लोखंडी पाईप डोक्यात घालून हॉटेल मालकाचा खून; कारण काय तर...
पाटस : राज्यासह देशभरात गुन्हेगारीच्या घटनांमध्ये मोठी वाढ झाली आहे. दररोज वेगवेगळ्या भागात खून, खुनाचा प्रयत्न, लुटमार यासारख्या घटना उघडकीस येत असतात. वाढत्या गुन्हेगारीमुळे नागरिकांमध्ये भितीचे वातावरण निर्माण होत आहे. अशातच आता एक मोठी घटना समोर आली आहे. पुणे- सोलापूर राष्ट्रीय महामार्गात असलेल्या हॉटेल सह्याद्रीच्या शेजारी असलेल्या हॉटेल अमृत गार्डन मध्ये घरगुती कारणावरून झालेल्या वादातून हॉटेल मालकाचा लोखंडी पाईप डोक्यात घालून निघृणपणे खून केल्याची घटना घडली आहे.
या प्रकरणी पाटस पोलिसांनी संशयित आरोपी अशरफ अस्लम शेख ( वय २४ मुळ रा. सदर बाजार, सातारा, सध्या रा. हॉटेल सहयाद्री जवळ पाटस ता. दौड जि.पुणे.) याला ताब्यात घेतले आहे. विश्वास बबन उघडे ( वय अंदाजे ३१, रा. मांडवा, ता. वाशी, जि. धाराशिव ) असे खून झालेल्या व्यक्तीचे नाव आहे. ही घटना मंगळवारी (दि. १४) पहाटे ५ वाजण्याच्या सुमारास अमृत गार्डन हॉटेलमध्ये घडली आहे.
पोलिसांनी दिलेल्या माहितीनुसार, पुणे- सोलापूर महामार्गालगत मस्तानी तलावा शेजारी असलेल्या हॉटेल शेजारी असलेले अमृत गार्डन हॉटेलचे मालक विश्वास उघडे हे झोपेत असताना आरोपींनी घरगुती कारणातून झालेल्या वादाचा राग मनात धरून त्याच्या डोक्यात लोखंडी पाईपने मारहाण करुन खून केला. याबाबत सारिका सचिन गपाट ( सध्या रा. पाटील वस्ती, केसनंद, वाघोली, ता. हवेली, जि. पुणे, मुळ रा.इंदापूर, ता. वाशी, जि. धाराशिव) यांनी यवत पोलीस ठाण्यात फिर्याद दिल्याने खुनाचा गुन्हा दाखल करण्यात आला असून, संबंधित आरोपीला पोलिसांनी ताब्यात घेतले आहे. या गुन्ह्याचा अधिक तपास पोलीस उपनिरीक्षक विजय कोल्हे हे करीत आहेत.
हे सुद्धा वाचा : सांगली हादरली! २४ तासांत तिहेरी हत्याकांड; दिवसाढवळ्या रक्तस्नानाने भीतीचे सावट
पाटसमधील टोलनाक्यावर कोयता गॅंगची दहशत
पुणे– सोलापूर राष्ट्रीय महामार्गावर असलेल्या पाटस येथील टोलनाक्यावर चार-पाच जणांच्या टोळीने कोयत्यांनी टोल नाक्याची तोडफोड करत हल्ला केला आहे. या हल्ल्यात एक टोल कर्मचारी किरकोळ जखमी झाल्याची घटना घडली आहे. या प्रकरणी पाटस पोलिसांनी तीन जणांना पाठलाग करून ताब्यात घेतले असून, दोन जण फरार झाले आहेत. याबाबत प्राथमिक माहिती अशी की, पुणे- सोलापूर राष्ट्रीय महामार्गावरील पाटस टोलनाक्यावर सोमवारी ( दि. १३) सायंकाळी ५.१५ वाजण्याच्या आसपास टोल नाक्यावर लेन क्रमांक चार वर एक चार चाकी स्विफ्ट कार आली. या कार मधून चार-पाच जण हातात कोयत्यासारखे धारदार शस्त्र घेऊन खाली उतरत थेट त्यांनी टोल नाक्यावर हल्ला केला. कोयत्याने टोलनाक्याच्या काचा फोडल्या, टोल कर्मचाऱ्यावर हल्ला करण्याचा प्रयत्न केला. ही तोडफोड करून लेनवर पुढे जाऊन परत वळून पुन्हा टोलवर कोयत्याने हल्ला चढवत तोडफोड करण्यास सुरुवात केली. दरम्यान, या हल्ल्यात एका टोल कर्मचाऱ्याच्या हातावर कोयत्याचा वार बसल्याने तो किरकोळ जखमी झाल्याची घटना घडली. अचानक गाडीतून चार-पाच जण उतरतात आणि थेट कोयत्यांनी हल्ला चढवतात. या घटनेमुळे टोल नाक्यावर काही काळ महामार्गावरुन प्रवास करणारे वाहन चालक आणि प्रवासी यांच्यामध्ये काही काळ भीतीचे वातावरण निर्माण झाले होते.
.png "Videos"){kind=small}
