आधी महिलेने पोटच्या मुलीचा गळा दाबला, अन् नंतर मुलाला…; मंचरमधील धक्कादायक प्रकार

मंचर येथील लालबाग प्रेस्टीज परिसरात कौटुंबिक वादातून घडलेल्या हृदयद्रावक घटनेने परिसर सुन्न झाला आहे. एका आईच्या टोकाच्या निर्णयाने समाजमन हेलावून गेले आहे.

मंचर : मंचर येथील लालबाग प्रेस्टीज परिसरात कौटुंबिक वादातून घडलेल्या हृदयद्रावक घटनेने परिसर सुन्न झाला आहे. संतापाच्या भरात आईने प्रथम १३ वर्षीय मुलीवर घरातच वायरीच्या सहाय्याने गळा आवळून जीवघेणा हल्ला केला आणि ती मृत झाल्याचे समजून घराला कुलूप लावले. त्यानंतर सहा वर्षीय मुलाला सोबत घेऊन विहिरीत उडी मारत आत्महत्येचा प्रयत्न केला. या घटनेत सहा वर्षीय निहांतचा मृत्यू झाला असून, मुलगी गंभीर जखमी अवस्थेत आढळून आली आहे. संबंधित आई हर्षदा आशिष बाणखेले (वय ३५ रा.मंचर ता. आंबेगाव) या थोडक्यात बचावल्या आहेत. ही धक्कादायक घटना शुक्रवारी (दि. ३) सकाळी उघडकीस आली आहे.

 

मिळालेल्या माहितीनुसार, सकाळी साडेआठच्या सुमारास प्रॉपर्टीच्या कारणावरून सुरू असलेल्या कौटुंबिक वादातून हर्षदा बाणखेले यांनी संतापाच्या भरात मुलगी परीज्ञाचा वायरीच्या सहाय्याने गळा आवळून व मारहाण करून जीव घेण्याचा प्रयत्न केला. ती मृत झाल्याचे समजून तिला घरातच बंद करून ठेवण्यात आले. यानंतर त्यांनी सहा वर्षीय मुलगा निहांत याला दुचाकीवर घेऊन तपनेश्वर मंदिराजवळील विहिरीकडे जाऊन मुलासह स्वतः उडी मारली. हा प्रकार स्थानिक नागरिकांच्या निदर्शनास आल्यानंतर त्यांनी तत्काळ धाव घेत दोघांना विहिरीतून बाहेर काढले. मात्र, निहांतचा मृत्यू झाल्याचे निष्पन्न झाले, तर हर्षदा बाणखेले या जखमी अवस्थेत बचावल्या.

हे सुद्धा वाचा : ​ओतूरमध्ये काळजाचा ठोका चुकवणारी घटना! ट्रकच्या चाकाखाली चिरडून तरुणीचा मृत्यू

मुलगी गंभीर जखमी अवस्थेत

दरम्यान, घरात बंद केलेली मुलगी परीज्ञा ही गंभीर जखमी अवस्थेत आढळून आली असून, तिच्यावर उपचार सुरू आहेत. या प्रकरणी पती आशिष बाणखेले यांनी मंचर पोलीस ठाण्यात फिर्याद दिली असून, पोलिसांनी गुन्हा नोंदवून पुढील तपास सुरू केला आहे. या घटनेमुळे मंचर परिसरात प्रचंड हळहळ व्यक्त होत असून, एका आईच्या टोकाच्या निर्णयाने समाजमन हेलावून गेले आहे.