Dharashiv Accident News: तुळजापूरकडे पायी जाणाऱ्या भाविकांना कंटेनरची धडक; एकाचा मृत्यू, ६ जण गंभीर

Dharashiv Accident News: तुळजाभवानीचे दर्शन अवघ्या काही अंतरावर असतानाच महामार्गावर काळाने घाла घातला! पायी जाणाऱ्या भाविकांच्या घोळक्यात भरधाव कंटेनर शिरल्याने एक जागीच ठार, तर सहा जण गंभीर जखमी झाले. मंदिरापर्यंत पोहोचण्याआधीच भाविकांवर ओढवलेल्या या भीषण संकटाची थरारक कहाणी

• नळदुर्ग बायपासजवळ पायी जाणाऱ्या भाविकांना कंटेनरने जोरदार धडक दिली.
• या दुर्घटनेत 30 वर्षीय तरूणाचा जागीच मृत्यू तर सहा जण गंभीर जखमी.  
• कर्नाटकच्या बसवकल्याणहून तुळजाभवानीच्या दर्शनासाठी प्रवास सुरू होता.

 

Dharashiv Accident News: : मुंबई-हैदराबाद राष्ट्रीय महामार्गावर गुरुवारी सकाळी एक अत्यंत मन हेलावून टाकणारी आणि भीषण दुर्घटना घडली आहे. आई तुळजाभवानीचे दर्शन अवघ्या काही तासांच्या अंतरावर असतानाच, पायी जाणाऱ्या भाविकांच्या एका समूहाला भरधाव कंटेनरने मागून जोरदार धडक दिली. या हृदयद्रावक अपघातात एका भाविकाचा जागीच मृत्यू झाला असून, सहा जण गंभीर जखमी झाले आहेत. या घटनेमुळे धाराशिव परिसरात मोठी हळहळ व्यक्त होत आहे.

हेही वाचा:Pregnant Woman Abuse: “पैसे आणले नाहीतर दुसरे लग्न करू!” सासरच्यांच्या त्रासाला कंटाळून विवाहितेने उचलले टोकाचे पाऊल

नेमकी कशी घडली दुर्घटना?

मिळालेल्या माहितीनुसार, कर्नाटकातील बसवकल्याण येथून काही भाविकांचा समूह आई तुळजाभवानीच्या दर्शनासाठी पायी मार्गस्थ झाला होता. हा ग्रुप तुळजापूरच्या दिशेने चालला असताना, मुंबई-हैदराबाद महामार्गावरील नळदुर्ग बायपासजवळ पोहोचला. त्याच वेळी हैदराबादहून मुंबईच्या दिशेने जाणाऱ्या एका भरधाव कंटेनरवरील चालकाचे अचानक वाहनावरील नियंत्रण सुटले. अनियंत्रित झालेला हा कंटेनर रस्ते मार्गाने पायी चालणाऱ्या भाविकांच्या घोळक्यात शिरला आणि त्यांना जोरदार धडक दिली. या अचानक घडलेल्या प्रकारामुळे महामार्गावर एकच तारांबळ उडाली.

एक ठार, सहा जण गंभीर जखमी

या भीषण अपघातात बसवकल्याण येथील रहिवासी असलेले गुरुसिद्ध बाबुराव कुंभार (वय ३०) यांचा जागीच मृत्यू झाला. त्यांच्यासह इतर सहा भाविक या दुर्घटनेत गंभीर जखमी झाले असून, त्यांच्या डोक्याला, हाताला आणि पायांना तीव्र दुखापती झाल्या आहेत. अपघातानंतर स्थानिक नागरिकांनी आणि पोलिसांनी तातडीने धाव घेत मदतकार्य सुरू केले. सर्व जखमींना पोलिसांच्या मदतीने तात्काळ नळदुर्ग उपजिल्हा रुग्णालयात उपचारासाठी हलवण्यात आले, जिथे त्यांच्यावर सध्या उपचार सुरू आहेत.

हेही वाचा: Satara News: ‘तो’ आघात सहन झाला नाही! मित्राच्या विरहाने ग्रासलेल्या पूजाने वसतिगृहात संपवली जीवनयात्रा

पायी जाणाऱ्या भाविकांच्या सुरक्षेचा प्रश्न ऐरणीवर

या दुर्घटनेमुळे राष्ट्रीय महामार्गावरून तुळजापूरकडे पायी जाणाऱ्या हजारो भाविकांच्या सुरक्षेचा प्रश्न पुन्हा एकदा गंभीरपणे समोर आला आहे. रात्रीच्या वा पहाटेच्या वेळी महामार्गावरून सुसाट वेगाने जाणाऱ्या वाहनांमुळे भाविकांच्या जीवाला सतत धोका निर्माण होत आहे. त्यामुळे वाहनचालकांनी आणि पायी प्रवास करणाऱ्या भाविकांनी विशेष काळजी व खबरदारी घेण्याचे आवाहन प्रशासनाकडून करण्यात येत आहे.