रविवार, 8 नोव्हेंबर 2026
ऊसदरासाठी राजू शेट्टी पुन्हा करणार आंदोलन; पंढरपुरातून आंदोलनाचे फुंकणार रणशिंग
सोलापूर : कोल्हापूर आणि परिसरातील जिल्ह्यांमध्ये ऊसदरासाठी आंदोलन केल्यानंतर स्वाभिमानी शेतकरी संघटनेचे नेते राजू शेट्टी यांनी आता सोलापूर जिल्ह्याकडे मोर्चा वळवला आहे. जिल्ह्यातील साखर, कारखानदार शेतकऱ्यांना योग्य ऊसदर देत नसल्याचा आरोप करत त्यांनी आंदोलनाचा इशारा दिला आहे. ऊस उत्पादक शेतकऱ्यांना योग्य दर मिळवून देण्यासाठी राजू शेट्टी हे रविवारी (दि. ८) पंढरपूर येथून आंदोलनाचे रणशिंग फुंकणार आहेत.
राजू शेट्टी रविवारी सकाळी 10 वाजता पंढरपुरात पत्रकार परिषद घेऊन आगामी आंदोलनाची दिशा आणि रणनीती जाहीर करणार आहेत. कोल्हापुरात ज्या पद्धतीने संघर्ष करून शेतकऱ्यांना अधिक दर मिळवून दिला, त्याच धर्तीवर सोलापुरातही कारखानदारांविरोधात लढा उभारणार असल्याचे त्यांनी स्पष्ट केले. शेतकऱ्यांनी संघर्षासाठी तयार राहावे, असे आवाहनही त्यांनी केले आहे.
शेट्टी यांनी किणी टोलनाक्यावरील रास्ता रोको मागे घेतला. त्यामुळे महामार्गावरील वाहतूक पूर्ववत झाली. मात्र, चार हजार रुपये एकरकमी मिळावेत, या मागणीवर आपण शेवटपर्यंत ठाम होतो. इतर संघटनांनी ३९०० रुपयांचा प्रस्ताव मान्य केला. वाहतूकदार आणि पोलिसांची परिस्थिती लक्षात घेऊन नाराजीने आंदोलन मागे घेतल्याचे शेट्टी यांनी सांगितले.
4 हजारांच्या मागणीवर ठाम
दरम्यान, कोल्हापुरातील ऊसदर आंदोलनावर तोडगा निघाला आहे. कारखानदारांनी कोणतीही कपात न करता प्रतिटन ३९०० रुपये पहिला हप्ता, गाळप हंगाम संपल्यानंतर १०० रुपये अतिरिक्त आणि साखरेचा दर प्रतिक्विंटल ४५०० रुपये झाल्यास आणखी २०० रुपये देण्याचा प्रस्ताव दिला.
FAQ
1. ऊसदरासाठी पुन्हा आंदोलन कोण करणार?
स्वाभिमानी शेतकरी संघटनेचे नेते राजू शेट्टी आंदोलन करणार आहेत.
2. आंदोलन कोणत्या जिल्ह्यात होणार?
सोलापूर जिल्ह्यातील साखर कारखानदारांविरोधात आंदोलन उभारले जाणार आहे.
3. आंदोलनाचे रणशिंग कुठून फुंकले जाणार?
पंढरपूर येथून आंदोलनाची सुरुवात केली जाणार आहे.
