धक्कदायक ! व्यापाऱ्याला 2.8 कोटींचा गंडा; लाल दिव्याच्या गाडीने पोहोचला घरी अन्…

कालांतराने व्यावसायिकाने त्याचे सोने आणि पैसे परत मागितले. तेव्हा आरोपी टाळाटाळ करू लागला. एके दिवशी, एका राजकीय पक्षाच्या पदाधिकाऱ्यासोबत तो त्या व्यावसायिकाच्या दुकानात पोहोचला

मुंबई : गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. त्यात फसवणुकीच्या घटनाही वाढत आहेत. असे असताना आता झवेरी बाजारातील एका भामट्याने मुख्यमंत्री कार्यालयातील (सीएमओ) वरिष्ठ अधिकारी असल्याचे भासवून एका सराफा व्यापाऱ्याची २.८ कोटी रुपयांपेक्षा जास्त रकमेची फसवणूक केली. या घटनेने एकच खळबळ उडाली आहे.

याप्रकरणी पोलिसांनी मुख्य आरोपीसह त्याची सासू, त्याचा घरमालक आणि इतर दोघांविरुद्ध फसवणूक, हल्ला आणि धमकी यासारख्या अनेक गंभीर आरोपांखाली गुन्हा दाखल केला आहे. पोलिसांनी दिेलेल्या माहितीनुसार, भामट्याने त्याच्या घरमालकामार्फत सराफा व्यापाऱ्याची जानेवारी २०२४ मध्ये भेट घेतली. आरोपीने स्वतःला मुख्यमंत्री कार्यालयात वरिष्ठ अधिकारी असल्याचे सांगत पदव्युत्तर शिक्षणासाठी २० लाख रुपयांची गरज असल्याचे सांगितले. तसेच ते ३०-३५ दिवसांत परत करण्याचे आश्वासन दिले. त्याच्यावर विश्वास ठेवून व्यावसायिकाने पैसे त्याच्या खात्यात ट्रान्सफर केले. त्यानंतर आरोपी लाल दिव्याच्या गाडीने व्यावसायिकाच्या घरी पोहोचला. त्यामुळे त्यांचा विश्वास आणखी दृढ झाला.

हेदेखील वाचा : शेअरमध्ये गुंतवणुकीच्या आमिषाने ज्येष्ठाची फसवणूक; तब्बल लाखो रुपयांना घातला गंडा

दरम्यान, त्याने व्यावसायिकाच्या भावाला सांगितले की, त्यांची मुख्यमंत्र्यांशी ओळख करून देईल. त्यानंतर त्याने एका वरिष्ठ कस्टम अधिकाऱ्याचा जवळचा मित्र असल्याचा दावा केला आणि सरकारी लिलावात केवळ ७% सवलतीत तस्करी जप्त केलेले सोने मिळवू देण्याचे आमिष दाखवले. लोभी, व्यावसायिकाने आरोपीला सोन्यासाठी १,१५,२२,४०० रुपये दिले. आरोपीने पुढे दावा केला की, त्याच्या सासूचे एक मोठे हिऱ्यांच्या दागिन्यांचे शोरूम आहे आणि ते ऑनलाइन दागिने विकत होते. या बहाण्याखाली, त्याने व्यावसायिकाकडून १४४८४१०३ रुपयांचे हिऱ्याचे दागिने घेतले, ते जास्त बाजारभावाने विकण्याचे आणि नफा मिळवण्याचे आश्वासन दिले.

मारहाण व जीवे मारण्याची धमकी

कालांतराने व्यावसायिकाने त्याचे सोने आणि पैसे परत मागितले. तेव्हा आरोपी टाळाटाळ करू लागला. एके दिवशी, एका राजकीय पक्षाच्या पदाधिकाऱ्यासोबत तो त्या व्यावसायिकाच्या दुकानात पोहोचला आणि त्याला मारहाण, शिवीगाळ आणि जीवे मारण्याची धमकी दिली. अखेर, सराफा व्यापाऱ्याने लोकमान्य टिळक मार्ग पोलिस ठाण्यात तक्रार दाखल केली.