Baramati Crime: मतदानाच्या पूर्वसंध्येला बारामती पोलिसांची धडक; गावठी पिस्तूल, तीन काडतुसे अन् कार जप्त!

Baramati Crime: प्राथमिक चौकशीत हे शस्त्र मयूर मोरे (रा. मेडद, ता. बारामती) याच्याकडून मिळाल्याचे आदित्य शेलार याने सांगितल्याची माहिती पोलिसांनी दिली. शस्त्राचा मूळ स्रोत आणि संभाव्य बेकायदेशीर पुरवठ्याबाबत पुढील तपास सुरू आहे.

• बारामती शहर पोलिसांची मोठी कारवाई
• आमराईतील आदित्य शेलार या तरुणाकडून २५ हजारांचे गावठी पिस्तूल व ३ जिवंत काडतुसे जप्त
• १,२०० रुपयांची तीन काडतुसे आणि दोन लाख रुपये किमतीची कार जप्त

Baramati Crime News:  मतदानाच्या पूर्वसंध्येला बारामती शहर पोलिसांनी धडक कारवाई करत गावठी पिस्तूल, तीन जिवंत काडतुसे आणि मारुती स्विफ्ट कार असा एकूण २ लाख २६ हजार २०० रुपयांचा मुद्देमाल जप्त केला. या प्रकरणी आमराई, बारामती येथील आदित्य शेलार याला अटक करण्यात आली आहे. पुणे विभाग पदवीधर व शिक्षक मतदारसंघाच्या मतदानाच्या पार्श्वभूमीवर झालेल्या या कारवाईमुळे शहरातील बेकायदेशीर शस्त्र बाळगण्याचा मुद्दा पुन्हा ऐरणीवर आला आहे.

टी. सी. कॉलेज परिसरात बेकायदेशीर अग्निशस्त्र

२२ ऑक्टोबर रोजी रात्री आठच्या सुमारास बारामती शहर पोलीस ठाण्याच्या तपास पथकातील पोलीस शिपाई अक्षय सिताफ यांना गोपनीय माहिती मिळाली. आदित्य शेलार हा लाल रंगाच्या स्विफ्ट कारमधून टी. सी. कॉलेज परिसरात बेकायदेशीर अग्निशस्त्र घेऊन फिरत असल्याची माहिती मिळताच पोलिसांनी तातडीने हालचाली सुरू केल्या.

India China Tension: अरुणाचल प्रदेश सीमेवर भारत-चीन सैन्यात संघर्ष; ITBP प्रमुखांचा मोठा खुलासा

मोरया पॅलेस इमारतीसमोरील रस्त्यावर संशयित कार

प्रभारी परिविक्षाधीन पोलीस उपअधीक्षक मनीषा ओमासे यांच्या नेतृत्वाखालील पथकाने रात्री साडेआठच्या सुमारास आठ नंबर ग्राउंडजवळील मोरया पॅलेस इमारतीसमोरील रस्त्यावर संशयित कार शोधून काढली. दोन पंचांच्या उपस्थितीत वाहनाची तपासणी केली असता चालकाच्या सीटजवळ गावठी पिस्तूल आणि मॅगझीनमध्ये एक जिवंत काडतूस आढळले. त्यानंतर शेलार याची अंगझडती घेतली असता जॅकेटच्या खिशात आणखी दोन जिवंत काडतुसे सापडली. त्याच्याकडे शस्त्र बाळगण्याचा वैध परवाना नसल्याचेही समोर आले.

पोलिसांनी २५ हजार रुपये किमतीचे पिस्तूल, १,२०० रुपयांची तीन काडतुसे आणि दोन लाख रुपये किमतीची कार जप्त केली. याप्रकरणी बारामती शहर पोलीस ठाण्यात गुन्हा रजिस्टर क्रमांक ४७३/२०२६ नुसार भारतीय हत्यार अधिनियम, १९५९ च्या कलम ३ सह २५(१-ब)(अ) अंतर्गत गुन्हा दाखल करण्यात आला आहे.

Manoj Jarange Patil: महायुतीत ठिणगी! मनोज जरांगेंच्या ५०० कोटींच्या दाव्याने राजकारण तापलं; शिंदेसेनेने भाजपला धरलं धारेवर

शस्त्राचा पुरवठादार कोण?

प्राथमिक चौकशीत हे शस्त्र मयूर मोरे (रा. मेडद, ता. बारामती) याच्याकडून मिळाल्याचे आदित्य शेलार याने सांगितल्याची माहिती पोलिसांनी दिली. शस्त्राचा मूळ स्रोत आणि संभाव्य बेकायदेशीर पुरवठ्याबाबत पुढील तपास सुरू आहे.

पोलीस अधीक्षक संदीप सिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली ही कारवाई करण्यात आली. पोलीस निरीक्षक श्रीशैल चिवडशेट्टी यांच्या समन्वयातून पोलीस हवालदार क्षीरसागर, पोलीस शिपाई कवितके, अक्षय सिताफ आणि पोलीस हवालदार अभिजीत कांबळे यांनी कारवाईत सहभाग घेतला. पुढील तपास पोलीस हवालदार ज्ञानदेव विष्णू क्षीरसागर करीत आहेत.