Baramati Woman Death Case: ‘अथर्व मला गोळी देतोय…’ ( फोटो सौजन्य- सोशलमीडिया)
या प्रकरणी अथर्व राजेंद्र मेहन या २७ वर्षीय तरुणाविरोधात बारामती शहर पोलीस ठाण्यात गुन्हा दाखल करण्यात आला आहे. मात्र, तरुणीच्या मृत्यूमागचे नेमके कारण अद्याप स्पष्ट झालेले नाही. पोलिसांकडून वैद्यकीय अहवाल, रासायनिक तपासणी तसेच उपलब्ध इतर पुरावे तपासले जात आहेत.
मृत तरुणीने बी.एस्सी. अॅग्रीचे शिक्षण पूर्ण केले होते. पुढील शिक्षण आणि एमपीएससीच्या तयारीसाठी ती पुण्यात क्लासला जात होती. डिसेंबर २०२५ मध्ये तिच्या मैत्रिणीकडून आईला अथर्वसोबत तिचे संबंध असल्याची माहिती मिळाली. त्यानंतर आईने मुलीशी नियमित संपर्क ठेवण्यास सुरुवात केली. Baramati Woman Death Case:
काही काळानंतर दोन्ही कुटुंबांमध्ये या नात्याबाबत चर्चा झाली. लग्न करण्याची दोघांची इच्छा असल्याचेही तरुणीने आईला सांगितले होते. एप्रिल २०२६ मध्ये दोन्ही कुटुंबांची भेट झाली आणि लग्नाबाबत सकारात्मक चर्चा झाल्याचे तक्रारीत नमूद करण्यात आले आहे.
मात्र, त्यानंतर परिस्थितीत बदल झाल्याचे आईच्या लक्षात आले. घटनेच्या सुमारे दोन ते तीन आठवडे आधी मुलगी पूर्वीपेक्षा शांत राहू लागली होती. याबाबत आईने तिच्या मैत्रिणीकडे विचारणा केली असता अथर्वकडून तिला काही गोळ्या दिल्या जात असल्याचे सांगण्यात आल्याचा दावा तक्रारीत करण्यात आला आहे. तसेच अथर्व तिच्यावर शारीरिक संबंधांसाठी दबाव टाकत असल्याचेही मैत्रिणीने सांगितल्याचे आईने पोलिसांना कळवले आहे.
६ ऑगस्ट रोजी दुपारी अथर्व कार घेऊन तरुणीला बारामतीतील टी.सी. कॉलेजमध्ये प्रवेशाच्या कामासाठी घेऊन गेला होता. त्यानंतर दोघे त्याच्या आई आणि मावशीला सोडण्यासाठी जात असल्याचे तिने आईला कळवले. काही वेळाने आईने व्हिडिओ कॉल केला तेव्हा मुलगी अथर्वसोबत असल्याचे दिसले.
संध्याकाळी आईने पुन्हा मुलीशी संपर्क करण्याचा प्रयत्न केला. फोन न उचलल्याने तिने अथर्वच्या मोबाईलवर फोन केला. यावेळी मुलीशी बोलणे झाले. आईच्या म्हणण्यानुसार, या संभाषणात मुलीने अथर्व तिला त्याच्या घरी घेऊन जाणार असल्याचे सांगितले. त्याला तिच्यासोबत शारीरिक संबंध ठेवायचे असून, तो तिला एक गोळी देणार असल्याचेही तिने सांगितल्याचा दावा आहे.
हे ऐकल्यानंतर आईने मुलीला त्याच्यासोबत जाऊ नये आणि तातडीने घरी परतावे, असे सांगितले. रात्री सुमारे नऊ वाजता आईने मेसेज केला असता मुलीने जेवण करत असल्याचे उत्तर दिले. त्यानंतर मात्र तिच्याकडून प्रतिसाद मिळाला नाही.
Pune Murder : वडापाव बेतला जीवावर, पुण्यात तरुणाचा खून; नेमकं काय घडलं?
रात्री दहाच्या सुमारास पुन्हा फोन केला असता अथर्वने फोन उचलला. तरुणीला अचानक चक्कर आल्याचे त्याने सांगितले. तिला उपचारासाठी आधी एका रुग्णालयात, त्यानंतर दुसऱ्या रुग्णालयात नेण्यात आले. शेवटी तिला सिल्वर जुबली रुग्णालयात दाखल करण्यात आले. आई तेथे पोहोचेपर्यंत मुलगी स्ट्रेचरवर होती. काही वेळाने तिचा मृत्यू झाल्याचे डॉक्टरांनी सांगितले.
अथर्वने तरुणीला आपल्या घरी नेले होते आणि तेथे दोघांमध्ये शारीरिक संबंध झाल्यानंतर तिला अचानक त्रास सुरू झाल्याचे त्याने सांगितल्याचे तक्रारीत नमूद आहे. या संपूर्ण घटनाक्रमामुळे तरुणीच्या आईने तिच्या मृत्यूबाबत संशय व्यक्त केला आहे. पोलिसांनी भारतीय न्याय संहितेच्या कलम १०६(१) अंतर्गत गुन्हा दाखल केला आहे.
सध्या पोलिसांकडून या प्रकरणातील प्रत्येक कडी तपासली जात आहे. तरुणीने घेतलेली किंवा तिला देण्यात आलेली औषधे कोणती होती का, तिच्या शरीरात कोणता पदार्थ आढळतो का, तसेच तिच्या मृत्यूचे वैद्यकीय कारण काय आहे, याचा शोध घेतला जात आहे. मोबाईलमधील संभाषण, कॉल रेकॉर्ड, इतर डिजिटल माहिती आणि वैद्यकीय पुरावेही तपासले जात आहेत. या तपासातूनच तरुणीच्या मृत्यूमागचे खरे कारण समोर येणार आहे. त्यामुळे सध्या कोणताही अंतिम निष्कर्ष काढता येणार नाही. पोलिसांच्या तपासाकडे आता सर्वांचे लक्ष लागले आहे.
.png "Videos"){kind=small}
