फोन करुन प्रेयसीला भेटायला बोलावले, नंतर गायरानामध्ये नेले अन्…; सासवडमधील धक्कादायक प्रकार

चारित्र्यावर संशय घेऊन तिला लाथाबुक्क्यांनी मारहाण करीत गळा आवळून प्रेयसीचा खून केल्याची घटना उघडकीस आली आहे. निलम महेंद्र गायकवाड (वय २२. रा) असे खून झालेल्या युवतीचे नाव आहे.

सासवड : कॉलेजला गेलेल्या मैत्रिणीला कॉलेज सुटल्यावर घरी जात असताना फोन करून मला तुझ्याशी बोलायचे आहे. असे म्हणून गोड बोलून खानवडी जवळील गायरानमध्ये नेले. तिथे गेल्यावर बोलत असताना तिच्या चारित्र्यावर संशय घेवून तिला लाथाबुक्क्यांनी मारहाण करीत गळा आवळून खून केल्याची घटना उघडकीस आली आहे. निलम महेंद्र गायकवाड (वय २२) असे खून झालेल्या युवतीचे नाव असून, तिचा खून करणारा अनिकेत विष्णु जाधव हा स्वतःहून पोलीस ठाण्यात हजर झाल्यानंतर त्याला अटक केली आहे. न्यायालयाने आरोपीला सोमवार ७ एप्रिलपर्यंत पोलीस कोठडी सुनावली आहे.

 

नीलमचे वडील महेंद्र प्रल्हाद गायकवाड (वय ५०) यांनी सासवड पोलीस ठाण्यात फिर्याद दिली आहे. याबाबत पोलिसांनी सांगितले की, मयत निलम आणि आरोपी अनिकेत जाधव हे दोघे पुरंदर तालुक्यातील माळशिरस या एकाच गावचे असून, अनेक वर्षापासून त्यांचे प्रेमसंबंध होते. याबाबत नीलमच्या वडिलांना कुणकुण लागताच त्यांनी आरोपी व त्याच्या कुटुंबियांना मुलीशी संबंध ठेवू नयेत याची तीन वर्षापूर्वी कल्पना दिली होती.

निलम सध्या सासवडला वाघिरे कॉलेजमध्ये बीएच्या तिसऱ्या वर्षात शिक्षण घेत होती. १ एप्रिल रोजी कॉलेज सुटल्यानंतर नेहमीप्रमाणे सायंकाळी घरी न आल्याने तिला फोन करून संपर्क करण्याचा प्रयत्न केला. मात्र तिने फोन उचलला नसल्याने वडिलांनी तिच्या मैत्रिणींशी संपर्क केला. तेव्हा आम्ही जाताना बरोबर होतो. मात्र परत येताना भेटली नसल्याचे मैत्रिनीने सांगितले. त्यामुळे रात्री उशिरा जेजुरी पोलीस ठाण्यात मिसिंग दाखल करण्यात आली.

दरम्यान रात्री ११ .३० वाजता पोलिसांनी फोन करून सासवड ग्रामीण रुग्णालयात बोलवले. तिथे जाऊन पहिले असता निलमचा गळा सुजलेला होता. तिच्या संपूर्ण अंगावर जखमा दिसून आल्या. तिचे शरीर काळे निळे पडलेले होते. त्यावरून अनिकेत जाधव याने तिच्यावर लैंगिक अत्याचार करून आणि नंतर गळा दाबून अत्यंत निघृणपणे खुन केल्याचे पोलिसांना सांगितले.

फोन आला आणि तिथेच घात झाला

खानवडी जवळील गायरानात दोघे बोलत असताना नीलमला कोणाचा तरी फोन आला. तसेच फोनवर ती हसत बोलत असल्याचे पाहून तिच्या चारित्र्यावर संशय घेवून तिथेच मारहाण करण्यास सुरुवात केली. दोघेही लोकवस्तीपासून लांब असल्याने तिचा आवाज बाहेर गेला नाही. आरोपीने तिच्या पाठीत व छातीत हाताच्या कोपराने जोरात मारहाण करत गळा आवळून निर्दयीपणे खून केला. याबाबत भोर उपविभागाचे पोलीस अधिकारी राजेंद्रसिंह गौर यांच्या मार्गदर्शनाखाली सासवडचे पोलीस निरीक्षक कुमार कदम पुढील तपास करीत आहेत.

हे सुद्धा वाचा : आधी महिलेने पोटच्या मुलीचा गळा दाबला, अन् नंतर मुलाला…; मंचरमधील धक्कादायक प्रकार

आरोपी गुन्हेगारी प्रवृत्तीचा

दरम्यान आरोपी अनिकेत जाधव हा एक ढाबा चालक असून, तो गुन्हेगारी प्रवृत्तीचा आहे त्याच्यावर यापूर्वी मोबाईल चोरीच्या प्रकरणात यवत पोलीस स्टेशनमध्ये गुन्हा दाखल करण्यात आला असून, तो त्यामध्ये येरवडा जेलमध्ये अटकही होता. तसेच दुसऱ्या एका प्रकरणात त्याच्यासह त्याच्या आई-वडिलावरही गुन्हा दाखल आहे. यामध्ये त्याच्यावर विनयभंगाचा गुन्हा दाखल आहे. त्यामुळे आरोपी हा गुन्हेगारी प्रवृत्तीचा असल्याचे पोलीस निरीक्षक कुमार कदम यांनी सांगितले.