बुधवार, 4 नोव्हेंबर 2026
संग्रहित फोटो
पुणे : राज्यासह देशभरात फसवणुकीच्या घटना वाढल्या असून, दररोज वेगवेगळ्या भागात फसवणुकीच्या घटना घडत आहेत. अशातच आता वाहतूक नियमांचे उल्लंघन केल्याबद्दल दंड भरण्यासाठी लिंक पाठवून नऱ्हे येथील ३४ वर्षीय व्यक्तीची २ लाख ७९ हजार ७०९ रुपयांची ऑनलाइन फसवणूक करण्यात आली आहे. दंड भरण्यासाठी पाठविलेल्या लिंकवर क्लिक केल्यानंतर त्यांच्या बँक खाते आणि क्रेडिट कार्डशी जोडलेल्या मोबाइल क्रमांकावरील कॉल आणि एसएमएस दुसऱ्या मोबाइल क्रमांकावर फॉरवर्ड करून घेण्यात आले आहे. त्यानंतर या माहितीचा गैरवापर करून बँक खाते आणि क्रेडिट कार्डमधून परवानगीशिवाय रक्कम हस्तांतरित करण्यात आली आहे.
याप्रकरणी नऱ्हे पोलिसांत तक्रार दाखल करण्यात आली आहे. त्यानुसार हिरा एंटरप्राइजेसच्या व्हॉट्सअॅप क्रमांकाचा वापर करणारे, विविध बँक खात्यांचे वापरकर्ते तसेच संबंधित लिंकधारकांविरुद्ध गुन्हा दाखल करण्यात आला आहे.
पोलिसांच्या माहितीनुसार, दोन ते पाच सप्टेंबर या कालावधीत हा प्रकार घडला आहे. आरोपींनी संबंधित व्यक्तीला त्यांच्या वाहनाने वाहतूक नियमांचे उल्लंघन केल्याचे सांगितले. त्यानंतर दंड भरण्यासाठी व्हॉट्सअॅपद्वारे एक लिंक पाठविण्यात आली. दंड भरण्याच्या उद्देशाने संबंधित व्यक्तीने त्या लिंकवर क्लिक केले. लिंकवर क्लिक केल्यानंतर आरोपींनी बँक खाते आणि क्रेडिट कार्डशी जोडलेल्या मोबाइल क्रमांकावरील कॉल आणि एसएमएस दुसऱ्या मोबाइल क्रमांकावर फॉरवर्ड करून घेतले. त्यामुळे बँक व्यवहारांशी संबंधित संदेश आणि माहिती आरोपींपर्यंत पोहोचली. त्यानंतर या माहितीचा वापर करून बँक खाते आणि क्रेडिट कार्डमधून परवानगीशिवाय रक्कम हस्तांतरित करण्यात आली. या व्यवहारांमुळे संबंधित व्यक्तीचे एकूण दोन लाख ७९ हजार ७०९ रुपयांचे आर्थिक नुकसान झाले. फसवणूक झाल्याचे लक्षात आल्यानंतर त्यांनी नऱ्हे पोलिस ठाण्यात तक्रार दाखल केली. याप्रकरणाचा पुढील तपास पोलिस करीत आहेत.
एपीके फाईल अन् ८.५९ लाख झाले गायब
एक एपीके फाइल इन्स्टॉल केली… मोबाइलचा ताबा गेला… आणि काही वेळातच तीन क्रेडिट कार्डावरून ८ लाख ५९ हजार ५९९ रुपये साफ झाले ! गॅस कनेक्शन बंद होणार या एका मेसेजने सुरू झालेल्या फसवणुकीत ५४ वर्षीय डॉक्टरांना सायबर चोरांनी काही तासांत गंडा घातला आहे. ही घटना १२ ते १३ डिसेंबर २०२५ दरम्यान संमित्र कॉलनीत घडली आहे. याप्रकरणी तब्बल नऊ महिन्यानंतर क्रांतीचौक पोलिस ठाण्यात गुन्हा दाखल करण्यात आला आहे. प्रकरणात मुकेश टिंडुरामजी नाथानी (५४, रा. मंगल जगत, संमित्र कॉलनी) यांनी फिर्याद दिली आहे.
