पुण्यातील स्वारगेट भागात तरुणावर कोयत्याने हल्ला; सपासप वार केले अन्…

स्वारगेट भागातील मुकूंदनगर परिसरात किरकोळ वादातून तरुणावर कोयत्याने वार करण्यात आल्याची घटना घडली. याप्रकरणी दोघांविरुद्ध पोलिसांनी गुन्हा दाखल केला.

पुणे : स्वारगेट भागातील मुकूंदनगर परिसरात किरकोळ वादातून तरुणावर कोयत्याने वार करण्यात आल्याची घटना घडली. याप्रकरणी दोघांविरुद्ध पोलिसांनी गुन्हा दाखल केला. यश अनिल कुंभार (रा. मीनाताई ठाकरे वसाहत, गुलटेकडी) असे जखमी झालेल्याचे नाव आहे. याप्रकरणी अक्षय आबासाहेब सरोदे, भुत्या ऊर्फ रोहित बाबासाहेब काते (दोघ रा. डायस प्लाॅट, गुलटेकडी) यांच्यावर गुन्हा दाखल केला आहे. याबाबत यश याची आई मंजू अनिल कुंभार यांनी स्वारगेट पोलीस ठाण्यात तक्रार दिली आहे.

पोलिसांच्या माहितीनुसार, यशचा अक्षय आणि रोहित यांच्याशी वाद झाला होता. यश, त्याचे मित्र निखिल भिसोरे, कैलास बनसोडे हे सोमवारी गुलटेकडीतील कटारिया शाळेसमोर मोबाइलवर गेम खेळत होते. त्यावेळी अक्षय व रोहित तेथे आले. त्यांनी यश आणि त्याच्याबरोबर असलेल्या मित्रांना शिवीगाळ केली. यशच्या पाठीवर कोयत्याने वार करून आरोपी पसार झाले. पोलीस उपनिरीक्षक अशोक पाटील अधिक तपास करत आहेत.

हे सुद्धा वाचा : ओव्हरलोड वाहतुकीमुळे अपघाताचा धोका; जीवावर बेतणाऱ्या ऊस वाहतुकीतून पैसा मिळवायचा की मृत्यू?

दोन तरुणांवर कोयत्याने वार

गेल्या काही दिवसाखाली भरदुपारी कर्वे रस्त्यावरील प्रसिद्ध महाविद्यालय परिसरात फिल्मीस्टाईल टोळक्याने हातात कोयते घेऊन पाठलाग करत दोन तरुणांवर कोयत्याने वार केले. यात एका तरुणाची प्रकृती चिंताजनक असून, त्याच्यावर अतिदक्षता विभागात उपचार सुरू आहेत. तर, दुसऱ्याला डोक्यात वार करून जखमी केले आहे. भरदुपारी घडलेल्या याघटनेमुळे महाविद्यालय परिसरात चांगलाच गोंधळ निर्माण झाला होता. धक्कादायक म्हणजे, मैत्रिणीबद्दल अफवा पसरवतोय या संशयावरून टोळक्याने वार केले आहेत. घटनेची माहिती मिळताच परिमंडळ एकचे उपायुक्त संदिपसिंह गिल्ल व डेक्कन पोलीस घटनास्थळी दाखल झाले. पोलिसांनी जखमी असलेल्या तरुणांकडे चौकशी केली आहे. त्यानुसार गुन्हा दाखल करण्याची प्रक्रिया सुरू आहे. दरम्यान, पसार झालेल्या तरुणांचा शोध घेतला जात आहे.

राज्यात गुन्हेगारीचे प्रमाण वाढले

राज्यात गुन्हेगारीचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली छत्रपती संभाजीनगरमध्ये जुन्या भांडणाच्या कारणातून 26 वर्षीय तरुणाचा धारदार शस्त्राने खून करण्यात आला. ही घटना सोमवारी (दि.2) सायंकाळी हसूल परिसरातील कारागृहाच्या बाजूच्या मैदानावर घडली. दिनेश उर्फ बबलू परमानंद मोरे (वय 26, रा. चेतनानगर, हसूल) असे मृत तरुणाचे नाव आहे. याप्रकरणी आरोपी अनिकेत गायकवाड व गणेश सोनवणे यांची नावे समोर आली असून, शोधासाठी चार पथके रवाना झाली. या हत्येप्रकरणामुळे परिसरात एकच खळबळ उडाली आहे.