प्रेयसीच्या अंगावर कार घालून प्रियकराने केला खून; सीसीटीव्हीमुळे उघड झाला आरोपीचा बनाव

सांजेगाव परिसरातील 'हिरवी मिरची रिसॉर्ट' येथे लोखंडी गेट अंगावर पडल्याने महिलेचा अपघाती मृत्यू झाल्याचा बनाव पोलिसांनी उघडा पाडला आहे. याप्रकरणी वाडीवहे पोलिसांनी आरोपीवर गुन्हा दाखल केला आहे.

नाशिक : सांजेगाव परिसरातील ‘हिरवी मिरची रिसॉर्ट’ येथे लोखंडी गेट अंगावर पडल्याने महिलेचा अपघाती मृत्यू झाल्याचा बनाव पोलिसांनी उघडा पाडला आहे. हा अपघात नसून प्रियकराने रागाच्या भरात अंगावर चारचाकी वाहन घालून प्रेयसीचा खून केल्याचे तपासात निष्पन्न झाले आहे. याप्रकरणी वाडीवहे पोलिसांनी संशयित प्रियकर दीपक शिवाजी सौंदाणे (वय ४३) याच्याविरुद्ध खुनाचा गुन्हा दाखल करून अटक केली आहे. रुपाली निलेश पाटील (३४) असे मृत महिलेचे नाव आहे. सोमवारी (दि. १८) रोजी दुपारी ही घटना घडली आहे.

रुपाली पाटील या सोनोग्राफी सेंटरमध्ये काम करत होत्या तर दीपक अंबड एमआयडीसीतील एका कंपनीत कार्यरत होता. गेल्या दोन अडीच वर्षांपासून त्यांच्यात प्रेमसंबंध होते. घटनेच्या दिवशी दीपक चारचाकीतून रुपाली यांना सांजेगाव येथील रिसॉर्टमध्ये घेऊन गेला होता. तेथे दोघांमध्ये वाद झाला. रिसॉर्टच्या प्रवेशद्वाराजवळ रुपाली गाडीतून उतरून लोखंडी गेट उघडत असताना दीपकने रागाच्या भरात तिच्या अंगावर कार घातली. यात गंभीर जखमी होऊन रुपाली यांचा जागीच मृत्यू झाला.

हे सुद्धा वाचा : अल्पवयीन मुलीवर 4 जणांचा अत्याचार, पन्नास रुपयाचे आमिष दाखवले अन्…; हिंगोलीतील संतापजनक घटना

सीसीटीव्हीमुळे उघड झाला बनाव

सुरुवातीला अपघात असल्याचे भासवण्यात आले; मात्र पोलिसांनी रिसॉर्टचे सीसीटीव्ही फुटेज, फॉरेन्सिक तपास आणि तांत्रिक विश्लेषणाद्वारे संशयित दीपककडे कसून चौकशी केली असता त्याने गुन्ह्याची कबुली दिली. पोलीस निरीक्षक धीरज महाजन यांच्या मार्गदर्शनाखाली हा तपास करण्यात आला आहे. मयत रुपाली पाटील यांच्या पश्चात पती, मुलगी आणि सासू-सासरे असा परिवार असून, त्यांच्या मूळ गावी (विखरण, ता. शिरपूर, जि. धुळे) शोकाकुल वातावरणात अंत्यविधी करण्यात आला.

तिकीट विक्री केंद्रात रेल्वे कर्मचाऱ्यावर हल्ला

पुणे रेल्वे स्थानकाच्या आवारातील तिकिट विक्री केंद्रातील कर्मचाऱ्यावर चाकूने वार करुन रोकड लुटून नेल्याची प्रकार समोर आला आहे. ही घटना मंगळवारी मध्यरात्री घडली असून, चोरट्यांनी चाकूने वार केल्याने रेल्वे कर्मचारी जखमी झाला आहे. रेल्वे कर्मचाऱ्याच्या गळ्यातील सोनसाखळी, मोबाइल, तसेच तिकिट विक्रीतून जमा झालेली २६ हजारांची रोकड असा ४ लाख ९१ हजार रुपयांचा मुद्देमाल लुटून नेला आहे. केल्विन सोलोमन मायला (वय २९, रा. धायरकर कॉलनी, मुंढवा) असे जखमी झालेल्याचे नाव आहे. याप्रकरणी बंडगार्डन पोलिसांत दोन चोरट्यांविरुद्ध गुन्हा दाखल करण्यात आला आहे.