दारूसाठी पैसे मागितले, नकार मिळताच आई-वडिलांवर हल्ला; भोसरीतील धक्कादायक घटना

दारू पिण्यासाठी पैसे न दिल्याच्या रागातून एका मुलाने आपल्याच जन्मदात्या आई-वडिलांवर जीवघेणा हल्ला केल्याची धक्कादायक घटना भोसरी परिसरात घडली आहे. या घटनेने परिसरात संतापाची लाट पसरली आहे.

• दारूसाठी पैसे न दिल्याने आई-वडिलांवर हल्ला
• भोसरीतील श्रीरामनगरमध्ये घडली घटना
• राहुल तळोले याला पोलिसांकडून अटक

पिंपरी-चिंचवड : दारू पिण्यासाठी पैसे न दिल्याच्या रागातून एका मुलाने आपल्याच जन्मदात्या आई-वडिलांवर जीवघेणा हल्ला केल्याची धक्कादायक घटना भोसरी परिसरात घडली आहे. या घटनेने परिसरात संतापाची लाट पसरली आहे. ही घटना गुरुवारी (८ ऑक्टोबर) रात्री ९ वाजण्याच्या सुमारास श्रीरामनगर, चक्रपाणी वसाहत, भोसरी येथे घडली आहे. याप्रकरणी राहुल प्रल्हाद तळोले (वय ४५, रा. भोसरी) याला भोसरी पोलिसांनी अटक केली आहे. त्याच्या ६३ वर्षीय आईने याबाबत भोसरी पोलीस ठाण्यात फिर्याद दाखल केली आहे.

 

पोलिसांनी दिलेल्या माहितीनुसार, आरोपी राहुल तळोले हा दारूच्या व्यसनाच्या आहारी गेला आहे. घटनेच्या रात्री त्याने वडील प्रल्हाद तळोले यांच्याकडे दारू पिण्यासाठी पैशांची मागणी केली. वडिलांनी पैसे देण्यास नकार दिल्याने त्याने शिवीगाळ सुरू केली. रागाच्या भरात त्याने वडिलांना लाथाबुक्क्यांनी बेदम मारहाण केली आणि छातीवर लाथ मारली. इतक्यावरच तो थांबला नाही, तर त्याने थेट स्वयंपाकघरातून धारदार चाकू आणून वडिलांवर जीवे मारण्याच्या उद्देशाने वार करण्याचा प्रयत्न केला. हे भांडण सोडवण्यासाठी आई मध्ये पडल्या असता, चाकूचा वार त्यांच्या डाव्या हाताच्या मनगटावर बसला आणि त्या गंभीर जखमी झाल्या. यानंतर आरोपीने आईच्या पोटात लाथ मारून त्यांना ढकलून दिले.

वडील प्रल्हाद तळोले यांना वाचवण्यासाठी आई पुन्हा धावून गेल्या असता, आरोपीने वडिलांच्या डाव्या डोळ्यावर बुक्कीने जोरदार प्रहार केला आणि जीवे ठार मारण्याचा प्रयत्न केला. या घटनेनंतर जखमी आईने धाडस करून भोसरी पोलीस ठाण्यात धाव घेत फिर्याद दिली. पोलिसांनी तात्काळ कारवाई करत आरोपी राहुल तळोले याला अटक केली आहे. जखमी दाम्पत्यावर खासगी रुग्णालयात उपचार सुरू आहेत. भोसरी पोलिसांनी या प्रकरणी खुनाचा प्रयत्नासह विविध कलमांखाली गुन्हा दाखल केला असून, पुढील तपास पोलीस उपनिरीक्षक करत आहेत. दारूच्या व्यसनामुळे कुटुंबात किती टोकाची भांडणे होऊ शकतात, याचे हे विदारक उदाहरण समोर आले आहे.

हे सुद्धा वाचा : नेवासे गोळीबार प्रकरणात पोलिसांची मोठी कारवाई; आणखी तीन आरोपी जेरबंद; अटकेतील आरोपींची संख्या सहावर