एकनाथ खडसेंच्या फार्महाऊसवर ड्रोनद्वारे रेकी! पोलिसांकडे तक्रार; घटना कॅमेऱ्यात कैद
जळगाव : राष्ट्रवादी काँग्रेसचे (शरदचंद्र पवार पक्ष) ज्येष्ठ नेते, माजी मंत्री तथा आमदार एकनाथ खडसे यांच्या मुक्ताईनगर येथील ‘खडसे फार्म’वर अज्ञात व्यक्तीकडून रात्रीच्या वेळी ड्रोनद्वारे संशयास्पद चित्रीकरण करण्यात आल्याचा गंभीर प्रकार उघडकीस आला आहे. आपल्याविरोधात मोठे षडयंत्र रचले जात असल्याची तीव्र शंका व्यक्त करीत आमदार खडसे यांनी जळगावचे पोलिस उपअधीक्षकांकडे पत्राद्वारे तक्रार दाखल केली आहे. याशिवाय उच्चस्तरीय चौकशी करण्याची मागणी केली आहे.
मिळालेल्या माहितीनुसार, राष्ट्रीय महामार्ग क्रमांक सहाजवळ मलकापूर रोडवरील खडसे फार्महाऊसवर २८ सप्टेंबरला रात्री ७.५० ते ८.१५ च्या दरम्यान अचानक एक ड्रोन घिरट्या घालताना दिसून आले. या ड्रोनद्वारे फार्महाऊस परिसराचे चित्रीकरण केले जात होते. घटनेच्या वेळी आमदार खडसे हे मुंबई दौऱ्यावर होते. मात्र, फार्महाऊसवर कार्यरत असलेले रखवालदार सचिन मराठे यांना ही घटना लक्षात आली. त्यांनी प्रसंगावधान राखून आपल्या मोबाइलमध्ये या संपूर्ण प्रकाराचे व्हिडिओ रेकॉर्डिंग करून पुरावा म्हणून जतन केला आहे.
या प्रकरणाचे गांभीर्य लक्षात घेऊन पोलिस मुख्यालयातील उपअधीक्षकांसह मुक्ताईनगर पोलिस ठाण्याचे निरीक्षक व उपविभागीय अधिकाऱ्यांना पत्राची प्रत पाठविली आहे. फार्महाऊसवर ड्रोनद्वारे रेकी करणाऱ्या व्यक्तींचा शोध घेऊन या संपूर्ण प्रकरणाची सखोल व उच्चस्तरीय चौकशी आणि दोषींवर कारवाई करत अहवाल सादर करावा, अशी मागणी आहे.
हे तर माझ्याविरोधातील मोठे षडयंत्र
घटनेबाबत बोलताना आमदार खडसे यांनी आपल्या सुरक्षेबाबत गंभीर चिंता व्यक्त केली आहे. रात्रीच्या वेळी अशाप्रकारे विनापरवाना ड्रोन उडवून रेकी करणे ही अत्यंत गंभीर बाब आहे. यापूर्वी देखील माझी कोणतीही परवानगी न घेता सलग ६२ दिवस माझे मोबाईल फोन बेकायदेशीरपणे टॅप करण्यात आले होते, ज्याबाबत मी मुंबईतील पोलिस ठाण्यात तक्रार नोंदवली आहे. आता पुन्हा असा प्रकार घडत असल्याने माझ्याविरोधात कुठेतरी मोठे षडयंत्र रचले जात असावे, असा आरोप आमदार खडसे यांनी केला आहे.
हे सुद्धा वाचा : भवानी पेठेत किरकोळ वादातून तरुणाची हत्या; डोक्यात सिमेंटचा ब्लॉक घालून संपवलं
.png "Videos"){kind=small}
