कारमधून तरुणाचे अपहरण अन् बर्दापूरला नेऊन खून; लातुरातील घटनेने खळबळ

अनैतिक संबंधाच्या संशयावरून लातूर शहरातील एका तरुणाचे अपहरण करून त्याला अंबाजोगाई तालुक्यातील बर्दापूर येथे नेण्यात आले. तेथे रॉड, बेल्ट आणि काठीने बेदम मारहाण केल्याने तरुणाचा मृत्यू झाल्याची गंभीर घटना समोर आली आहे.

• कारमधून तरुणाचे अपहरण
• बर्दापूरला नेऊन केला खून
• लातुर जिल्ह्यातील घटनेने खळबळ

लातूर : राज्यासह देशभरात गुन्हेगारी वाढली असून, अशातच आता अनैतिक संबंधाच्या संशयावरून लातूर शहरातील एका तरुणाचे अपहरण करून त्याला अंबाजोगाई तालुक्यातील बर्दापूर येथे नेण्यात आले. तेथे रॉड, बेल्ट आणि काठीने बेदम मारहाण केल्याने तरुणाचा मृत्यू झाल्याची गंभीर घटना समोर आली आहे. या प्रकरणी शिवाजीनगर पोलिस ठाण्यात चौघांविरुद्ध अपहरण व खुनाचा गुन्हा दाखल करण्यात आला आहे.

 

माधव ऊर्फ नितीन धनाजी संगमे (वय ३२) हा लातूर शहरातील कन्हेरी चौक परिसरातील एका अपार्टमेंटमध्ये राहत होता. ४ ऑक्टोबर रोजी दुपारी साडेचारच्या सुमारास कन्हेरी चौकातील रुक्मिणी मंदिराजवळ तो असताना एमएच-२४-सीडी-७४७४ क्रमांकाच्या कारमधून आलेल्या चौघांनी त्याचे जबरदस्तीने अपहरण केले. अपहरण केल्यानंतर आरोपी त्याला अंबाजोगाई तालुक्यातील बर्दापूर येथील खडी केंद्रावर घेऊन गेले. तेथे आरोपींनी माधव ऊर्फ नितीन संगमे याला रॉड, बेल्ट आणि काठीने मारहाण केली. या मारहाणीत त्याचा मृत्यू झाल्याचे पोलिस तपासात समोर आले आहे.

हे सुद्धा वाचा : रक्ताच्या नात्याला काळिमा! प्रॉपर्टीच्या वादातून 83 वर्षीय आजोबांकडून नातवाची हत्या

चौघांविरुद्ध गुन्हा दाखल

प्राथमिक तपासानुसार, अनैतिक संबंधाच्या संशयातून हा प्रकार घडल्याची माहिती पोलिसांकडून मिळाली आहे. मात्र, हत्येमागील नेमके कारण आणि आरोपींचा उद्देश याबाबत पोलिसांकडून अधिक तपास सुरू आहे. या प्रकरणी मृत तरुणाचा भाऊ नरेंद्र धनाजी संगमे यांनी दिलेल्या फिर्यादीवरून शिवाजीनगर पोलिस ठाण्यात पृथ्वीराज देशमुख, धवल देशमुख, प्रथमेश रेड्डी आणि आदित्य भालके (सर्व रा. लातूर) यांच्याविरुद्ध अपहरण व खुनाचा गुन्हा दाखल करण्यात आला आहे. घटनेची माहिती मिळताच शिवाजीनगर पोलिसांनी तपासाला सुरुवात केली असून, आरोपींच्या हालचाली, घटनेमागील कारण आणि हल्ल्याची नेमकी परिस्थिती याचा तपास केला जात आहे.

हे सुद्धा वाचा : फोन करून बोलावले अन् कोयत्याने डोक्यात वार, लातुरातील घटनेनं खळबळ; नेमकं काय घडलं?