पॉलिग्राफ चाचणी दरम्यान आफताबला विचारले ४० प्रश्न; ‘या’ रहस्यांचा झाला उलगडा

पोलिसांना आफताबच्या भाड्याच्या घरातून ५ सुरे सापडले आहेत. पण, श्रद्धाच्या मृतदेहाची विल्हेवाट लावण्यासाठी त्यानं वापरलेलं हत्यार मात्र अजूनही सापडू शरलेलं नाही. पोलिसांनी दिलेल्या माहितीनुसार सध्याच्या घडीला घरातून सापडलेले सुरे पुढील तपासणीसाठी FSL कडे पाठवण्यात आले आहेत.

श्रद्धा वालकर हत्या प्रकरणानंतर संपूर्ण देश हादरला असून या प्रकरणी नवनवीन खुलासे समोर येत आहेत. अतिशय क्रूरतेनं श्रद्दाचा जीव घेत तिच्या मृतदेहाचे ३५ तुकडे करणाऱ्या आफताब पूनावाला याची नुकतीच  पॉलिग्राफ चाचणी करण्यात आली. शुक्रवारी तब्बल ८ तासांसाठी फॉरेन्सिक सायन्स लॅबोरेटरी (FSL) नवी दिल्ली यांच्यातर्फे ही चाचणी करण्यात आली असून यावेळी आफताबवर प्रश्नांचा भडीमार करण्यात आला. श्रद्धाशी प्रस्थापित झालेल्या प्रेम संबंधांपासून ते तिच्या हत्येपर्यंत इत्यादींशी निगडित तब्बल ४० प्रश्न त्याला विचारण्यात आले.

FSL शी संलग्न सूत्रांनी दिलेल्या माहितीनुसार आफताबला त्या एका क्षणाबाबतही प्रश्न करण्यात आला, जेव्हा श्रद्धाला जीवे मारण्याचा विचार त्याच्या मनात आला. श्रद्धाची हत्या करण्याचा कट पूर्वनियोजित होता, की हत्येच्याच वेळी मनात असणाऱ्या क्रूर भावनेतून हे कृत्य केलं? असे प्रश्न त्याला विचारण्यात आला. तपास यंत्रणांना या चाचणीतून बरीच माहिती मिळाल्याचं कळत आहे. यावेळी श्रद्धा वालकर प्रकरणामध्ये आफताबला घटनाक्रमही विचारण्यात आला.

श्रद्धाशी ओळख झाल्यापासून रिलेशनशिपमध्ये येईपर्यंत आणि त्यानंतरच्या दिवसांपर्यंतचे सर्व संबंधित प्रश्न त्याला विचारण्यात आले. हत्या करण्यासाठी वापरण्यात आलेली हत्यारं आणि त्यानंतर मृतदेहाची विल्हेवाट लावण्यालाठी केलेल्या कृत्यासंबंधीच्या प्रश्नांचा भडीमार त्याच्यावर करण्यात आला. डेटिंगच्या दिवसापासून मृतदेहाची विल्हेवाट लावण्याच्या दिवसापर्यंत सर्व माहिती आफताबकडून काढण्यासाठी यावेळी यंत्रणेनं सापळा रचला होता.

दरम्यान, पोलिसांना आफताबच्या भाड्याच्या घरातून ५ सुरे सापडले आहेत. पण, श्रद्धाच्या मृतदेहाची विल्हेवाट लावण्यासाठी त्यानं वापरलेलं हत्यार मात्र अजूनही सापडू शरलेलं नाही. पोलिसांनी दिलेल्या माहितीनुसार सध्याच्या घडीला घरातून सापडलेले सुरे पुढील तपासणीसाठी FSL कडे पाठवण्यात आले आहेत.