मंगळवार, 3 नोव्हेंबर 2026
संग्रहित फोटो
या प्रकरणात आरेफ खुर्सी मंसुरी (वय २८, रा. केंब्रीजचौक) यांनी फिर्याद दिली आहे. त्यानुसार, मंसुरी यांचे सावंगी बायपास येथे कार दुरुस्तीचे गॅरेज आहे. अडीच महिन्यांपूर्वी त्यांनी सोहेल सलमान खान याला एक लाख रुपये हातउसने दिले होते. सोहेलने त्यापैकी सहा हजार रुपये परत केले; मात्र उर्वरित ९४ हजार रुपये देण्यास तो टाळाटाळ करीत होता. आरेफ यांनी वारंवार पैशांची मागणी केल्याने त्यांच्यात वाद निर्माण झाला होता. १ नोव्हेंबर रोजी रात्री साडेआठच्या सुमारास सोहेलने आरेफ यांना फोन केला. २ नोव्हेंबरच्या मध्यरात्री १२ वाजता जालना रोडवरील राधे-राधे चहाच्या हॉटेलसमोर ये, तेथे पैसे देतो, असे त्याने सांगितले. त्यानुसार आरेफ रात्री बाराच्या सुमारास तेथे पोहोचले. मात्र, सोहेल न आल्याने ते त्याची वाट पाहत थांबले.
दरम्यान, रात्री साडेबारा वाजता सोहेल खान हा साजिद शेख आणि सुलतान शेख यांच्यासह तेथे आला. तिघांनी आरेफ यांना शिवीगाळ करीत तेरे काहेके पैसे? असे म्हणत लोखंडी पाईपने मारहाण केली. या हल्ल्यात त्यांच्या डाव्या पायाच्या नळगीला जखम होऊन रक्तस्राव झाला. तसेच डोळा आणि डाव्या खांद्यालाही मार लागला. त्यानंतर आरेफ तेथून निघाले असता तिघांनी पुष्पा गार्डनसमोर पुन्हा त्यांना मारहाण केली आणि तेथून पळ काढला. या प्रकरणात एमआयडीसी सिडको पोलिस ठाण्यात गुन्हा दाखल करण्यात आला आहे. पुढील तपास हवालदार साहेब खान पठाण करित आहेत.
