मंगळवार, 3 नोव्हेंबर 2026
(फोटो सौजन्य- सोशल मीडिया)
Dia Mirza: बॉलिवूड अभिनेत्री दिया मिर्झाचा प्रदूषणमुक्त दिवाळी साजरी करण्याचे आवाहन करणारा व्हिडिओ गेल्या काही दिवसांपासून चर्चेत आहे. या व्हिडिओवर भाजप नेते आणि मुंबई अध्यक्ष अमित साटम यांच्यासह काही नेत्यांनी आक्षेप घेतला होता. त्यानंतर मुंबई महानगरपालिकेने (बीएमसी) आपल्या ‘एक्स’ अकाउंटवरून हा व्हिडिओ हटवला. मात्र, या निर्णयामुळे निर्माण झालेला वाद मुंबई उच्च न्यायालयात पोहोचला. आता न्यायालयाने या प्रकरणावर नाराजी व्यक्त करत बीएमसीला दिया मिर्झाचा व्हिडिओ पुन्हा अपलोड करण्याचे निर्देश दिले आहेत.
मुंबई उच्च न्यायालयात न्यायमूर्ती गिरीश कुलकर्णी आणि न्यायमूर्ती नीला गोखले यांच्या खंडपीठासमोर या प्रकरणाची सुनावणी झाली. पर्यावरण, वायू आणि ध्वनी प्रदूषणाबाबत जनजागृती करण्यासाठी तयार केलेल्या व्हिडिओला वेगळे वळण देण्यात आल्याबद्दल न्यायालयाने खेद व्यक्त केला. जनजागृतीसाठी सेलिब्रिटींची निवड करणे हा बीएमसी आयुक्तांचा योग्य निर्णय होता, असेही न्यायालयाने नमूद केले.
“आपला देश धर्मनिरपेक्ष आहे. हा पर्यावरणाचा प्रश्न आहे. या देशात सर्व धर्म आणि जातींचे लोक श्वास घेतात,” असे निरीक्षण न्यायालयाने नोंदवले. तसेच समाजातील प्रत्येक व्यक्तीचा, तिचा धर्म, जात किंवा पंथ कोणताही असो, आदर केला पाहिजे, असेही न्यायालयाने स्पष्ट केले.
हटवलेला व्हिडिओ पुन्हा अपलोड करण्याचे निर्देश
दिया मिर्झाच्या व्हिडिओवर काही भाजप नेत्यांसह मुंबईच्या महापौर रितू तावडे यांनीही आक्षेप घेतला होता. त्यानंतर बीएमसीने आपल्या सोशल मीडिया अकाउंटवरून ही क्लिप हटवली. मात्र, वाद निर्माण झाल्यानंतर महापालिकेने व्हिडिओ हटवायला नको होता, असे न्यायालयाने म्हटले. हटवलेला व्हिडिओ पुन्हा अपलोड करणे योग्य ठरेल, असे सांगत खंडपीठाने बीएमसीला तसे निर्देश दिले.
सार्वजनिक पदांवर असलेल्या व्यक्तींकडून समाजात एकोपा आणि धर्मनिरपेक्षतेची भावना जपण्याची अपेक्षा असते, असे न्यायालयाने अधोरेखित केले. मुंबईसारखे शहर एकजूट आणि सामाजिक संबंधांच्या मजबूत भावनेवर उभे आहे. त्यामुळे क्षुल्लक टिप्पण्यांमुळे या एकोप्याला धक्का पोहोचू नये, असेही न्यायालयाने नमूद केले.
पर्यावरण आणि प्रदूषणाचा प्रश्न हा कोणत्याही एका धर्मापुरता मर्यादित नाही. प्रत्येक नागरिकाला स्वच्छ हवा मिळणे महत्त्वाचे आहे. त्यामुळे प्रदूषणमुक्त दिवाळीचा संदेश देणाऱ्या व्हिडिओवरून निर्माण झालेला वाद दुर्दैवी असल्याचे न्यायालयाच्या निरीक्षणातून स्पष्ट झाले. या प्रकरणामुळे दिया मिर्झाच्या व्हिडिओची पुन्हा एकदा चर्चा सुरू झाली आहे.
