आम्ही इथले डॉन आहोत, तुला येथे राहायचे असेल तर…; संभाजीनगरात परप्रांतीय कामगारावर हल्ला

तू बाहेरून आला आहेस, आम्ही इथले डॉन आहोत. तुला येथे राहायचे असेल तर हप्ता द्यावा लागेल, अशी धमकी देत तडीपार गुंडाच्या टोळीने परप्रांतीय मजुराला मारहाण केल्याचा प्रकार समोर आला आहे.

छत्रपती संभाजीनगर : तू बाहेरून आला आहेस, आम्ही इथले डॉन आहोत. तुला येथे राहायचे असेल तर हप्ता द्यावा लागेल, अशी धमकी देत तडीपार गुंडाच्या टोळीने परप्रांतीय मजुराला मारहाण केल्याचा प्रकार समोर आला आहे. हप्ता देण्यास नकार दिल्याने त्याच्या हातावर चाकूने वार करून खिशातील २ हजार रुपये लुटले आहेत. ही घटना मंगळवारी (१८ ऑगस्ट) रात्री ९.३० वाजेच्या सुमारास मुकुंदवाडीतील संजयनगर येथे घडली आहे. या प्रकरणी चौघांविरुद्ध दरोडा, मारहाण व धमकीचा गुन्हा दाखल करण्यात आला आहे.

तडीपार गुंड सिद्धार्थ सोनवणे ऊर्फ सिध्या आणि रेकॉर्डवरील गुन्हेगार युवराज चव्हाण ऊर्फ लल्या यांना अटक करण्यात आली आहे. दोघे साथीदार पसार आहेत. अटक आरोपींना एक दिवसांची पोलिस कोठडी सुनावण्यात आल्याची माहिती पोलिस निरीक्षक विवेक सोनवणे यांनी दिली.

फिर्यादी मनबहादूर भिमबहादूर थापा (४८, रा. संजयनगर) हे चिकलठाणा येथील नम्रता केटरिंगमध्ये काम करतात. १८ ऑगस्ट रोजी रात्री ते बाजारात जाण्यासाठी घराबाहेर उभे असताना युवराज, सिद्धार्थ व त्यांचे दोन साथीदार तेथे आले. त्यांनी मनबहादूर यांना पकडून हप्ता मागितला. त्यांनी आपण गरीब असल्याचे सांगून सोडण्याची विनंती केली; मात्र आरोपींनी शिवीगाळ करत मारहाण केली. मनबहादूर यांचा आरडाओरडा ऐकून मित्र मदतीला आले. त्यावेळी सिद्धार्थने मध्ये पडल्यास तुमचाही गेम करून टाकू, अशी धमकी दिली. त्यानंतर चौघांनी मनबहादूर यांना खाली पाडून लाथाबुक्क्यांनी मारहाण केली व दोन हजार रूपये हिसकावून पोबारा केला.

हे सुद्धा वाचा :  मायमर रुग्णालयात शिक्षिकेसह नवजात बाळाचा मृत्यू; उपचारातील हलगर्जीपणाच्या आरोपांनी खळबळ

तिकीट विक्री केंद्रात रेल्वे कर्मचाऱ्यावर हल्ला

पुणे रेल्वे स्थानकाच्या आवारातील तिकिट विक्री केंद्रातील कर्मचाऱ्यावर चाकूने वार करुन रोकड लुटून नेल्याची प्रकार समोर आला आहे. ही घटना मंगळवारी मध्यरात्री घडली असून, चोरट्यांनी चाकूने वार केल्याने रेल्वे कर्मचारी जखमी झाला आहे. रेल्वे कर्मचाऱ्याच्या गळ्यातील सोनसाखळी, मोबाइल, तसेच तिकिट विक्रीतून जमा झालेली २६ हजारांची रोकड असा ४ लाख ९१ हजार रुपयांचा मुद्देमाल लुटून नेला आहे. केल्विन सोलोमन मायला (वय २९, रा. धायरकर कॉलनी, मुंढवा) असे जखमी झालेल्याचे नाव आहे. याप्रकरणी बंडगार्डन पोलिसांत दोन चोरट्यांविरुद्ध गुन्हा दाखल करण्यात आला आहे.