नेवासे गोळीबार प्रकरणात पोलिसांची मोठी कारवाई; आणखी तीन आरोपी जेरबंद; अटकेतील आरोपींची संख्या सहावर

नेवासे बुद्रुक परिसरातील नागफणी येथील रमेश छगन भोसलेवर शनिवार दिनांक १० रोजी पहाटे पाच वाजेच्या दरम्यान झालेल्या हल्ला व गोळीबार प्रकरणातील तीन आरोपींना स्थानिक गुन्हे शाखेच्या पोलिसांनी तीघांना जेरबंद केले आहे.

• नेवासे गोळीबार प्रकरणात पोलिसांची मोठी कारवाई
• आणखी तीन आरोपी जेरबंद
• अटकेतील आरोपींची संख्या सहावर

नेवासे : नेवासे बुद्रुक परिसरातील नागफणी येथील रमेश छगन भोसलेवर शनिवार दिनांक १० रोजी पहाटे पाच वाजेच्या दरम्यान झालेल्या हल्ला व गोळीबार प्रकरणातील तीन आरोपींना स्थानिक गुन्हे शाखेच्या पोलिसांनी तीघांना जेरबंद केले आहे. या गुन्ह्यातील एकूण दहापैकी आत्तापर्यंत सहा आरोपीना अटक करण्यात आली आहे. या गुन्ह्यातील प्रमुख आरोपी कल्याण चव्हाण, कुणाल चव्हाण, अभिषेक चव्हाण व इतर ७ आरोपी अशांनी मिळून पोलीसांना माहिती देतो का असे म्हणून बंदुकीने रमेश भोसले याचे पाठीत गोळी मारली. तसेच कोयत्याने, चाकुने, कुऱ्हाडीने रमेश याचे डोक्यावर, हातावर, पोटावर, पायावर वार केले.

 

स्थानिकच्या पोलिसांनी यांना घेतले ताब्यात

इतर आरोपींनी लाकडी दांडक्याने मारहाण केली होती. याप्रकरणी नेवासे पोलीसांत गुन्हा दाखल होताच स्थानिक गुन्हे शाखेचे पोलीस निरीक्षक संतोष मुटकुळे यांच्या सूचनेनुसार गुन्हे शाखेच्या पथकाने तांत्रीक विश्लेषणाच्या आधारे वाळूज परिसरात आरोपीचा शोध घेऊन उमेश हरिसिंग भोसले (वय २८, रा. बाभुळखेडा, ता. नेवासे), आकाश गौतम चव्हाण, (वय २०, रा. इमामपूरवाडी, ता. पैठण, जि. छ. संभाजीनगर) यांना ताब्यात घेतले. गुन्हयातील इतर आरोपीचा नेवासे परिसरात शोध घेत असताना कुणाल कल्याण चव्हाण (वय ३४, रा. जळके खु. ता. नेवासे) हा मिळून आल्याने त्याला ताब्यात घेतले. दरम्यान, ताब्यातील आरोपी उमेश हरिसिंग भोसले हा सराईत आरोपी असून, त्याच्यावर यापुर्वी वाळुंज, जिल्हा छत्रपती संभाजीनगर येथे दोन गुन्हे दाखल आहेत. या आरोपींना तपासकामी नेवासे पोलीसांत हजर करण्यात आले असून, गुन्हयाचा पुढील तपास नेवासे पोलीस करीत आहेत.

हे सुद्धा वाचा : पिंपरीत भीषण अपघात! ट्रॅक्टर-दुचाकीच्या धडकेत चिमुकलीचा मृत्यू; आई-वडील गंभीर जखमी

या पथकाची कामगिरी 

पोलीस निरीक्षक संतोष मुटकुळे यांचे मार्गदर्शनाखाली पोलीस उपनिरीक्षक संदिप दरवडे, पोलीस अंमलदार बाळासाहेब नागरगोजे, अशोक लिपणे, आजिनाथ पाखरे, रोहित येमुल, बाळासाहेब खेडकर, रमीजराजा आत्तार, सागर ससाणे, प्रशांत राठोड व अरूण मोरे यांनी आरोपींना अटक केली आहे.