Beed: चोरीनंतर तलावाकाठी केली दागिन्यांची वाटणी; पुरावे पाण्यात, मात्र पोलिसांच्या हाती लागला डीव्हीआर

दागिने वाटून चोरट्यांनी सीसीटीव्हीचा डीव्हीआर तलावात फेकला; मात्र पोलिसांनी तो शोधून काढत घरफोडीचा छडा लावला. ५३ तोळे सोने, पावणेदोन किलो चांदीच्या चोरीप्रकरणी दोघे जेरबंद; तिसऱ्याचा शोध सुरू.

• ५३ तोळे सोने, पावणेदोन किलो चांदीची चोरी
• तलावात फेकलेला डीव्हीआर पोलिसांच्या हाती
• दोन आरोपी जेरबंद; तिसऱ्याचा शोध सुरू 

 

बीड : अंबाजोगाई शहरातील व्यापाऱ्याचे बंद घर फोडून ५३ तोळे सोने, पावणेदोन किलो चांदी आणि साडेपाच लाखांची रोकड लंपास करणाऱ्या टोळीचा स्थानिक गुन्हे शाखेने छडा लावला आहे. पोलिसांनी दोन आरोपींना अटक केली असून, त्यांच्याकडून २७ तोळे सोने आणि ८५८ ग्रॅम चांदी जप्त केली आहे. या प्रकरणातील तिसरा आरोपी फरार आहे. विशेष म्हणजे चोरीनंतर सीसीटीव्हीचा डीव्हीआर तलावात फेकून दिला होता. पोलिसांनी तो शोधून काढल्याने तपासाला महत्त्वाची दिशा मिळाली.

हेही वाचा: रिल्समधून दागिन्यांची माहिती देणे पडले महागात; सोशल मीडिया इन्फ्लुएन्सरच्या घरातून ११८ तोळे सोने लंपास

५० हून अधिक सीसीटीव्ही फुटेज तपासले

अंबाजोगाईतील व्यापारी सारडा यांच्या बंद घरात २० सप्टेंबर रोजी चोरी झाली होती. घरातील सोन्या-चांदीच्या दागिन्यांसह रोकड चोरीला गेल्यानंतर पोलिसांनी तपास सुरू केला. स्थानिक गुन्हे शाखेच्या पथकाने परिसरातील ५० हून अधिक सीसीटीव्ही कॅमेऱ्यांचे फुटेज तपासले. त्यातून तीन संशयित दुचाकीवरून फिरताना दिसून आले. तांत्रिक तपासाच्या आधारे पोलिसांनी परळी परिसरात सापळा रचून अमर काकासाहेब थोरात आणि जगजितसिंग अचलसिंग दुधानी यांना ताब्यात घेतले. चौकशीत चोरीनंतर तिघांनी तलावाजवळ दागिन्यांची वाटणी केल्याचे समोर आले.

पुरावे तलावात फेकले

चोरी केल्यानंतर आरोपींनी वापरलेले हातमोजे, जॅकेट, कपडे तसेच सीसीटीव्हीचा डीव्हीआर तलावात फेकून दिला होता. पोलिसांनी तलावात शोधमोहीम राबवून डीव्हीआर हस्तगत केला. हा पुरावा तपासासाठी महत्त्वाचा ठरला. पोलिसांच्या माहितीनुसार, अमर थोरात रिक्षाचालक असून त्याने व्यापाऱ्याचे घर हेरले होते. त्यानंतर साथीदारांच्या मदतीने चोरीचा कट रचण्यात आला. कौटुंबिक आर्थिक गरजेतून त्याने हा गुन्हा केल्याचे प्राथमिक तपासात समोर आले आहे.

हेही वाचा: वृंदावनमध्ये चौथ्या मजल्यावरून पडल्याने २५ वर्षीय रसिक दुलारीचा मृत्यू; खोलीत रक्ताचे डाग असलेले ग्राइंडर, सीसीटीव्ही फुटेज पोलिसा

तिसरा आरोपी फरार

या प्रकरणातील मंगलसिंग बावरी हा तिसरा आरोपी अद्याप फरार आहे. त्याचा शोध घेण्यासाठी पोलिसांची पथके कार्यरत आहेत. चोरीची सुमारे साडेपाच लाख रुपयांची रोकडही अद्याप हस्तगत झालेली नाही. अटक आरोपी जगजितसिंग दुधानी याच्यावर यापूर्वी दरोडा, चोरी आणि घरफोडीसह दहा हून अधिक गंभीर गुन्हे दाखल असल्याचे पोलिसांनी सांगितले. तो परभणी आणि लातूर जिल्ह्यांतील चोरीच्या काही प्रकरणांतही फरार होता. या टोळीविरुद्ध मकोका, हद्दपारी तसेच इतर लागू कायद्यांनुसार कारवाई केली जाणार असल्याची माहिती बीडचे पोलिस अधीक्षक नवनीत कावत यांनी दिली. पुढील तपास सुरू आहे.