Mhada Colony Robbery: मुलांच्या पिगी बँकेपासून सोन्याच्या दागिन्यांपर्यंत झाडून लांबवले; म्हाडा कॉलनीत लाखोंची घरफोडी!

Mhada Colony Robbery: भिंतीवरून मारली उडी अन् कटरने कापल्या घराच्या कड्या! छत्रपती संभाजीनगरच्या म्हाडा कॉलनीत एकाच रात्री ६ बंद फ्लॅट फोडत चोरट्यांनी घातला धुमाकूळ. पिगी बँकेतील पैशांपासून दागिन्यांपर्यंत लांबवले; सीसीटीव्हीत ३ भामटे कैद झाल्याने खळबळ!

• म्हाडा कॉलनीत एकाच रात्री ६ घरफोड्या
• भिंतीवरून आत शिरून कटरने दरवाजाच्या कड्या कापल्या
• वाळूज पोलिसांकडून सीसीटीव्हीत कैद ३ संशयितांचा शोध सुरू

Mhada Colony Robbery: छत्रपती संभाजीनगर शहरात गेल्या काही दिवसांपासून चोरीच्या घटनांमध्ये मोठी वाढ झाली आहे. बंद घरांची पाहणी करून हात साफ करणाऱ्या सराईत चोरट्यांनी आता तीसगाव येथील म्हाडा कॉलनी परिसरात जोरदार धुमाकूळ घातला आहे. येथील ‘राज स्वप्नपूर्ती अपार्टमेंट’मध्ये मंगळवारी मध्यरात्री एकाच रात्री तब्बल सहा बंद फ्लॅट आणि रो-हाऊसचे कडे तोडून चोरट्यांनी घरफोडी केली. या घटनेमुळे संपूर्ण परिसरात भीतीचे वातावरण पसरले आहे.

भिंतीवरून मारली उडी, कटरने कापल्या दरवाज्याच्या कड्या

मिळालेल्या माहितीनुसार, मंगळवारी मध्यरात्री चोरट्यांनी अपार्टमेंटच्या संरक्षक भिंतीवरून उडी मारून आत प्रवेश केला. त्यानंतर बाहेरगावी गेलेल्या रहिवाशांची घरे हेरून कटरच्या साहाय्याने दरवाजांच्या कड्या कापल्या. डी-१ इमारतीत राहणारे शानसिंह भाटी हे कुटुंबीयांसह पुण्याला गेले होते. संधी साधत चोरट्यांनी त्यांच्या घरातील कपाटातून ३ ग्रॅम सोन्याच्या बाळ्या आणि ३ हजार रुपये रोख लांबवले. याच इमारतीतील रिकामा असलेला डी-१०३ क्रमांकाचा फ्लॅटही फोडला, मात्र तिथे काहीही हाती लागले नाही.

हेही वाचा: Shraddha Lucknow News: खाजगी फोटो दाखवून ब्लॅकमेलिंग अन् नग्न करून नाचवण्याचा खेळ! श्रद्धा आणि तिच्या साथीदारांच्या टॉर्चरने…

पिगी बँक अन् सोन्या-चांदीचे दागिने लंपास

यानंतर चोरट्यांनी आपला मोर्चा डी-२ इमारतीतील ११२ क्रमांकाच्या फ्लॅटकडे वळवला. येथे राहणारे अनिल लकारे बाहेरगावी गेलेले असताना, कपाटाचे कुलूप फोडून मुलांच्या बचतीच्या डब्यातील (पिगी बँक) ५ ते ६ हजार रुपये आणि १० ग्रॅमच्या दोन चांदीच्या अंगठ्या पळवल्या. याशिवाय बी-२०३ क्रमांकाचे रो-हाऊस (साठे कुटुंबीय), डी-१ मधील ११४ (जोशी कुटुंबीय) आणि डी-२ मधील १०४ (शेळके कुटुंबीय) या बंद फ्लॅटचेही कडे कापण्यात आले. हे सर्व कुटुंब बाहेर असल्याने चोरीला गेलेल्या ऐवजाचा अचूक अंदाज घरमालक परतल्यानंतरच स्पष्ट होणार आहे.

हेही वाचा: Jalgaon Anti Corruption: ३ कोटींचे सोने अन् ५ कोटींची संपत्ती; लाचलुचपत विभागाने जळगावच्या अधिकाऱ्याची झडती घेताच उघडकीस आले…

सीसीटीव्हीत ३ चोरटे कैद; पोलिसांकडून शोध सुरू

एकाच अपार्टमेंटमध्ये एकापाठोपाठ एक अशा सहा घरफोडीच्या घटना उघडकीस आल्याने एमआयडीसी वाळूज पोलीस ठाण्याच्या पथकाने तात्काळ घटनास्थळी धाव घेऊन पंचनामा केला. अपार्टमेंटमधील सीसीटीव्ही फुटेजची तपासणी केली असता, त्यामध्ये तीन संशयित भामटे कैद झाल्याचे दिसून आले आहे. या फुटेजच्या आधारे वाळूज पोलीस संशयितांचा कसून शोध घेत आहेत.