Delhi Crime: रस्त्यात धक्का लागला अन् वाद वाढला; चाकूहल्ल्याच्या प्रकरणात दोन अल्पवयीनांसह तिघांना अटक

रस्त्यातून जाताना झालेला किरकोळ धक्का, त्यानंतर वाद आणि काही वेळातच चाकूहल्ला. दिल्लीतील आनंद पर्वत परिसरातील या घटनेत १७ वर्षीय लाचा मृत्यू झाला. पोलिसांनी सीसीटीव्ही, तांत्रिक तपास आणि स्थानिक माहितीच्या आधारे अवघ्या सात तासांत तिघांना ताब्यात घेतले.

• आनंद पर्वत हत्येचा सात तासांत छडा
• १९ वर्षीय तरुणासह दोन अल्पवयीन ताब्यात
• हत्येत वापरलेला चाकू जप्त

 

दिल्ली : आनंद पर्वत परिसरातील हत्येचा दिल्ली पोलिसांनी अवघ्या सात तासांत छडा लावला. या प्रकरणात १९ वर्षीय तरुणासह १७ आणि १५ वर्षांच्या दोन अल्पवयीनांना ताब्यात घेण्यात आले आहे. हल्ल्यात वापरलेला चाकूही पोलिसांनी जप्त केला आहे.

गल्लीत आढळला जखमी अवस्थेत

२२ सप्टेंबरच्या रात्री साडेआठच्या सुमारास आनंद पर्वत परिसरात एका व्यक्तीवर चाकूने हल्ला झाल्याची माहिती पोलिसांना पीसीआर कॉलद्वारे मिळाली. पोलिसांचे पथक सिंह रोडवरील गल्ली क्रमांक १६ मध्ये पोहोचले. तेथे १७ वर्षीय मुलगा जखमी अवस्थेत आढळला. त्याला जीवनमाला रुग्णालयात दाखल करण्यात आले; मात्र डॉक्टरांनी त्याला मृत घोषित केले.

हेही वाचा: Crime News: गणेशोत्सवात अवैध मद्यविक्रीला उत्पादन शुल्क विभागाचा दणका ; सात दिवसांत ४५ गुन्हे दाखल

पोलिसांचे विशेष पथक

घटनेचे गांभीर्य लक्षात घेऊन एसएचओ निरीक्षक सुभाष चंद्र यांच्या देखरेखीखाली आणि एसीपी पटेल नगर सुनील कुमार यांच्या मार्गदर्शनाखाली विशेष पथक तयार करण्यात आले. या पथकात तपासी अधिकारी निरीक्षक रणवीर सिंह, उपनिरीक्षक दीपांशु, हेड कॉन्स्टेबल शरवन, हेड कॉन्स्टेबल हरीश तसेच कॉन्स्टेबल सुरेश, राजेश आणि गिरधारी यांचा समावेश होता.

सीसीटीव्ही आणि तांत्रिक तपासातून ओळख

पोलिसांनी भारतीय न्याय संहितेच्या (BNS) कलम १०३(१) अंतर्गत गुन्हा दाखल करून तपास सुरू केला. सीसीटीव्ही फुटेज, तांत्रिक निगराणी आणि स्थानिक माहितीच्या आधारे पोलिसांनी हल्ल्यात सहभागी तिघांची ओळख पटवली. त्यानंतर आनंद पर्वत परिसरातून तिघांना ताब्यात घेण्यात आले.

हेही वाचा: Pune Crime: पुण्यात शेल कंपन्यांच्या माध्यमातून ४,४२७ कोटी परदेशात; दोन चार्टर्ड अकाउंटंट्सवर गुन्हा

धक्का लागल्यावर वाद

पोलिसांच्या माहितीनुसार, गल्ली क्रमांक १६ मधून जात असताना आरोपींची पीडित मुलाशी धडक झाली. त्यावरून दोन्ही बाजूंमध्ये वाद झाला. हा वाद वाढल्यानंतर तिघांनी मिळून पीडितावर चाकूने हल्ला केल्याचा आरोप आहे.

हल्ल्यात वापरलेला चाकू जप्त

ताब्यात घेतलेल्या आरोपींची ओळख आनंद पर्वत परिसरातील तुषार (१९) आणि १७ व १५ वर्षांच्या दोन अल्पवयीन मुलांच्या रूपात पटली आहे. चौकशीदरम्यान त्यांनी वादानंतर चाकूने हल्ला केल्याची माहिती दिल्याचे पोलिसांनी सांगितले. त्यांच्या निशाणदेहीवरून हल्ल्यात वापरलेला चाकू जप्त करण्यात आला आहे. डीसीपी सेंट्रल डिस्ट्रिक्ट रोहित राजबीर सिंह यांनी पोलिसांच्या तत्पर कारवाईमुळे आणि तांत्रिक तपासाच्या मदतीने हत्येचा उलगडा सात तासांत झाल्याचे सांगितले. प्रकरणाचा पुढील तपास सुरू आहे.