साडेसहा वर्षांत ७२० जणांचा मृत्यू, २,४०८ जखमी! आपत्कालीन दुर्घटनांचे सत्र, आरटीआयमधून धक्कादायक वास्तव झाले उघड
Mumbai News: देशाची आर्थिक राजधानी असलेल्या मुंबईत नागरी सुरक्षिततेचे तीन-तेरा वाजल्याचे पुन्हा एकदा समोर आले आहे. गेल्या साडेसहा वर्षांत म्हणजेच सन २०२० ते सप्टेंबर २०२६ शहरात घडलेल्या विविध आपत्कालीन दुर्घटनांमध्ये तब्बल ७२० निष्पाप नागरिकांना आपला जीव गमवावा लागला असून २,४०८ नागरिक जखमी झाले आहेत. माहिती अधिकार कार्यकर्ते शकील अहमद शेख यांनी मागवलेल्या माहितीतून ही धक्कादायक आकडेवारी उघडकीस आली आहे. मुंबई महानगरपालिकेच्या आपत्कालीन व्यवस्थापन विभागाचे जनमाहिती अधिकारी सुनील जाधव यांनी माहिती अधिकार कायद्यांतर्गत ही अधिकृत माहिती दिली आहे. या साडेसहा वर्षांत आग, इमारत कोसळणे, दरडी कोसळणे, उघडे मॅनहोल्स आणि पाण्यात बुडण्याच्या घटनांमुळे मुंबईकरांच्या जीविताला मोठा धोका निर्माण झाल्याचे स्पष्ट झाले आहे.(फोटो सौजन्य – AI)
पालिकेने दिलेल्या माहितीनुसार, शहरात घर, भिंती आणि इमारतीचे भाग कोसळून सर्वाधिक जीवितहानी झाली आहे. या प्रकारात १७९ नागरिकांचा मृत्यू झाला असून ८६४ जण जखमी झाले. तर आग व शॉर्टसर्किटच्या घटनांमध्ये तब्बल १६८ निष्पाप जीवांचा होरपळून मृत्यू झाला असून १,०४८ नागरिक गंभीर जखमी झाले आहेत.
जाहीर करण्यात आलेल्या आकडेवारीतील सर्वात चिंताजनक बाब म्हणजे समुद्र, नाले, नद्या, विहिरी, खाड्या आणि मॅनहोलमध्ये पडून एकूण ३२८ नागरिकांचा मृत्यू झाला आहे. यामध्ये २३७ पुरुष आणि ९१ महिलाचा समावेश आहे.
दुर्घटना घडल्यानंतर केवळ पंचनामे आणि आर्थिक मदत जाहीर करण्यापलीकडे महापालिका प्रशासन ठोस प्रतिबंधात्मक पावले उचलते का, असा सवाल आता उपस्थित केला जात आहे. या पार्श्वभूमीवर, आरटीआय कार्यकर्ते शकील अहमद शेख यांनी महापालिका आयुक्त आणि मुख्य अग्निशमन अधिकाऱ्यांना पत्र पाठवून तातडीने उपाययोजना करण्याची मागणी केली आहे. शहरातील धोकादायक इमारतींचे ऑडिट, उघड्या मॅनहोल्सवर जाळ्या बसवणे आणि नागरी सुरक्षा यंत्रणा अधिक सक्षम करण्याची मागणी जोर धरत आहे.
.png "Videos"){kind=small}
