Ashok Kharat Case update: 'म्हणून जास्त उडायचं नसतं!...; रोहिणी खडसेंची चाकणकरांच्या जखमेवर मीठ चोळलं
रुपाली चाकणकर यांनी आपला राजीनामा राष्ट्रवादी काँग्रेसच्या (अजित पवार गट) अध्यक्षा सुनेत्रा पवार यांच्याकडे सादर केला आहे. एका गंभीर गुन्ह्यातील आरोपीसोबतच्या संबंधांच्या चर्चांमुळे त्यांना हे पाऊल उचलावे लागल्याचे मानले जात आहे. या धक्कादायक प्रकरणावर राष्ट्रवादी काँग्रेस (शरद पवार गट) महिला प्रदेशाध्यक्षा रोहिणी खडसे यांनी आपली प्रतिक्रिया दिली आहे. “म्हणून जास्त उडायचं नसतं ! आता सगळा अहंकार धुळीस मिळेल. आणखी काही गोष्टी बाहेर पडतील ! Wait and Watch…”अशा शब्दांत रोहिणी खडसे यांनी इशारा दिला आहे. तसेच, ‘ज्या शिडीने वर गेले त्याच शिडीने खाली ! शेवटी… कर्म,’ असेही खडसे म्हणाल्या.
दरम्यान, अशोक खरातचे कारनामे उघडकीस आल्यानंतर चाकणकर यांनी उपमुख्यमंत्री सुनेत्रा पवार यांच्याकडे राजीनामा सुपूर्द केला.त्यानंतर रोहिणी खडसे यांनी सोशल मीडियावर प्रतिक्रिया दिली आहे. म्हणून जास्त उडायचं नसतं ! आता सगळा अहंकार धुळीस मिळेल, असा खोचक टोला त्यांनी लगावला आहे.
“गर्वाचे घर नेहमीच खाली असते हे आता काही लोकांना कळलं असेल… म्हणून जास्त उडायचं नसतं ! आता सगळा अहंकार धुळीस मिळेल ! माझी मा.मुख्यमंत्री महोदय, मा. सुनेत्रा वहिनी यांना विनंती आहे की त्यांनी फक्त राज्य महिला आयोगाच्या अध्यक्षांचा राजीनामा घेऊ नये तर या प्रकरणात जे जे लोक सामील आहेत त्यांच्यावर कठोरात कठोर कारवाई व्हायला हवी याची खबरदारी घ्यावी. ज्या गोष्टी या प्रकरणात समोर येत आहेत त्या अत्यंत गंभीर आहेत. आणखी काही गोष्टी बाहेर पडतील ! Wait and Watch…” अशा शब्दांत खडसे यांनी चाकणकरांना इशारा दिला आहे.
धक्कादायक बाब म्हणजे, अशोक खरात याच्यासोबत रुपाली चाकणकर यांचा एक व्हिडीओ व्हायरल झाले आहेत. त्यात चाकणकर अशोक खरातच्या पायांची पूजा करताना दिसत आहेत. तर दुसऱ्या एका व्हिडीओत चाकणकर यांनी खरातला थेट विठ्ठलाची उपमा देताना दिसत आहेत. त्याशिवाय चाकणकर आणि खरात यांचे अनेक फोटोही सोशल मीडियावर व्हायरल झाले आहेत.
दरम्यान, रुपाली चाकणकर या आरोपी अशोक खरातने स्थापन केलेल्या ट्रस्टच्या संचालिका असल्याचे समोर आले आहे. गेल्या वर्षी एका पीडित महिलेने लैंगिक छळाची तक्रार केली होती. पण चाकणकर यांनी तिला मदत करण्याऐवजी खरातचीच पाठराखण केली, असा खळबळजनक आरोप होत आहे. इतकेच नव्हे तर, खरातवर त्यांचा राजकीय वरदहस्त असल्याच्या चर्चाही सुरू आहेत. पण विरोधी पक्षांचा वाढता दबाव आणि व्हायरल फोटोंमुळे अखेर त्यांनी राजीनामा दिला.
तपासादरम्यान पोलिसांच्या हाती अशोक खरातचे दोन लॅपटॉप आणि १०० हून अधिक आक्षेपार्ह व्हिडिओ लागले आहेत. या पुराव्यांवरून खरातने केलेल्या कृत्यांची व्याप्ती मोठी असल्याचे दिसून येत आहे. या प्रकरणातील तांत्रिक पुरावे आणि राजकीय धागेदोरे आता पोलिसांच्या तपासाचे मुख्य केंद्र बनले आहेत.
