शुक्रवार, 7 ऑगस्ट 2026
पत्नी आहे की हैवान? पतीला बेशुद्ध करून बॅटने मारहाण, नंतर घरातील कट्ट्यात जिवंत पुरण्याचा प्रयत्न; पत्नीवर गुन्हा दाखल (फोटो सौजन्य-ChatGPT)
याप्रकरणी प्रकाश कान्होबा जगताप (वय ७१, रा. ढाकाळे, ता. बारामती) यांनी फिर्याद दिली आहे. त्यावरून शर्मिला प्रविण जगताप (वय ३८, रा. इंद्रप्रस्थ सोसायटी, जामदार रोड, बारामती) हिच्याविरुद्ध बारामती शहर पोलिस ठाणे भारतीय न्याय संहिता कलम १०९(१) अंतर्गत गुन्हा दाखल करण्यात आला आहे.
दृश्यम चित्रपटातील कथानका प्रमाणे घडलेल्या या घटनेमुळे बारामती परिसरात मोठी खळबळ उडाली आहे. पोलिसांनी दिलेल्या माहितीनुसार, ३० जुलै २०२६ रोजी रात्री ११.३० ते १ ऑगस्ट २०२६ रोजी सकाळी ११.३० या कालावधीत हा प्रकार घडल्याचा आरोप आहे. फिर्यादी प्रकाश जगताप यांनी दाखल केलेल्या फिर्यादीनुसार, आरोपी महिलेने पती प्रविण प्रकाश जगताप (वय ४१) यांना कोणतेतरी औषध देऊन अर्धबेशुद्ध केले. त्यानंतर त्यांना बॅटने मारहाण केली आणि जीवे मारण्याच्या उद्देशाने घरातील हॉललगतच्या गॅलरीत बांधलेल्या चौकोनी कट्ट्यात बेशुद्ध अवस्थेत झोपवून तो कट्टा कडप्पा फरशीने बंद करण्याचा प्रयत्न केला.याप्रकरणी ५ ऑगस्ट २०२६ रोजी गुन्हा दाखल करण्यात आला असून, पोलीस हवालदार नवनाथ नलावडे यांनी गुन्हा नोंदवला आहे. सहाय्यक पोलीस निरीक्षक इंगवले या प्रकरणाचा पुढील तपास करत आहेत.
पती प्रवीण जगताप यांना औषध देऊन पत्नी शर्मिला जगताप हिने औषध देऊन बेशुद्ध केले, त्यानंतर त्यांच्या डोक्यात बॅटने मारहाण करून, त्यांना घरातील हॉललगत बांधलेल्या गॅलरीत बांधलेल्या चौकोनी कट्ट्यात पुरून त्यावर सिमेंट लावले, यानंतर बिहारी गवंड्यांना बोलावून त्या कट्ट्यावर कडप्पा फरशी बसवण्यास सांगितले. बिहारी गवंड्याने कडप्पा बसवत असताना, अचानक जखमी अवस्थेत असलेल्या प्रवीण जगताप यांचा पाय हलल्याने, आतील बाजूस जखमी अवस्थेत एक व्यक्ती असल्याचे बिहारी लोकांच्या लक्षात आले, त्यांनी तातडीने तिथून पळ काढून बारामती शहर पोलीस ठाणे गाठले. पोलीस ठाण्यात सदर प्रकार सांगितल्यानंतर, घटनास्थळी पोलीस दाखल झाले. तातडीने त्यांनी सदर कट्ट्यात अर्धबेशुद्ध असलेल्या प्रवीण जगताप यांना तातडीने रुग्णालयात दाखल केले. शुद्धीवर आल्यानंतर त्यांनी हा प्रकार पोलिसांसह त्यांच्या वडिलांना सांगितला. त्यांनी पोलिस ठाण्यात शर्मिला जगताप हिच्या विरुद्ध तक्रार दाखल केली. दरम्यान आरोपी शर्मिला जगताप हिचा मेडिकल औषध विक्रीचा व्यवसाय आहे. पती प्रवीण जगताप हे भारत फोर्ज या कंपनीत नोकरीस असून त्यांना दोन अपत्य आहेत.
पुण्यातील वाघोलीत व्यावसायिकावर गोळीबार, 22 तोळे सोने लुटून आरोपी पसार; नेमकं काय घडलं?
