्तणूक पाहून कचरू यांनी इंदिरानगर पोलीस ठाण्यात अपहरणाची व हत्येची शंका व्यक्त करत तक्रार नोंदवली. पोलिसांनी तपासाची चक्रे जलद गतीने फिरवत हसीना व साहिलला ताब्यात घेतले.

हे सुद्धा वाचा : प्रियकरच बनला वैरी…! वाढदिवसाच्या बहाण्याने प्रेयसीला घरी बोलावले, केक कापला अन् मित्रांसोबत मिळून…पुढे खुपच भयानक घडलं

संशयितांना २३ ऑगस्टपर्यंत पोलीस कोठडी

पोलीस निरीक्षक कारंडे, उपनिरीक्षक वाय. बी. शिरसाठ आणि गुन्हे शाखा युनिट एकचे वरिष्ठ निरीक्षक डॉ. अंचल मुदगल यांच्या पथकाने कसून चौकशी केली असता संशयितांनी गुन्ह्याची कबुली दिली. पोलिसांनी संशयितांना कसारा घाटात नेऊन दरीतून मृतदेह बाहेर काढला व शवविच्छेदनासाठी जिल्हा रुग्णालयात पाठवला. न्यायालयाने दोन्ही आरोपींना २३ ऑगस्टपर्यंत पोलीस कोठडी सुनावली आहे.

हे सुद्धा वाचा : आईने पकडले हात, प्रियकराने आवळला गळा; पतीच्या मित्रासोबतच्या प्रेमसंबंधातून चिमुकलीची हत्या