मालमत्तेच्या वादातून वडील-मुलावर जीवघेणा हल्ला, दोघे गंभीर जखमी; नगरसेवकासह साथीदार पसार

अकोट फैल पोलिस ठाण्याच्या हद्दीतील अकोट रोड परिसरात मालमत्तेच्या वादातून वडील आणि मुलावर प्राणघातक हल्ला केल्याचा प्रकार समोर आला आहे. या हल्ल्यात शेख युनूस आणि त्यांचा मुलगा समीर शेख युनूस हे दोघेही गंभीर जखमी झाले आहेत.

• मालमत्तेच्या वादातून वडील-मुलावर जीवघेणा हल्ला
• दोघे गंभीर जखमी
• नगरसेवकासह साथीदार पसार

अकोला : राज्यासह देशभरात गुन्हेगारी वाढली असून, अशातच आता अकोट फैल पोलिस ठाण्याच्या हद्दीतील अकोट रोड परिसरात मालमत्तेच्या वादातून वडील आणि मुलावर प्राणघातक हल्ला केल्याचा प्रकार समोर आला आहे. या हल्ल्यात शेख युनूस आणि त्यांचा मुलगा समीर शेख युनूस हे दोघेही गंभीर जखमी झाले असून, त्यांच्यावर रुग्णालयात उपचार सुरू आहेत. या प्रकरणात एका नगरसेवकासह त्याच्या साथीदारांनी हल्ला केल्याचा आरोप करण्यात आला आहे.

 

अकोट रोड परिसरात मालमत्तेच्या वादातून शेख युनूस आणि त्यांचा मुलगा समीर यांचा संबंधित नगरसेवकासोबत वाद झाला. सुरुवातीला झालेल्या शाब्दिक बाचाबाचीचे रूपांतर काही वेळातच हाणामारीत झाले. यावेळी नगरसेवकासह त्याच्या साथीदारांनी दोघांवर हल्ला केल्याचा आरोप आहे. हल्लेखोरांनी पाईपने मारहाण करण्यासोबतच चाकूने वार केल्याचे सांगण्यात येत आहे. या हल्ल्यात वडील आणि मुलगा गंभीर जखमी झाले आहेत.

या घटनेमुळे परिसरात काही काळ तणावाचे वातावरण निर्माण झाले. माहिती मिळताच अकोट फैल पोलिसांनी घटनास्थळी धाव घेतली. जखमी वडील-मुलाला तातडीने रुग्णालयात दाखल करण्यात आले असून, त्यांच्यावर वैद्यकीय उपचार सुरू आहेत. दरम्यान, हल्ल्यानंतर नगरसेवकासह त्याचे साथीदार घटनास्थळावरून पसार झाल्याचे सांगण्यात येत आहे. मालमत्तेच्या वादाची पार्श्वभूमी आणि घटनेमागील नेमके कारण यांचा तपास केला जात आहे.

हे सुद्धा वाचा : नाशिकच्या द्वारका परिसरात रक्तरंजित थरार! ३८ वर्षीय वाहनचालकाची दगडाने ठेचून हत्या

सावत्र नातवाने केली आजीची हत्या

प्रॉपर्टीमध्ये हिस्सा देत नसल्याच्या रागातून सावत्र नातवाने आपल्या ६५ वर्षीय सावत्र आजीची हत्या केल्याची धक्कादायक घटना पिंपळे गुरव येथे घडली आहे. ओंकार किसन शिंगोरे (वय २६) असे आरोपीचे नाव असून, मंगल बाबुराव शिंगोरे (वय ६५) असे मृत आजीचे नाव आहे. शुक्रवारी (दि. ९) सकाळी साडेआठ ते नऊच्या सुमारास ही घटना घडल्याची प्राथमिक माहिती आहे. पिंपळे गुरव येथील कृष्णा चौकात गणेश सहकारी बँकेच्या शेजारील इमारतीत शिंगोरे कुटुंबीय राहत होते. प्रॉपर्टीतील हिस्सा देण्याच्या मुद्द्यावरून आरोपी आणि त्याच्या सावत्र आजीमध्ये वाद होता. याच कारणातून आरोपीने आजीची हत्या केल्याची माहिती समोर आली आहे.