सासरच्या छळाला कंटाळून हिनाने संपवले जीवन; पतीसह तिघांवर पोलिसांची मोठी कारवाई

राज्यात आत्महत्येच्या घटनांमध्ये वाढ झाली असून, अशातच आता सासरकडून होणाऱ्या सततच्या त्रासाला कंटाळून विवाहितेने राहत्या घरी आत्महत्या केली आहे. ही घटना १७ ऑक्टोबरला लोणीकंदजवळील भरतवाडी, पिंपरी सांडस गावात घडली.

• कौटुंबिक छळाला कंटाळून महिलेची आत्महत्या
• लोणीकंदजवळील पिंपरी सांडसमधील घटना
• पोलिसांनी तिघांना केली अटक

पुणे : राज्यात आत्महत्येच्या घटनांमध्ये वाढ झाली असून, अशातच आता सासरकडून होणाऱ्या सततच्या त्रासाला कंटाळून विवाहितेने राहत्या घरी आत्महत्या केली आहे. ही घटना १७ ऑक्टोबरला लोणीकंदजवळील भरतवाडी, पिंपरी सांडस गावात घडली. माहेरहून पैशांची मागणीसह कौटुंबिक छळ होत असल्याचे तक्रारीत म्हंटले आहे. महिलेला आत्महत्येस प्रवृत्त केल्याप्रकरणी पोलिसांनी पतीसह तिघांना अटक केली आहे.

हिना असिफ पटेल (वय २१ रा. भरतवाडी, पिंपरी-सांडस, बागवान वस्ती, हवेली) असे आत्महत्या केलेल्या विवाहितेचे नाव आहे. याप्रकरणी तिचा पती आसिफ मशाक पटेल (वय २५) साहेरा  बेगम मशाक पटेल (सासू, वय ४२)  सिदीप मशाक पटेल (दीर, वय २३) यांना लोणीकंद पोलिसांनी अटक केली आहे. तर नणंदविरुद्ध गुन्हा दाखल करण्यात आला आहे. शमीम मुसा शेख (वय ४० रा. मातोजीनगर, पिंपरी-चिंचवड) यांनी लोणीकंद पोलिसांत तक्रार दिली आहे.

पोलिसांच्या माहितीनुसार, तक्रारदार शमीम शेख यांची मुलगी हिना आणि आसिफ यांचा ३० मे २०२४ रोजी निकाह झाला होता. त्यानंतर हिना सासरी नांदत असताना काही महिन्यांनी आरोपींनी तिला त्रास द्यायला सुरूवात केली. माहेरहून पैसे आणण्याचा तगादा सुरु केला. सततच्या त्रासाला कंटाळून हिनाने १७ ऑक्टोबरला राहत्या घरी गळफास घेउन आत्महत्या केली. तिला आत्महत्या करण्यास प्रवृत्त केल्याप्रकरणी पतीसह दीर, सासूला लोणीकंद पोलिसांनी अटक केली आहे. याप्रकरणी सहायक पोलीस निरीक्षक विलास मोटे तपास करीत आहेत.

हे सुद्धा वाचा : मद्यधुंद महिलेचा धिंगाणा! महिला पोलिस कर्मचाऱ्याच्या लगावली कानशिलात; पुण्यातील प्रकार

नांदेडमध्येही विवाहितेची आत्महत्या

माहेरहून ५० हजार रुपये आणण्यासाठी सासरच्या मंडळींकडून होत असलेल्या कथित शारीरिक व मानसिक छळाला कंटाळून विवाहितेने गळफास घेऊन आत्महत्या केल्याची घटना गेल्या काही दिवसाखाली विष्णुनगर येथे घडली आहे. अश्विनी महेश भुसारे असे मृत विवाहितेचे नाव आहे. पोलिसांनी दिलेल्या माहितीनुसार, पती महेश नारायण भुसारे, विशाल नारायण भुसारे आणि प्रयागबाई नारायण भुसारे यांनी संगनमताने अश्विनी यांच्याकडे माहेरहून ५० हजार रुपये आणण्यासाठी वारंवार तगादा लावला. पैसे न आणल्यास जीवे मारण्याची धमकी देत मानसिक व शारीरिक त्रास दिल्याचा आरोप फिर्यादीत करण्यात आला आहे. या सततच्या त्रासाला कंटाळून अश्विनी यांनी राहत्या घरी गळफास घेऊन आत्महत्या केली आहे. या प्रकरणी त्यांचे भाऊ गोपाळ नामदेव नाटकर यांच्या फिर्यादीवरून शिवाजीनगर ठाण्यात गुन्हा दाखल करण्यात आला आहे.