जामखेड तालुक्यात भरदिवसा रक्तरंजित थरार! दूध वाहतूक करणाऱ्या चालकाला कोयत्याने वार करुन संपवलं

खर्डा येथील जातेगाव फाट्‌याजवळ शुक्रवारी (दि. ११) सकाळी सव्वानऊच्या सुमारास दूध वाहतूक करणाऱ्या चालकावर कोयत्याने प्राणघातक हल्ला करण्यात आल्याचा प्रकार समोर आला आहे.

• दूध वाहतूक करणाऱ्या चालकावर कोयत्याने वार
• जामखेड तालुक्यात भरदिवसा रक्तरंजित थरार
• भरदिवसा घडलेल्या खुनामुळे परिसरात खळबळ

जामखेड : खर्डा येथील जातेगाव फाट्‌याजवळ शुक्रवारी (दि. ११) सकाळी सव्वानऊच्या सुमारास दूध वाहतूक करणाऱ्या चालकावर कोयत्याने प्राणघातक हल्ला करण्यात आल्याचा प्रकार समोर आला आहे. यात गंभीर जखमी झालेल्या चालकाचा उपचारासाठी नेत असताना मृत्यू झाला आहे. भरदिवसा घडलेल्या खुनामुळे परिसरात खळबळ उडाली आहे. तानाजी भास्कर बोराटे (वय ४०, रा. माळेवाडी, ता. भूम) असे मृत व्यक्तीचे नाव आहे.

 

बोराटे हे माळेवाडी येथील कैलास धर्मा आल्हाट यांच्या पिकअपवर (एमएच १२ केपी ५६२६) चालक होते. ते रोज संकलित दूध घेऊन खर्डा येथे येत होते. शुक्रवारी ते नेहमीप्रमाणे दूध घेऊन आले होते. काही अनोळखी व्यक्तींनी त्यांना जातेगाव फाट्याजवळ बोलावून घेतल्याची माहिती आहे. जातेगाव फाट्याजवळ बोराटे आणि संशयितांत काही कारणावरून वाद झाल्याचे समोर आली आहे. बोराटे यांना मारहाण करताना एकाने त्यांच्या मानेवर कोयत्याने वार केल्याने बोराटे रक्ताच्या थारोळ्यात कोसळले. हल्ल्यानंतर आरोपी पसार झाले. घटनेची माहिती मिळताच खर्डा पोलिस ठाण्याचे सहाय्यक पोलीस निरिक्षक उज्ज्वलसिंह राजपूत यांनी पथके तयार करून शोधार्थ रवाना केले आहेत.

कारण अद्याप गुलदस्त्यात

भरदिवसा झालेल्या या खुनामागील नेमके कारण अद्याप स्पष्ट नाही. वैयक्तिक वाद, पूर्ववैमनस्य किंवा अन्य कारणातून हा हल्ला झाला आहे का, या दृष्टीने तपास सुरू आहे. या घटनेने कायदा-सुव्यवस्थेचा प्रश्न पुन्हा ऐरणीवर आला आहे. घटना खर्डा येथे घडली असली तरी खून झालेली व्यक्ती शेजारच्या भूम तालुक्यातील असून ही हत्या नेमकी कोणत्या कारणावरून झाली, याचा तपास सुरू आहे.

हे सुद्धा वाचा : लाचखोर पोलिस एसीबीच्या जाळ्यात; कारवाईनंतर काही तासांतच दिली उपनगराध्यक्षांना धमकी

चंदननगरमध्ये मित्रानेच केली मित्राची हत्या

चंदननगर पोलिस ठाण्याच्या हद्दीत केवळ ७०० रुपयांवरून तरुणाचा चाकूने भोसकून खून केल्याची घटना घडली आहे. या प्रकरणी पोलिसांनी एकाला अटक केली आहे. राहुल राजेंद्र जंवजाळ (वय २२, रा. चंद्रकला निवास, बोराटे वस्ती, चंदननगर) असे खून झालेल्याचे नाव आहे. या प्रकरणी आशिष डेव्हीड मगर (वय २७, रा. सुभाषनगर, येरवडा) याला अटक करण्यात आली आहे. याबाबत सहायक निरीक्षक गणेश जगदाळे यांनी चंदननगर पोलिस ठाण्यात तक्रार दिली आहे.

हे सुद्धा वाचा : संतोष पंडितवर गुन्हा, मग आमदार गायकवाडांवर का नाही? कोथरूड पोलीस ठाण्यात रोहित पवार आक्रमक