पुण्यात तरुणावर कोयत्याने सपासप वार, सिमेंटच्या गट्टूनेही मारहाण; नेमकं काय घडलं?

“आमच्याकडे रागाने का बघतोस?” असा जाब विचारत आरोपींनी तरुणाला मारहाण करून गंभीर जखमी केले आहे. याप्रकरणी दापोडी पोलीस ठाण्यात तीन जणांविरुद्ध गुन्हा दाखल करण्यात आला आहे.

• राज्यासह देशभरात गुन्हेगारी वाढली
• पुण्यात तरुणावर कोयत्याने सपासप वार
• सिमेंटच्या गट्टूनेही मारहाण

पिंपरी : राज्यासह देशभरात गुन्हेगारी वाढली आहे. खून, हाणामाऱ्या, लुटमार, दरोडे यासारख्या घडणाऱ्या घटनांमुळे नागरिक त्रस्त होत आहेत. अशातच आता पुण्यातून एक मोठी बातमी आली आहे. कासारवाडी परिसरात एका तरुणावर किरकोळ कारणावरून तिघांनी कोयत्याने जीवघेणा हल्ला केल्याची धक्कादायक घटना बुधवारी (दि. २६) रात्री पावणे बारा वाजण्याच्या सुमारास घडली आहे. “आमच्याकडे रागाने का बघतोस?” असा जाब विचारत आरोपींनी पीडित तरुणाला मारहाण करून गंभीर जखमी केले आहे.

याप्रकरणी दापोडी पोलीस ठाण्यात तीन जणांविरुद्ध गुन्हा दाखल करण्यात आला आहे. संकेत सचिन भोसले (वय २१, रा. बाराथे वस्ती, आंबेडकर चौक, बौद्ध विहार शेजारी, भाऊ पाटील रोड, बोपोडी) असे जखमी तरुणाचे नाव असून त्यांनी गुरुवारी (दि. २७) पोलिसांकडे तक्रार दिली आहे. विक्रम देवकुळे, गणेश बावधाने उर्फ ‘काचडी गण्या’ आणि निलेश शिवगण (सर्व रा. पडाळवस्ती, भाऊ पाटील रोड, औंध रोड, बोपोडी) अशी आरोपींची नावे आहेत.

पोलिसांनी दिलेल्या माहितीनुसार, बुधवारी रात्री साडेअकरा ते बारा दरम्यान संकेत भोसले आपल्या दुचाकीवरून बोपोडीकडे जात होते. त्याचवेळी आरोपी तिघांनी दुचाकीवरून मागून येत त्यांना अडवले. “आमच्याकडे घुरून का बघतो?” अशी आरडाओरड करत त्यांनी फिर्यादीला शिवीगाळ केली.

यानंतर आरोपी विक्रम आणि गणेश यांनी कोयता काढून “तुला ठार मारतो” अशी धमकी देत त्यांच्या गळ्यावर वार करण्याचा प्रयत्न केला. संकेत यांनी हात आडवा घालून वार झेलला. त्यानंतर आरोपींनी त्यांच्यावर डोक्यावर, हातांवर आणि पायांवर कोयत्याने वार केले. एवढ्यावरच न थांबता दोन्ही हातांना चावे घेत त्यांना गंभीर दुखापत केली. आरोपी निलेश शिवगण याने तर सिमेंटच्या गट्टूने मारहाण केली.